TITUS
Biblia Udica, Versio Nizhensis: Vetus Testamentum
Part No. 19
Previous part

Chapter: 19 


Buxaʒ́uġoy Sodoma q̇a Homorra äfčibsun saal Luṭa čarḳesṭun
Buxačuğoy Sodoma q'a Homorra əfçibsun saal Lut'a çark'est'un


Verse: 1  Link to rar   Avrahamen q̇onaġbi ṭe ṗä͑ angel hari Sodoma ṗaṗaṭan ene biyänebaksay. Šähäre baġala darvazin tume arci Luṭen šoṭoġo aḳi, hayzeri be͑śe č̣eri, oćala ṗaṗamin ḳoc̣ṗakiyal pine:
   Avrahamen q'onağbi t'e p'ə̌ angel hari Sodoma p'ap'at'an ene biyənebaksay. Şəhəre bağala darvazin tume arśi Lut'en şot'oğo ak'i, hayzeri běše c'eri, oç̌ala p'ap'amin k'os'p'akiyal pine:

Verse: 2  Link to rar   "Bezi aġoox, ekinan vä͑x q̇onaġbaz. Me nökäri ḳoya baci efi turmoġo oc̣ḳaynan, basḳi mandaḳluġ haq̇aynan gele mu͑qezbakon. Oša savaxṭan hayzeri ṗurum yaq̇a bafnandon". Šoṭoġon isä qaybaki "äzyät ma zapanan, yan hamiya sa ga bä͑ġä͑bi basḳalyan" piṭun.
   «Bezi ağoox, ekinan və̌x q'onağbaz. Me nökəri k'oya baśi efi turmoğo os'k'aynan, bask'i mandak'luğ haq'aynan gele mǔqezbakon. Oşa savaxt'an hayzeri p'urum yaq'a bafnandon». Şot'oğon isə qaybaki "əzyət ma zapanan, yan hamiya sa ga bə̌ğə̌bi bask'alyan" pit'un.

Verse: 3  Link to rar   Ama Luṭen šoṭoġo ṭemane xurixuribi ki, axərda izi äyitä basḳi taṭunci ičuxun. Luṭenal ečeri täzä baldamaǯ badesṭi šoṭoġoynaḳ śume laxi, šoṭoġonal arci käyṭun.
   Ama Lut'en şot'oğo t'emane xurixuribi ki, axırda izi əyitə bask'i tat'unśi içuxun. Lut'enal eçeri təzə baldamac badest'i şot'oğoynak' šume laxi, şot'oğonal arśi kəyt'un.

Verse: 4  Link to rar   Ama basḳala vädine Sodoma ǯäyil-q̇oža, ḳä išq̇ar bunesa, hari Luṭe ḳožin härräminä biq̇esṭi čurṭunpi.
   Ama bask'ala vədine Sodoma cəyil-q'oja, k'ə işq'ar bunesa, hari Lut'e k'ojin hərrəminə biq'est'i çurt'unpi.

Verse: 5  Link to rar   Burṭunqi Luṭa ḳalpi metär upsa: "Mayaṭun šorox? Me üše vi ḳoya mandala amdarxoy qošṭanyan hare, eča šoṭoġo miya beš äšlä biq̇en".
   Burt'unqi Lut'a k'alpi metər upsa: «Mayat'un şorox? Me üşe vi k'oya mandala amdarxoy qoşt'anyan hare, eça şot'oğo miya beş əşlə biq'en».

Verse: 6  Link to rar   Luṭen č̣eri, iz bać̣anexun ćomoval buṭḳiṭuxun oša
   Lut'en c'eri, iz bač'anexun ç̌omoval but'k'it'uxun oşa

Verse: 7  Link to rar   pine: "Ay bez vičimux, metär äš ma biq̇anan! *
   pine: «Ay bez viçimux, metər əş ma biq'anan! *

Verse: 8  Link to rar   Be͑ġanan ḳäz nex, bezi ḳoya išq̇ara nu taci ṗä͑ xuyärzax bu. Šoṭoġo ečaz, ḳä čurnansa banan, ama ef be͑ś biyaz, bez ḳoya hari q̇onaġa ma galdanan".
   Běğanan k'əz nex, bezi k'oya işq'ara nu taśi p'ə̌ xuyərzax bu. Şot'oğo eçaz, k'ə çurnansa banan, ama ef běš biyaz, bez k'oya hari q'onağa ma galdanan».

Verse: 9  Link to rar   Gireci išq̇arxon isä qaybaki "aća memiin! Beš oćalxo hari arcene, miya yax haq̇əle tasṭa!" piṭun. Šoṭoġon Luṭa "ṭetär ma ba ki, va koṭoġoxun betär ben" pi burṭunqi šoṭo liḳsṭa ki, ćomo xoxṗi ḳoya baġalṭun.
   Gireśi işq'arxon isə qaybaki "aç̌a memiin! Beş oç̌alxo hari arśene, miya yax haq'ıle tast'a!" pit'un. Şot'oğon Lut'a "t'etər ma ba ki, va kot'oğoxun betər ben" pi burt'unqi şot'o lik'st'a ki, ç̌omo xoxp'i k'oya bağalt'un.

Verse: 10  Link to rar   Ṭe vädä ḳoya bakala q̇onaġxon ćomo qaypi Luṭa zapi baṭundi bona, ćomoval kiritṭunbi.
   T'e vədə k'oya bakala q'onağxon ç̌omo qaypi Lut'a zapi bat'undi bona, ç̌omoval kiritt'unbi.

