Avrahamen q̇eräz sa čuuxe haq̇i, iz c̣i Geṭura.
Geṭuranal Avrahameynaḳ me ġarmoġone ečeri: Zimran, Yoḳšan, Medan, Midyan, Išbag saal Šuah.
Yoḳšanaxun Ševa q̇a Dedane baki. Dedanaxun aššurluyox, leṭušluyox saal leumluyox uḳala azuḳxone ämälä hari.
Midyanaxun Efa, Efer, Xanoḳ, Avida saal Eldaahe baki. Morox bito Avrahami Geṭuraxun baki ġarmoġoxun ämälä hariyoroxey.
Avrahamen izi var-dövlätä bitova Isaaḳeynaḳe efi.
Izi ṭiyä͑mi čupuxxoxun baki ġarmoġo isä, hälä ič dirisṭ hamaq̇un, ičoġoy paya tadi be͑ġč̣eġalače yaq̇abi ki, izi Isaaḳaxun ä͑xilq̇aṭun baki.
Avraham düz sabać yetmiš qo usene yäšäyinši.
P̣uri izi bavoġoy ṭo͑ġo͑l, elmux tadi ṭe dünyäne taġaṭanal izi yäšä č̣ovaḳesṭi, iz pul boše taci.
Izi ġarmoġon, Isaaḳen q̇a Ismailen, šoṭo tašeri Mamreni mä͑xluġa ə͑śa, Maxṗela uḳala maġarina oćalaxṭunbi. Me maġara bakala q̇oruġ süfṭä xeṭlu Coxari ġar Efroniney,
Avrahamen šoṭo xeṭluġoxun tängä tadi haneq̇ey. Šoṭo ečeri miya izi čuux Saray ṭo͑ġo͑lṭun oćalaxṗi. *
Avraham ṗuriṭuxun oša Buxaʒ́uġon šoṭay ġar Isaaḳa xeyir- bäräkäte tadi. Isaaḳ isä Beer-Laxay-Roinane baksay.
Moval Ismailaxun, Avrahameynaḳ Saray misirlu čuux-nökär Aǯaren ečeri ġaraxun bakiṭoǧoy siyäyi.
Kalaṭuxun burqi mic̣iḳṭul ciriḳ Ismaili ġarmux metäre taysay: Ismaili süfṭin ġar Nevayot, oša Ḳedar, Adbeel, Mivsam,
Mišma, Duma, Massa,
Xadad, Tema, Yetur, Nafiš saal Ḳedma.
Mo Ismailaxun baki ġarmoġoy q̇a ošal ičoġoxun ämälä hari tayfoǧoy c̣iyurxoney. Me ṗac̣c̣e ġaraxun töräyinšakiṭoġoy mandala ayizmux q̇a ičoġoy čadərxo laxi čurḳala ganxoval ičoġoy bavoġoy c̣iyene taysay.
Ismailen iz pula q̇ič̣ṗi ṭe dünyäne, izi bavoġoy ṭo͑ġo͑l taġaṭan düz sabać otuz vu͑ġ yäšṭäney.
Šoṭoxun töräyinšakiṭoġoy bakala ganxoval Xavilaxun burqi Misiri oćalxo burqeġala ganu ə͑śa, Aššura taġala yaq̇e loxol bakala Šural ciriḳ tanesay. Morox bito izi ṗac̣c̣e ġaraxun ämälä hariyoroxey, bitoval suna ə͑śane baksay. Ama ṗurumal, sa ġaraxun baki tayfa ṭe soġo ġaraxun baki tayfinaxun yaq̇ax tene taysay.
Isääl Avrahami ġar Isaaḳaxun bakiṭoġoxun exlätṗen.
Isaaḳi q̇ərx yäš bakaṭan šoṭin Rebeḳane haq̇i. Rebeḳa P̣addan-Aramaxuney, izi bava aramlu Beṭuel, izi vičiyal aramlu Lavaney.
Rebeḳa äylä tene mansṭay, Isaaḳenal Q̣ONƷ́UĠO afərəpi xoyinśebsay ki, izi čuġoy äyelq̇an baki. Q̣ONƷ́UĠON šoṭay afərəġo inebaki, Rebeḳal hari äyläne mandi.
Rebeḳay tapane bakala äyloġon suna täpiläyinšbsa burqaṭan šoṭin Q̣ONƷ́UĠOXUN "mo ḳä upsune baki" pi xavare haq̇i,
Q̣ONƷ́UĠONAL šoṭo metäre pi: "P̣ä͑ äyelen tarasṭa hun vi boš, ṗä͑ azuḳ töräyinšakale vi tapane bakalṭoġoxun. Me dünyäne eġala ġinaxun ǯöybakalṭun šorox, soġo hämišä ṭe sunṭuxun zorba bakale, kaloval mic̣iḳṭay äyiten taġala bakale". *
Äyel bakala vädä hari ṗaneṗi, Rebeḳanal äkiz ġarmuxe ečeri.
Süfṭä baki äylin iräng ć̣aṗ-ć̣oć̣aney, izi bädäni loxolal ṭema pope buy ki, unḳon heyvani balaney. Šoṭay c̣iya Esavṭun * laxi.
Me äylin bać̣anexunal hari ṗä͑mǯiyone baki, šo bakaṭan Esavi dabanaxun biq̇ine č̣erey, šoṭay c̣iyal ečeri Iaḳovṭun * laxi. Me äylux nanaxun bakaṭan Isaaḳi altməš yäše buy.
Äylux hari kalaṭunbaki. Esav šaaṭ o͑xä͑lbale baki, šo ḳoya tene bä͑ġä͑yesay, pes banekon dim čölmoġoney. Iaḳov isä šiṗey, šo ḳožin äyeley.
Isaaḳen čölnä heyvani yeq̇ čureġaley pi Esav iz üḳe gele basksay, Rebeḳay piin išiġ isä Iaḳovey.
Sa ġi Iaḳoven märǯin xoraye boxsay, hame vädine Esaval čölexun mandaḳ ḳoyane hari.
Šoṭin Iaḳova pine: "Usum baka ke vi boxala ć̣oć̣a xorayaxun bapa tada, busa bisazu!" Moṭo göräṭun Esavi c̣iya hamal Edom * nexey.
Iaḳoven isä metäre pi: "Upa ki, meyin oša ḳožin kala ġar baksuni haq̇q̇a vaz tasṭa, zuval tadaz".
Esavenal qaybaki "busa bisazu miya, kala ġar baksuni haq̇q̇e aḳesa häysä bez piyes" pine.
Ṭe vädä Iaḳoven metäre pi: "Elasṗa, oša!" Esavenal elasṗi äyite tadi ki, ḳožin kala ġar baksuni haq̇q̇a Iaḳovane tasṭa.
Esaven metär piṭuxun oša Iaḳoven šoṭo märǯin xorayaxunal bapi tanedi, śumal. Esaven käye, u͑neġi, izi tapana boševḳiyal hayzeri taneci, ḳožin kala ġar baksuni haq̇q̇ isä sal izi eyexal tene bafṭi.
