Q̣ONƷ́UĠON isä Izi tadi äyiti loxol čurpi Sara eyexun tene č̣evḳi,
Saral bə͑hi baki, düz Buxaʒ́uġon iču pi vädine ene q̇ožabaki Avrahameynaḳ sa ġare ečeri. *
Avrahamen Saraxun baki ġare c̣iya Isaaḳe laxi, *
ečeriyal Buxaʒ́uġon iču ämirbi ḳinäḳ äyel nanaxun bakiṭay muġumǯi ġine šoṭo sünnätebi. *
Isaaḳ nanaxun bakaṭan Avrahami sabać yäše buy.
Saran isä metäre pi: "Bezi ćoyane axśumdi Buxaʒ́uġon, šiin ibakayin mu͑qexun axśumeḳon".
Oša saal pine: "Ši beynene ṗaq̇i Avrahama uḳoy ki, ṗoy Saranal äyel ečeri šoṭo döš ukesṭale? Ama mone, šoṭaynaḳ izi q̇ožabaki vädine ġarez ečeri zu!"
Äyel kalanebaki, šoṭay muć̣anaq̇axun boṭbakala ġineyal Avrahamen kala sa q̇onaxluġe tadi.
Sa ġi Saran be͑neġi ki, Aǯaren Avrahameynaḳ ečeri ġaren Isaaḳi loxol axśumene.
Ṭe vädä šoṭin Avrahama metäre pi: "Me nökärä q̇a izi ečeri ġaral šäṗey č̣eri taceq̇aṭun, yan nu bakiṭuxun oša koṭoxun beši var-dövlätä ǯöybseynaḳ tez ečere zu bez ġara!" *
Ama šoṭoġo ḳoyaxun šäṗesuna Avrahami üḳen tene bsay, šoṭo göräl Saray me äyitmux iču gelene lafṭi, axəri Ismailal izi ġarey.
Buxaʒ́uġon isä Avrahama metäre pi: "Nä äylä görä, nä äylin nana görä narahat ma baka. Hun Saray äyitä be͑ġa, šoṭo görä ki, Isaaḳaxun töräyinšakale va äyit tadeci ṭe näsil. *
Ama Zu vi nökäräxun baki ġaral eyexun tez č̣evḳal, šoṭoxunal kala sa millät töräyinšakale, šoṭo görä ki, šoval vaxune bake".
Äyč̣indäri savaxṭan Avrahamen yaq̇eynaḳ śum laxi, sa tuluġi * boš xeyal bapi biq̇esedi Aǯari kiyel. Oša äyläl iču gärbi č̣eveḳi ḳoyaxun. Aǯaren ičinal tene avay maya taysay, hariyal Beer-Ševa uḳala amc̣i oćala ṗaṗi bureqi miya amc̣i-amc̣i fərəpsa.
Hari izi kiyel bakala xe čarḳaṭan Aǯaren äylä sa topin tume efi,
ičal samal be͑ś, xišṭiḳ bosayin taci ṗaṗala hama taci, arci bureqi o͑nepsa. Šoṭin tene čuresay äylin bisuna izi piin aḳane.
Ama Buxaʒ́uġon äylin o͑nepsuna inebaki, Buxaʒ́uġoy angelenal göynuxun Aǯara ḳalpi pine: "Heṭu görän vi piin neġa c̣ine, Aǯar? Q̣ə͑maba, Buxaʒ́uġon inebaki vi topin tume efi taci äylin o͑nena.
Isä taki alabi šiṗba vi ǧara. Koṭoxun kala sa millät ämälä ečoz Zu!"
Oša Buxaʒ́uġon ṭetäre bi ki, Aǯari pulmux qayeci ṭiya bakala xene kärizä aneḳi, taciyal iz kiyel bakala tuluġa xenen buybi äylä u͑ġesedi.
Hametär, Buxaʒ́uġoy sa kul äylin loxoley. Äyel kalabaki šaaṭ sa o͑xä͑lbale baki, hariyal čölene mandala baki.
Šo Paran uḳala čölene baksay, iz nananal šoṭaynaḳ Misiräxun xuyäre ečeri.
Hame vädämoġo padčaġ Avimeleḳen iz q̇ošuni kalo bakala P̣iḳolal exṭi Avrahami ṭo͑ġo͑le hari. Šoṭin Avrahama pine: "Hun vi kula mani äšlä boxodayin, Buxaʒ́ux vaxune.
Isä Buxaʒ́uġo elasṗi za äyit tada ki, hun nä zaxun, nä bez äyloġoxun, nääl oša šoṭoġoxun ämälä eġalṭoġoxun düšmän ten bakal. Za äyit tada ki, bezi vaynaḳ bi šaaṭluġa eyexun ten č̣evḳal, ečeri va arcesṭi me oćali śuma ten ćaxćuxḳal".
Avrahamenal qaybaki "äyitez tasṭa" pine.
Oša Avrahamen Avimeleḳeynaḳ šoṭay amdarxon iz kiyexun kärizä exsṭunane exlätṗi.
Ama Avimeleḳen metäre pi: "Ke äšlä šine biq̇e tez ava. Hun za hiḳḳal piyaltenuy, zuval häysäz ibaksa me exlätä".
Hametär, Avrahamen taci izi sürüġoy bošṭan eġelxo q̇a beliyoxe ečeri, šoṭoġo Avimeleḳa tadiyal šoṭoxun iräziluġe ġaćeci.
Avrahamen izi ečeri heyvanxoy bošṭan vu͑ġ dänä diši q̇uzina ǯöybi ṭo͑o͑x efeney,
Avimeleḳenal moṭo aḳi xavare haq̇i: "Me vi ǯöybi vu͑ġ q̇uzi heṭaynaḳe?"
Avrahamen pine: "Ke vu͑ġ q̇uzina va ǯöyez tasṭa, barta korox me kärizi bezi baksuna ćoyel č̣evksuni c̣iyenq̇an baki".
Moṭoxun oša ṭe gane c̣iya Beer-Ševaṭun * laxi, šoṭo görä ki, miya ṗrannaṭinal elasṗi suna äyitṭun tadey.
Metärluġen, Beer-Ševina iräziluġ ġaćeciṭuxun oša Avimeleḳ q̇a izi q̇ošuni kalo bakala P̣iḳol qaybaki filisṭluġoy oćalaṭun taci.
Avrahamenal ečeri Beer-Ševina sa ṭamarisḳ uḳala xod biṭi, miya Q̣ONƷ́UĠOY, yäni Hämišä Bakala Buxaʒ́uġoy c̣iya duġi Šoṭo bule ḳoc̣ṗi.
Avraham filisṭluġoy oćala hälä boxoye čurḳala baki.
