TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 23

Chapter: 23

Saray bisun q̇a Avrahami šoṭo oćalaxpseynaḳ ḳul haq̇sun
Saray bisun q'a Avrahami şot'o oç̌alaxpseynak' k'ul haq'sun

Verse: 1

Saray sabać saq̇o vu͑ġ usen ömüre baki.
Saray sabaç̌ saq'o vǔğ usen ömüre baki.

Verse: 2

Šo Känan oćali Giryaṭ-Arbina, häysä beši Xevron uḳala šähäre ṗure, Avrahamenal hari Saray loxol muzin o͑nepi neġe cipi.
Şo Kənan oç̌ali Giryat'-Arbina, həysə beşi Xevron uk'ala şəhəre p'ure, Avrahamenal hari Saray loxol muzin ǒnepi neğe śipi.

Verse: 3

Oša meyidi ṭo͑o͑xun hayzeri taci xeṭluġo metäre pi:
Oşa meyidi t'ǒǒxun hayzeri taśi xet'luğo metəre pi:

Verse: 4

"Düze, efi ḳulnuz yäšäyinšbsa, ama avanan ki, zu miyalu tezu. Za tänginen sa ga tadanan, tašeri bezi ṗurina oćalaxṗaz".
«Düze, efi k'ulnuz yəşəyinşbsa, ama avanan ki, zu miyalu tezu. Za tənginen sa ga tadanan, taşeri bezi p'urina oç̌alaxp'az».

Verse: 5

Xeṭluġonal Avrahama piṭun:
Xet'luğonal Avrahama pit'un:

Verse: 6

"Ko mani exläte, aġa, hun mic̣iḳ amdar tenu ki! Beši gärämzäluġxo än šaaṭ ga manunesa, taša vi čuġo ṭiya oćalaxṗa. Šuḳḳalen va tene uḳon ki, vi ṗurineynaḳ miya ga tene bu".
«Ko mani exləte, ağa, hun mis'ik' amdar tenu ki! Beşi gərəmzəluğxo ən şaat' ga manunesa, taşa vi çuğo t'iya oç̌alaxp'a. Şuk'k'alen va tene uk'on ki, vi p'urineynak' miya ga tene bu».

Verse: 7

Ṭe oćala yäšäyinšala xeṭluġon metär uḳaṭan Avrahamen hayzeri izi šoṭoġoxun heq̇ädär iräzi baksuna aḳesṭi bule ḳoc̣ṗi.
T'e oç̌ala yəşəyinşala xet'luğon metər uk'at'an Avrahamen hayzeri izi şot'oğoxun heq'ədər irəzi baksuna ak'est'i bule k'os'p'i.

Verse: 8

Oša pine: "Isä ki bezi ṗurina efi ḳulnu oćalaxpsuna hiḳḳal tenan nex, vä͑x sa äyitäl uḳaz: Coxari ġar Efrona upanan
Oşa pine: «İsə ki bezi p'urina efi k'ulnu oç̌alaxpsuna hik'k'al tenan nex, və̌x sa əyitəl uk'az: Śoxari ğar Efrona upanan

Verse: 9

izi q̇oruġi ṭe bel bakala Maxṗela maġarina zaq̇an toydi. Izi toy ḳänesa peq̇an, šoṭo ef piin be͑ś tängä tadi haq̇oz ki, beziyal efi ḳulnu ṗuriġo oćalaxpseynaḳ gaq̇an baki".
izi q'oruği t'e bel bakala Maxp'ela mağarina zaq'an toydi. İzi toy k'ənesa peq'an, şot'o ef piin běš təngə tadi haq'oz ki, beziyal efi k'ulnu p'uriğo oç̌alaxpseynak' gaq'an baki».

Verse: 10

Xeṭlu Efron iz amdarxoy boš arceney. Šoṭin šähäre baġala darvazin be͑ś gireci ǯamaati ṭo͑ġo͑l Avrahama qay pine:
Xet'lu Efron iz amdarxoy boş arśeney. Şot'in şəhəre bağala darvazin běš gireśi camaati t'ǒğǒl Avrahama qay pine:

Verse: 11

"Hun pinu zu izbaki, bez aġa, isä u͑mu͑xlaxa zu ḳäz nex! Barta moṭo miya gireci bezi azuḳenal ibakeq̇an, zu ṭe oćalal, ṭe oćali boš bakala maġarinal va payez tasṭa. Ṭe ga ene ṗä͑bulla vine baki, taša vi ṗurina ṭiya oćalaxṗa".
«Hun pinu zu izbaki, bez ağa, isə ǔmǔxlaxa zu k'əz nex! Barta mot'o miya gireśi bezi azuk'enal ibakeq'an, zu t'e oç̌alal, t'e oç̌ali boş bakala mağarinal va payez tast'a. T'e ga ene p'ə̌bulla vine baki, taşa vi p'urina t'iya oç̌alaxp'a».

