TITUS
Biblia Udica, Versio Nizhensis: Vetus Testamentum
Part No. 24
Previous part

Chapter: 24 


Avrahamen nökärä yaq̇abi iz ġar Isaaḳeynaḳ xuyär ečesṭun
Avrahamen nökərə yaq'abi iz ğar İsaak'eynak' xuyər eçest'un


Verse: 1  Link to rar   Avraham lap q̇ožabakeney, iziyal här šey buney, šoṭo görä ki, Q̣ONƷ́UĠON šoṭoxun Iz xeyir-bäräkätä kamtenebsay.
   Avraham lap q'ojabakeney, iziyal hər şey buney, şot'o görə ki, Q'ONČUĞON şot'oxun İz xeyir-bərəkətə kamtenebsay.

Verse: 2  Link to rar   Sa ġi Avrahamen izi bito äšurxo tašala nökärä iz ṭo͑ġo͑l ḳalpi pine: "Vi tadala äyiti loxol čurpsuna aḳesṭeynaḳ vi kula bez č̣ile loxol laxi
   Sa ği Avrahamen izi bito əşurxo taşala nökərə iz t'ǒğǒl k'alpi pine: «Vi tadala əyiti loxol çurpsuna ak'est'eynak' vi kula bez c'ile loxol laxi

Verse: 3  Link to rar   göye q̇a oćali Buxaʒ́ux bakala Q̣ONƷ́UĠO elasṗa ki, bezi ġareynaḳ beši häysä bakala ganuxun xuyär ten haq̇al, šoṭaynaḳ me känanluġoy xuyärmoġoxun ešṭun tez čuresa.
   göye q'a oç̌ali Buxačux bakala Q'ONČUĞO elasp'a ki, bezi ğareynak' beşi həysə bakala ganuxun xuyər ten haq'al, şot'aynak' me kənanluğoy xuyərmoğoxun eşt'un tez çuresa.

Verse: 4  Link to rar   Bezi č̣eri ganu, bezi q̇oomxoy ṭo͑ġo͑l taci ṭeṭiin xuyär bä͑ġä͑bi ečalnu bezi Isaaḳeynaḳ".
   Bezi c'eri ganu, bezi q'oomxoy t'ǒğǒl taśi t'et'iin xuyər bə̌ğə̌bi eçalnu bezi İsaak'eynak'».

Verse: 5  Link to rar   Nökären Avrahama pine: "P̣oy xuyär miya eysun nu čureġayin hetär bakale? Yaq̇abaz vi ġaral taci ṭiya, vi č̣eri ganuq̇an baki?"
   Nökəren Avrahama pine: «P'oy xuyər miya eysun nu çureğayin hetər bakale? Yaq'abaz vi ğaral taśi t'iya, vi c'eri ganuq'an baki?»

Verse: 6  Link to rar   Avrahamen qaybaki metäre pi: "Sal sa vädä!
   Avrahamen qaybaki metəre pi: «Sal sa vədə!

Verse: 7  Link to rar   Za bezi bavay ḳoyaxun, bezi nanaxun baki oćalaxun č̣evḳi göye Buxaʒ́ux bakala Q̣ONƷ́UĠON Ičin vi yaq̇a qayḳale. "Vaxun bakiṭoġo mandale me oćal" pi za äyit tadiyone Šo, vaxun be͑ś Izi angela yaq̇abi vi äšlä suuḳbale Šoṭin, hunal bezi ġareynaḳ xuyär bä͑ġä͑bi ečalnu.
   Za bezi bavay k'oyaxun, bezi nanaxun baki oç̌alaxun c'evk'i göye Buxačux bakala Q'ONČUĞON İçin vi yaq'a qayk'ale. "Vaxun bakit'oğo mandale me oç̌al" pi za əyit tadiyone Şo, vaxun běš İzi angela yaq'abi vi əşlə suuk'bale Şot'in, hunal bezi ğareynak' xuyər bə̌ğə̌bi eçalnu.

Verse: 8  Link to rar   Äše, xuyär ič va gärbaki miya eysun nu čureġayin, mo vi taxsər tene, zaxun "vi tadi äyiti loxol ten čurpi" äyit ten ibakal. Ama ḳä bakale bakeq̇an, bezi ġara ṭe oćala taysa ma barta!"
   Əşe, xuyər iç va gərbaki miya eysun nu çureğayin, mo vi taxsır tene, zaxun "vi tadi əyiti loxol ten çurpi" əyit ten ibakal. Ama k'ə bakale bakeq'an, bezi ğara t'e oç̌ala taysa ma barta!»

Verse: 9  Link to rar   Nökärenal iz kula Avrahami č̣ile loxol laxi elasepi ki, bitova šoṭay pi ḳinäḳ bale.
   Nökərenal iz kula Avrahami c'ile loxol laxi elasepi ki, bitova şot'ay pi k'inək' bale.

Verse: 10  Link to rar   Hametär, nökären iz aġaxun vic̣ buš exṭi ḳä šaaṭ payur bunesa šoṭoġoy loxol laxi yükläyinšiṭuxun oša Aram-Naharayima yaq̇anebafṭi. Avrahami viči Naxori yäšäyinšala šähär ṭeṭiyaney.
   Hametər, nökəren iz ağaxun vis' buş ext'i k'ə şaat' payur bunesa şot'oğoy loxol laxi yükləyinşit'uxun oşa Aram-Naharayima yaq'anebaft'i. Avrahami viçi Naxori yəşəyinşala şəhər t'et'iyaney.

Verse: 11  Link to rar   Šo hari šähäre baġala gala ṗaṗaṭan biyäsćoney. Be͑neġi xuyärmoġon hari xe tašala vädäne, bureqi izi bušurxo efi miya bakala kärizäxun xe u͑ġesṭa.
   Şo hari şəhəre bağala gala p'ap'at'an biyəsç̌oney. Běneği xuyərmoğon hari xe taşala vədəne, bureqi izi buşurxo efi miya bakala kərizəxun xe ǔğest'a.

Verse: 12  Link to rar   Šoṭin afərəpsa burqi pine: "Ay Q̣ONƷ́UX, ay bezi aġa Avrahami Buxaʒ́ux, ġe bezi äšurxo Hun yönä bada, bezi aġa Avrahamaxun Vi xeyirxaxluġa kammaba.
   Şot'in afırıpsa burqi pine: «Ay Q'ONČUX, ay bezi ağa Avrahami Buxačux, ğe bezi əşurxo Hun yönə bada, bezi ağa Avrahamaxun Vi xeyirxaxluğa kammaba.

Verse: 13  Link to rar   Mone, čurpezu häysä me kärizi bel, me šähäri xuyärmoġonal hari memiin xeṭun tašṭa.
   Mone, çurpezu həysə me kərizi bel, me şəhəri xuyərmoğonal hari memiin xet'un taşt'a.

Verse: 14  Link to rar   Ṭetär ba ki, zu xuyärmoġoy maṭu "eča vi gamataxun xe u͑ġä͑z" piṭuxun oša za qaybaki "ko mani äyite, häysä vi bušurxoval u͑ġesṭoz" uḳayin, hašoval Vi ḳul Isaaḳeynaḳ č̣äḳṗiyoq̇an baki. Barta mo zaynaḳ sa niśanq̇an baki, ṭe vädä zuval avabakoz ki, Vi sa kul bezi aġay loxole".
   T'etər ba ki, zu xuyərmoğoy mat'u "eça vi gamataxun xe ǔğə̌z" pit'uxun oşa za qaybaki "ko mani əyite, həysə vi buşurxoval ǔğest'oz" uk'ayin, haşoval Vi k'ul İsaak'eynak' c'ək'p'iyoq'an baki. Barta mo zaynak' sa nišanq'an baki, t'e vədə zuval avabakoz ki, Vi sa kul bezi ağay loxole».

Verse: 15  Link to rar   Šoṭin hälä afərəpi tene čarḳey, sa xuyär izi ä͑mnäbel gamat xeneynaḳe hari. Mo Avrahami viči Naxori q̇a izi čuux Milḳay nävä Rebeḳaney, šoṭoġoy Beṭuel uḳala ġare xuyär.
   Şot'in hələ afırıpi tene çark'ey, sa xuyər izi ə̌mnəbel gamat xeneynak'e hari. Mo Avrahami viçi Naxori q'a izi çuux Milk'ay nəvə Rebek'aney, şot'oğoy Bet'uel uk'ala ğare xuyər.