Verse: 12

Avrahamen xeṭluġoxun heq̇ädär iräzi baksuna aḳesṭi ṗurumal bule ḳoc̣ṗi.
Avrahamen xet'luğoxun heq'ədər irəzi baksuna ak'est'i p'urumal bule k'os'p'i.

Verse: 13

Oša ṭiya gireciṭoġoy be͑ś Efrona qaybaki metäre pi: "Eki bezi äyitä oq̇a ma saka, oćali toy ḳänesa upa, zuval bez tänginä tadi haq̇az vaxun bezi ṗurina oćalaxṗala ṭe ganu".
Oşa t'iya gireśit'oğoy běš Efrona qaybaki metəre pi: «Eki bezi əyitə oq'a ma saka, oç̌ali toy k'ənesa upa, zuval bez tənginə tadi haq'az vaxun bezi p'urina oç̌alaxp'ala t'e ganu».

Verse: 14

Ṭe vädä Efronen Avrahama metäre pi:
T'e vədə Efronen Avrahama metəre pi:

Verse: 15

"Ḳäz nex ki? Barta vi uḳaloq̇an baki! Me oćalen biṗbać gümüši tängäne bsa, mo ṭetär sa tängä tene ki, moṭo görä vi q̇a bezi arane exlät bakane. Isä taša oćalaxṗa vi ṗurina!"
«K'əz nex ki? Barta vi uk'aloq'an baki! Me oç̌alen bip'baç̌ gümüşi təngəne bsa, mo t'etər sa təngə tene ki, mot'o görə vi q'a bezi arane exlət bakane. İsə taşa oç̌alaxp'a vi p'urina!»

Verse: 16

Avrahamenal Efronen gireciṭoġoy piin be͑ś pi toya iräzibaki, č̣evḳi biṗbać gümüši tänginä ičoġoy haq̇i toydalxon ayzaṗḳala źe͑nen ayzapi tanedi.
Avrahamenal Efronen gireśit'oğoy piin běš pi toya irəzibaki, c'evk'i bip'baç̌ gümüşi tənginə içoğoy haq'i toydalxon ayzap'k'ala ǰěnen ayzapi tanedi.

Verse: 17

Hametär, Mamrena ə͑śa, Maxṗela bakala Efroni oćal, iz boš bakala maġarinaxun q̇a xodurxoxun sagala, baneki
Hametər, Mamrena ı̌ša, Maxp'ela bakala Efroni oç̌al, iz boş bakala mağarinaxun q'a xodurxoxun sagala, baneki

Verse: 18

Avrahami. Šähäre baġala darvazin be͑ś gireci xeṭluġonal bitoṭin moṭo ičoġoy piin aṭunḳi.
Avrahami. Şəhəre bağala darvazin běš gireśi xet'luğonal bitot'in mot'o içoğoy piin at'unk'i.

Verse: 19

Moṭoxun oša Avrahamen tašeri iz čuux Sara Maxṗela uḳala ganu bakala maġarina oćalaxebi. Me Maxṗela Känan oćala, Xevroni Mamre uḳala mä͑xluġa ə͑śaney.
Mot'oxun oşa Avrahamen taşeri iz çuux Sara Maxp'ela uk'ala ganu bakala mağarina oç̌alaxebi. Me Maxp'ela Kənan oç̌ala, Xevroni Mamre uk'ala mə̌xluğa ı̌šaney.

Verse: 20

Xeṭluġoy ḳulnu bakala ṭe gaal, ṭe ganu bakala maġaral baneki ṗä͑bulla Avrahami. Avrahamen šoṭo iz ṗuriġo oćalaxpseynaḳ tängä tadi haneq̇ey.
Xet'luğoy k'ulnu bakala t'e gaal, t'e ganu bakala mağaral baneki p'ə̌bulla Avrahami. Avrahamen şot'o iz p'uriğo oç̌alaxpseynak' təngə tadi haneq'ey.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.