Verse: 16  Link to rar   Xuyär gele gözäl xuyärey, hälä išq̇aral tene tacey. Šoṭin kärizäxun xena buybi qaybaki taġaṭan
   Xuyər gele gözəl xuyərey, hələ işq'aral tene taśey. Şot'in kərizəxun xena buybi qaybaki tağat'an

Verse: 17  Link to rar   Avrahami nökären šoṭay be͑śṭan boṭesṭi pine: "Za vi gamataxun samal xe tades bankon, u͑ġä͑z?"
   Avrahami nökəren şot'ay běšt'an bot'est'i pine: «Za vi gamataxun samal xe tades bankon, ǔğə̌z?»

Verse: 18  Link to rar   Xuyärenal qaybaki "ko mani äyite, bez aġa, exṭa u͑ġä͑" pi iz gamata nökärä tanedi ki, u͑ġeq̇an.
   Xuyərenal qaybaki "ko mani əyite, bez ağa, ext'a ǔğə̌" pi iz gamata nökərə tanedi ki, ǔğeq'an.

Verse: 19  Link to rar   Nökären u͑ġi čarḳiṭuxun oša xuyären pine: "Barta vi bušurxoynaḳal xe ečaz boššamin u͑ġeq̇aṭun".
   Nökəren ǔği çark'it'uxun oşa xuyəren pine: «Barta vi buşurxoynak'al xe eçaz boşşamin ǔğeq'at'un».

Verse: 20  Link to rar   Metär piyal gamati boš mandi xena nä͑ve boš amc̣ibi ṭineṭeri ki, kärizäxun saal xe ečeri baḳale. Hametär, xuyären xe zapi bušurxo bitova u͑ġesedi.
   Metər piyal gamati boş mandi xena nə̌ve boş ams'ibi t'inet'eri ki, kərizəxun saal xe eçeri bak'ale. Hametər, xuyəren xe zapi buşurxo bitova ǔğesedi.

Verse: 21  Link to rar   Nökären isä izi źomoxun äyit tene č̣evksay, izi ṭevärǯä afərəpi čureciṭoġo bala me xuyäri loxol ṭo͑o͑xun be͑ġi, šoṭo hägigiyal Buxaʒ́uġon iz be͑ś č̣evḳi nu č̣evksuna q̇amišaksune čuresay.
   Nökəren isə izi ǰomoxun əyit tene c'evksay, izi t'evərcə afırıpi çureśit'oğo bala me xuyəri loxol t'ǒǒxun běği, şot'o həgigiyal Buxačuğon iz běš c'evk'i nu c'evksuna q'amişaksune çuresay.

Verse: 22  Link to rar   Bušurxon u͑ġi bošiṭuxun oša Avrahami nökären č̣evḳi xuyärä bo͑xmo͑ġo lavḳala toyexlu sa q̇əzəli halq̇a saal ṗä͑ dänä q̇oxlang tadi
   Buşurxon ǔği boşit'uxun oşa Avrahami nökəren c'evk'i xuyərə bǒxmǒğo lavk'ala toyexlu sa q'ızıli halq'a saal p'ə̌ dənə q'oxlang tadi

Verse: 23  Link to rar   pine: "Isä upa be͑yn, hun ši xuyärnu? Vi bavay ḳoya mandala ga bune, yax me üše q̇onaġbes banankon?"
   pine: «İsə upa běyn, hun şi xuyərnu? Vi bavay k'oya mandala ga bune, yax me üşe q'onağbes banankon?»

Verse: 24  Link to rar   Xuyärenal qaybaki "Milḳay q̇a Naxori ġar Beṭueli xuyärzu" pine.
   Xuyərenal qaybaki "Milk'ay q'a Naxori ğar Bet'ueli xuyərzu" pine.

Verse: 25  Link to rar   Oša saal pine: "Yasṭa heyvanxo tadala koloś q̇a yemal gelene, ḳoya vä͑ynaḳ mandala gaal bune".
   Oşa saal pine: «Yast'a heyvanxo tadala kološ q'a yemal gelene, k'oya və̌ynak' mandala gaal bune».

Verse: 26  Link to rar   Me äyitmoġo ibakaṭan Avrahami nökären čökṭi Q̣ONƷ́UĠO šükürebi.
   Me əyitmoğo ibakat'an Avrahami nökəren çökt'i Q'ONČUĞO şükürebi.

Verse: 27  Link to rar   Šoṭin pine: "Bezi aġa Avrahami Buxaʒ́ux bakala Q̣ONƷ́UĠO alxəšq̇anbaki, Izi nu badalbakala čuresuna aḳesṭi qə͑ yaq̇a tene efi Šoṭin bezi aġa! Mone, Q̣ONƷ́UĠON za düz bezi aġay q̇oomxoy ḳoyane ečeri!"
   Şot'in pine: «Bezi ağa Avrahami Buxačux bakala Q'ONČUĞO alxışq'anbaki, İzi nu badalbakala çuresuna ak'est'i qı̌ yaq'a tene efi Şot'in bezi ağa! Mone, Q'ONČUĞON za düz bezi ağay q'oomxoy k'oyane eçeri!»

Verse: 28  Link to rar   Xuyären isä ṭiṭeri me bakiṭoġo bitova izi nana q̇a ḳoya bakala čupuxxo exlätebi.
   Xuyəren isə t'it'eri me bakit'oğo bitova izi nana q'a k'oya bakala çupuxxo exlətebi.

Verse: 29  Link to rar   Rebeḳay sa vičiyal buney, iz c̣i Lavan. Šo č̣eri ṭisṭun kärizi bel čurpi me amdari ṭo͑ġo͑le taci.
   Rebek'ay sa viçiyal buney, iz s'i Lavan. Şo c'eri t'ist'un kərizi bel çurpi me amdari t'ǒğǒle taśi.

Verse: 30  Link to rar   Šoṭin Rebeḳay bo͑xmo͑ġo lavḳi halq̇ina q̇a ä͑mel lavḳi q̇oxlangxo aḳi Rebeḳaxun bakiṭoġo bitova avabakaṭan taci ṭe amdara aksune čureci. Taciyal be͑neġi ki, amdar Rebeḳan pi gala, kärizi bel iz bušurxoy ṭo͑ġo͑l čurpene.
   Şot'in Rebek'ay bǒxmǒğo lavk'i halq'ina q'a ə̌mel lavk'i q'oxlangxo ak'i Rebek'axun bakit'oğo bitova avabakat'an taśi t'e amdara aksune çureśi. Taśiyal běneği ki, amdar Rebek'an pi gala, kərizi bel iz buşurxoy t'ǒğǒl çurpene.

Verse: 31  Link to rar   Lavanen ə͑śalayinšaki pine: "Ay Q̣ONƷ́UĠON xeyir-bäräkät tadi amdar, miya heṭu görän čurpe? Eki q̇onaġbaz va, vi mandala ganuval häzirbez, vi heyvanxo efala ganuval".
   Lavanen ı̌šalayinşaki pine: «Ay Q'ONČUĞON xeyir-bərəkət tadi amdar, miya het'u görən çurpe? Eki q'onağbaz va, vi mandala ganuval həzirbez, vi heyvanxo efala ganuval».

Verse: 32  Link to rar   Hametär, Lavanen amdara haq̇i hare ḳoya. Ečeri bušurxoy loxol bakala yükä amc̣ibi ičoġoy be͑ś koloś q̇a yeme cipi, oša q̇onaġxoynaḳ xeyal enečeri ki, ičoġoy turmoġoq̇aṭun oc̣ḳi.
   Hametər, Lavanen amdara haq'i hare k'oya. Eçeri buşurxoy loxol bakala yükə ams'ibi içoğoy běš kološ q'a yeme śipi, oşa q'onağxoynak' xeyal eneçeri ki, içoğoy turmoğoq'at'un os'k'i.

Verse: 33  Link to rar   Ečeri śum laxala vädine Avrahami nökären pine: "Bezi miya eysuni c̣iya nu uḳayiz, śum tez boṭal". Lavanenal qaybaki "upa" pine.
   Eçeri šum laxala vədine Avrahami nökəren pine: «Bezi miya eysuni s'iya nu uk'ayiz, šum tez bot'al». Lavanenal qaybaki "upa" pine.

Verse: 34  Link to rar   Nökären exlätpsa burqi pine: "Za Avrahamene yaq̇abe, šoṭay nökärzu.
   Nökəren exlətpsa burqi pine: «Za Avrahamene yaq'abe, şot'ay nökərzu.

Verse: 35  Link to rar   Bezi aġay här šey buṭux, Q̣ONƷ́UĠON šoṭoxun Izi xeyir-bäräkätä kamtenebi. Eġelxo, beliyox, q̇əzəl- gümüš, čuux nökärxo q̇a išq̇ar nökärxo, bušurxo q̇a elemxo -- moṭoġo bitova iz belxun oq̇a baramine tadi Q̣ONƷ́UĠON bez aġa.
   Bezi ağay hər şey but'ux, Q'ONČUĞON şot'oxun İzi xeyir-bərəkətə kamtenebi. Eğelxo, beliyox, q'ızıl- gümüş, çuux nökərxo q'a işq'ar nökərxo, buşurxo q'a elemxo -- mot'oğo bitova iz belxun oq'a baramine tadi Q'ONČUĞON bez ağa.

Verse: 36  Link to rar   Iz čuux Saran izi q̇ožabaki vädine bezi aġaynaḳ sa ġaral enečeri, aġanal pine ki, bezi ḳä bunesa bito me ġareq̇an baki.
   İz çuux Saran izi q'ojabaki vədine bezi ağaynak' sa ğaral eneçeri, ağanal pine ki, bezi k'ə bunesa bito me ğareq'an baki.

Verse: 37  Link to rar   Isääl mone, bezi aġan za elasṗesṭi äyite tadesṭi ki, izi ġareynaḳ ičoġoy bakala ganuxun, yäni känanluġoxun xuyär tez haq̇al.
   İsəəl mone, bezi ağan za elasp'est'i əyite tadest'i ki, izi ğareynak' içoğoy bakala ganuxun, yəni kənanluğoxun xuyər tez haq'al.

Verse: 38  Link to rar   Za tapšurebi ki, hari memiin, izi q̇oomxo bakala ganuxun izi ġareynaḳ xuyär ečaz.
   Za tapşurebi ki, hari memiin, izi q'oomxo bakala ganuxun izi ğareynak' xuyər eçaz.

Verse: 39  Link to rar   Bezi aġaxun xavarez haq̇i ki, ṗoy xuyär zaxun eysun nu čureġayin ḳä baz.
   Bezi ağaxun xavarez haq'i ki, p'oy xuyər zaxun eysun nu çureğayin k'ə baz.

Verse: 40  Link to rar   Za qaybaki pine: "Bezi čalxala, bezi hämišä Izi laxi yaq̇en taġala Q̣ONƷ́UĠON Ičin vi yaq̇a qayḳale, vaxun be͑ś Izi angela yaq̇abi vi äšlä suuḳbale, hunal bezi q̇oomxoy, bezi ṗiyaxun bakalṭoġoy bošṭan xuyär bä͑ġä͑bi ečalnu bez ġareynaḳ.
   Za qaybaki pine: "Bezi çalxala, bezi həmişə İzi laxi yaq'en tağala Q'ONČUĞON İçin vi yaq'a qayk'ale, vaxun běš İzi angela yaq'abi vi əşlə suuk'bale, hunal bezi q'oomxoy, bezi p'iyaxun bakalt'oğoy boşt'an xuyər bə̌ğə̌bi eçalnu bez ğareynak'.

Verse: 41  Link to rar   Ama äše, xuyärä va nu tadayṭun, č̣eki eki. Avabakoz ki, hun vi tadi äyiti loxol čurpi bezi q̇oomxoy ćomol ciriḳ tacenu, ene ṭeṭiin taġayal vi taxsər tene".
   Ama əşe, xuyərə va nu tadayt'un, c'eki eki. Avabakoz ki, hun vi tadi əyiti loxol çurpi bezi q'oomxoy ç̌omol śirik' taśenu, ene t'et'iin tağayal vi taxsır tene".

Verse: 42  Link to rar   Zuval ġe hari efi kärizi ṭo͑ġo͑l ṗaṗaṭan afərəpi metärez pi: "Ay bezi aġa Avrahami Buxaʒ́ux bakala Q̣ONƷ́UX, bezi äšlä Hun yönä bada!
   Zuval ğe hari efi kərizi t'ǒğǒl p'ap'at'an afırıpi metərez pi: "Ay bezi ağa Avrahami Buxačux bakala Q'ONČUX, bezi əşlə Hun yönə bada!

Verse: 43  Link to rar   Mone, čurpezu häysä me kärizi bel. Ṭetär ba ki, häysä hari memiin xe tašala xuyärmoġoy maṭu <eča vi gamataxun xe u͑ġä͑z>
   Mone, çurpezu həysə me kərizi bel. T'etər ba ki, həysə hari memiin xe taşala xuyərmoğoy mat'u <eça vi gamataxun xe ǔğə̌z>

Verse: 44  Link to rar   piṭuxun oša za qaybaki <ko mani äyite, häysä vi bušurxoval u͑ġesṭoz> uḳayin, hašoval Vi bezi aġay ġareynaḳ č̣äḳṗiyoq̇an baki".
   pit'uxun oşa za qaybaki <ko mani əyite, həysə vi buşurxoval ǔğest'oz> uk'ayin, haşoval Vi bezi ağay ğareynak' c'ək'p'iyoq'an baki".

Verse: 45  Link to rar   Hälä hametär fikirbala gala, be͑zġi Rebeḳa iz ä͑mnäbel gamat enesa. Šoṭin ciri kärizäxun xena buybi qaybakaṭan pizu: "Banekon vi gamataxun xe u͑ġä͑z?"
   Hələ hametər fikirbala gala, bězği Rebek'a iz ə̌mnəbel gamat enesa. Şot'in śiri kərizəxun xena buybi qaybakat'an pizu: "Banekon vi gamataxun xe ǔğə̌z?"

Verse: 46  Link to rar   Za haṭe däyġa gamata boxodi, qaybakiyal metäre pi: "Ko mani äyite, barta vi bušurxoynaḳal xe ečaz u͑ġeq̇aṭun". Hametär, zuval u͑zġi, oša ečeri bezi bušurxoval u͑ġesedi.
   Za hat'e dəyğa gamata boxodi, qaybakiyal metəre pi: "Ko mani əyite, barta vi buşurxoynak'al xe eçaz ǔğeq'at'un". Hametər, zuval ǔzği, oşa eçeri bezi buşurxoval ǔğesedi.

Verse: 47  Link to rar   Oša ičuxun xavarez haq̇i ki, hun ši xuyärnu, qaybakiyal pine: "Naxori q̇a Milḳay ġar Beṭueli xuyär". Zuval ečeri izi bo͑xmo͑ġo halq̇ina, izi kiyel q̇oxlangxo lavḳiṭuxun oša
   Oşa içuxun xavarez haq'i ki, hun şi xuyərnu, qaybakiyal pine: "Naxori q'a Milk'ay ğar Bet'ueli xuyər". Zuval eçeri izi bǒxmǒğo halq'ina, izi kiyel q'oxlangxo lavk'it'uxun oşa

Verse: 48  Link to rar   ćooq̇a biti bezi aġa Avrahami Buxaʒ́ux bakala Q̣ONƷ́UĠO alxəšezbi. Bezi yaq̇a qaypi za düz bezi aġay vičey ćomo ečeriyone Šo, ečerene ki, aġay vičey nävä izi ġareynaḳ haq̇az.
   ç̌ooq'a biti bezi ağa Avrahami Buxačux bakala Q'ONČUĞO alxışezbi. Bezi yaq'a qaypi za düz bezi ağay viçey ç̌omo eçeriyone Şo, eçerene ki, ağay viçey nəvə izi ğareynak' haq'az.

Verse: 49  Link to rar   Isä vä͑n upanan, bezi aġay niyätä izi boš nu efi me xeyir äšlin bul biq̇suna ä͑m zaṗnanne tää? Efi axərənǯi äyitä upanan ki, zuval bezi äšlä avabakaz".
   İsə və̌n upanan, bezi ağay niyətə izi boş nu efi me xeyir əşlin bul biq'suna ə̌m zap'nanne təə? Efi axırınci əyitə upanan ki, zuval bezi əşlə avabakaz».

Verse: 50  Link to rar   Lavanen q̇a Beṭuelen metärṭun ǯoġab tadi: "Q̣ONƷ́UĠON Ičin me äšlä ä͑m zapenesa, yax äyit tene kofsṭa!
   Lavanen q'a Bet'uelen metərt'un coğab tadi: «Q'ONČUĞON İçin me əşlə ə̌m zapenesa, yax əyit tene kofst'a!

Verse: 51  Link to rar   Mo Rebeḳa, mo hun -- exṭa taki! Barta Q̣ONƷ́UĠOY čureġaloq̇an baki, taša vi aġay ġareynaḳ čuuxq̇an baki".
   Mo Rebek'a, mo hun -- ext'a taki! Barta Q'ONČUĞOY çureğaloq'an baki, taşa vi ağay ğareynak' çuuxq'an baki».

Verse: 52  Link to rar   Šoṭoġon metär uḳaṭan Avrahami nökären oćala ṗaṗamin ḳoc̣ṗaki Q̣ONƷ́UĠO šükürebi.
   Şot'oğon metər uk'at'an Avrahami nökəren oç̌ala p'ap'amin k'os'p'aki Q'ONČUĞO şükürebi.

Verse: 53  Link to rar   Oša izi ečeri payurxo č̣evḳi Rebeḳa q̇əzəl-gümüš q̇a ǯürbäǯür paltarxone tadi. Šoṭin Rebeḳay vičeynaḳ q̇a nanaynaḳal toyexlu payurxone ečerey.
   Oşa izi eçeri payurxo c'evk'i Rebek'a q'ızıl-gümüş q'a cürbəcür paltarxone tadi. Şot'in Rebek'ay viçeynak' q'a nanaynak'al toyexlu payurxone eçerey.

Verse: 54  Link to rar   Hametär, Avrahami nökären izi eysuni c̣iya pi Lavani q̇a Beṭueli fikiräl avabakiṭuxun oša arci ičinal, ičuxun hari amdarxonal käyi-u͑ṭunġi, üšeyal hamiya manṭundi.
   Hametər, Avrahami nökəren izi eysuni s'iya pi Lavani q'a Bet'ueli fikirəl avabakit'uxun oşa arśi içinal, içuxun hari amdarxonal kəyi-ǔt'unği, üşeyal hamiya mant'undi.
   Äyč̣indäri savaxṭan nökären pine: "Isä iǯaza tadaynan qaybaki bezi aġay ṭo͑ġo͑lez taġon".
   Əyc'indəri savaxt'an nökəren pine: «İsə icaza tadaynan qaybaki bezi ağay t'ǒğǒlez tağon».

Verse: 55  Link to rar   Metär ukaṭan Rebeḳay vičen q̇a nanan xuyärä tärbsun nu čureci piṭun: "Barta beš xuyär sa vic̣ ġiyal beši ṭo͑ġo͑l bakeq̇an, oša tananġon".
   Metər ukat'an Rebek'ay viçen q'a nanan xuyərə tərbsun nu çureśi pit'un: «Barta beş xuyər sa vis' ğiyal beşi t'ǒğǒl bakeq'an, oşa tananğon».

Verse: 56  Link to rar   Ama Avrahami nökären qaybaki metäre pi: "Isä ki Q̣ONƷ́UĠON Ičin me äšlä yönä badene, boxoypsuni määnä tene bu. Za yaq̇abadanan taġaz bezi aġay ṭo͑ġo͑l".
   Ama Avrahami nökəren qaybaki metəre pi: «İsə ki Q'ONČUĞON İçin me əşlə yönə badene, boxoypsuni məənə tene bu. Za yaq'abadanan tağaz bezi ağay t'ǒğǒl».

Verse: 57  Link to rar   Ṭe vädä piṭun: "Ekinan Rebeḳaxun ičuxun xavar haq̇en, šoṭin ḳä uḳayin šoq̇an baki".
   T'e vədə pit'un: «Ekinan Rebek'axun içuxun xavar haq'en, şot'in k'ə uk'ayin şoq'an baki».

Verse: 58  Link to rar   Rebeḳa ḳalṭunpi, šoṭinal ičuxun "me amdaraxun tansa?" pi xavar haq̇aṭan qaybaki pine: "Hoo, tazsa".
   Rebek'a k'alt'unpi, şot'inal içuxun "me amdaraxun tansa?" pi xavar haq'at'an qaybaki pine: «Hoo, tazsa».

Verse: 59  Link to rar   Hametär, Rebeḳa Avrahami nökärä q̇a šoṭoxun hari amdarxo gärbi yaq̇abadalaṭun baki. Rebeḳay ṭo͑ġo͑l iču muć̣anaq̇ tadi kalabi nökäräl buney.
   Hametər, Rebek'a Avrahami nökərə q'a şot'oxun hari amdarxo gərbi yaq'abadalat'un baki. Rebek'ay t'ǒğǒl içu muč'anaq' tadi kalabi nökərəl buney.

Verse: 60  Link to rar   Rebeḳa me äyitmoġon xeyir-bäräkät tadiṭun yaq̇abadi: "Ay xunči, barta vaxun bakiṭoġoy say hazarxon, vic̣ hazarxonq̇an baki! Barta vi äyloġon düšmänxoy šähärmoġo baġala darvazoġo ćaxćuxṗiq̇aṭun č̣ovaki!"
   Rebek'a me əyitmoğon xeyir-bərəkət tadit'un yaq'abadi: «Ay xunçi, barta vaxun bakit'oğoy say hazarxon, vis' hazarxonq'an baki! Barta vi əyloğon düşmənxoy şəhərmoğo bağala darvazoğo ç̌axç̌uxp'iq'at'un c'ovaki!»

Verse: 61  Link to rar   Rebeḳa q̇a izi čuux-nökärxoval bušurxoy loxol arci Avrahami nökäri bać̣anexun taṭunci. Hametär, nökären Rebeḳa exṭi yaq̇anebafṭi.
   Rebek'a q'a izi çuux-nökərxoval buşurxoy loxol arśi Avrahami nökəri bač'anexun tat'unśi. Hametər, nökəren Rebek'a ext'i yaq'anebaft'i.


Isaaḳen Rebeḳa haq̇sun
İsaak'en Rebek'a haq'sun


Verse: 62  Link to rar   Isaaḳ isä sa heq̇ädär vädäney ki, Beer-Laxay-Roina navadaney. Avrahami nökär q̇a Rebeḳa hari ṗaṗala vädine, šo Negev amc̣i oćala täzäne qaybakey,
   İsaak' isə sa heq'ədər vədəney ki, Beer-Laxay-Roina navadaney. Avrahami nökər q'a Rebek'a hari p'ap'ala vədine, şo Negev ams'i oç̌ala təzəne qaybakey,

Verse: 63  Link to rar   biyäsćoyeyal čöle č̣eri "samal taraḳaz" uḳaṭan, be͑neġi mone, ä͑xiläxun bušurxone eysa!
   biyəsç̌oyeyal çöle c'eri "samal tarak'az" uk'at'an, běneği mone, ə̌xiləxun buşurxone eysa!

Verse: 64  Link to rar   Rebeḳan ičinal Isaaḳa aneḳi, šo buše loxolxun ciri
   Rebek'an içinal İsaak'a anek'i, şo buşe loxolxun śiri

Verse: 65  Link to rar   nökäräxun xavare haq̇i: "Me beši be͑ś eġalo šuva?" Nökärenal qaybaki "bezi aġane" pine. Moṭo ibakala ḳinäḳ Rebeḳan čalmina exṭi izi ćoya buṭeḳi.
   nökərəxun xavare haq'i: «Me beşi běš eğalo şuva?» Nökərenal qaybaki "bezi ağane" pine. Mot'o ibakala k'inək' Rebek'an çalmina ext'i izi ç̌oya but'ek'i.

Verse: 66  Link to rar   Oša nökären bakiṭoġo bitova Isaaḳa exlätebi,
   Oşa nökəren bakit'oğo bitova İsaak'a exlətebi,

Verse: 67  Link to rar   Isaaḳenal Rebeḳa exṭi iz nana Saray čadərane tašeri. Rebeḳa šoṭay čuuxe baki, šo Isaaḳi üḳe gelene basḳi. Metärluġen, izi nana ṗuriṭuxun oša Isaaḳi ćoyen axśumpsane burqi.
   İsaak'enal Rebek'a ext'i iz nana Saray çadırane taşeri. Rebek'a şot'ay çuuxe baki, şo İsaak'i ük'e gelene bask'i. Metərluğen, izi nana p'urit'uxun oşa İsaak'i ç̌oyen axšumpsane burqi.
Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.