Verse: 11  Link to rar   Ćomoy tume gireciṭoġo isä ṭetärṭun bi ki, ǯäyil-q̇oža, ṭiya šu bunesa bitoṭay pulmux ḳać̣ine baki. Amdarxon sal ḳoya baġala ćomo bä͑ġä͑bes teṭun baksay.
   Ç̌omoy tume gireśit'oğo isə t'etərt'un bi ki, cəyil-q'oja, t'iya şu bunesa bitot'ay pulmux k'ač'ine baki. Amdarxon sal k'oya bağala ç̌omo bə̌ğə̌bes tet'un baksay.

Verse: 12  Link to rar   Q̣onaġxon Luṭa piṭun: "Šuvax bu ene me šähäre? Yeznoox, ġarmux, xuyärmux, vi külfätäxun šu buvaxsa exṭa č̣eki memiin,
   Q'onağxon Lut'a pit'un: «Şuvax bu ene me şəhəre? Yeznoox, ğarmux, xuyərmux, vi külfətəxun şu buvaxsa ext'a c'eki memiin,

Verse: 13  Link to rar   šoṭo görä ki, male mande me šähäreynaḳ, tumexun äfčibalyan me ganu! Hari ṗaneṗi Q̣ONƷ́UĠOY u͑mu͑ġo miya bakalṭoġon amdarxo zapesṭalorox, isääl mone, yax yaq̇abene ki, oćalen sa ben me šähärä".
   şot'o görə ki, male mande me şəhəreynak', tumexun əfçibalyan me ganu! Hari p'anep'i Q'ONČUĞOY ǔmǔğo miya bakalt'oğon amdarxo zapest'alorox, isəəl mone, yax yaq'abene ki, oç̌alen sa ben me şəhərə».

Verse: 14  Link to rar   Luṭenal iz xuyärmoġo besi yeznoġoy ṭo͑ġo͑l taci pine: "Usumbakanan, č̣ekinan me šähärexun, Q̣ONƷ́UĠON äfčibale häysä me ganu". Ama šoṭoġon ṭetärṭun fikirbi ki, Luṭen zarafaṭebsa.
   Lut'enal iz xuyərmoğo besi yeznoğoy t'ǒğǒl taśi pine: «Usumbakanan, c'ekinan me şəhərexun, Q'ONČUĞON əfçibale həysə me ganu». Ama şot'oğon t'etərt'un fikirbi ki, Lut'en zarafat'ebsa.

Verse: 15  Link to rar   Käybakaṭan ḳoya q̇onaġ hari angelxon Luṭa kapṭi piṭun: "Usumbaka! Vi čuġo q̇a ṗä͑ xuyäräl exṭa č̣eki me šähärexun, tene miyaneynaḳ häzirbaki aruġoy boš hunal boḳalnu".
   Kəybakat'an k'oya q'onağ hari angelxon Lut'a kapt'i pit'un: «Usumbaka! Vi çuğo q'a p'ə̌ xuyərəl ext'a c'eki me şəhərexun, tene miyaneynak' həzirbaki aruğoy boş hunal bok'alnu».

Verse: 16  Link to rar   Ama Luṭ häläl länge galey. Ṭe vädä angelxon Luṭeyal, Luṭe čuġoy q̇a iz xuyärmoġoyal kiyexun biq̇i, tašeri šähärexun č̣eġamin č̣ovakesṭundi, šoṭo görä ki, Q̣ONƷ́UĠOY šoṭoġoynaḳ üḳe boksay.
   Ama Lut' hələl lənge galey. T'e vədə angelxon Lut'eyal, Lut'e çuğoy q'a iz xuyərmoğoyal kiyexun biq'i, taşeri şəhərexun c'eğamin c'ovakest'undi, şot'o görə ki, Q'ONČUĞOY şot'oğoynak' ük'e boksay.

Verse: 17  Link to rar   Šähärexun č̣eriṭuxun oša angelxoy sunṭin pine: "Ṭiṭanan ef elmoġo čarḳesṭanan! Qoš ma be͑ġanan! Me qavun galal čurpsun maq̇an baki, ṭiṭanan buruġo č̣aṗbakanan, tene biyalnan!"
   Şəhərexun c'erit'uxun oşa angelxoy sunt'in pine: «T'it'anan ef elmoğo çark'est'anan! Qoş ma běğanan! Me qavun galal çurpsun maq'an baki, t'it'anan buruğo c'ap'bakanan, tene biyalnan!»

Verse: 18  Link to rar   Luṭen isä qaybaki metäre pi: "Vi be͑ś biyaz, za gorox eki, bezi Aġa!
   Lut'en isə qaybaki metəre pi: «Vi běš biyaz, za gorox eki, bezi Ağa!

Verse: 19  Link to rar   Vi üḳe boḳi zaynaḳ, Vi piyes šaaṭez aḳeci pi čarḳesendi Hun me ḳule elmoġo. Ama ä͑xile Vi häysä uḳala buruxxo, zu ṭiya ṗaṗamin arux hari barale bez bel, äfčibaki taġoz zuval.
   Vi ük'e bok'i zaynak', Vi piyes şaat'ez ak'eśi pi çark'esendi Hun me k'ule elmoğo. Ama ə̌xile Vi həysə uk'ala buruxxo, zu t'iya p'ap'amin arux hari barale bez bel, əfçibaki tağoz zuval.

Verse: 20  Link to rar   Samal be͑ś mic̣iḳ sa šähäre bu, ṭiya ṭiṭeri ṗaṗes bazkon. Axəri ṭe ga ṭema kalal tene, barta za ṭiya ṗaṗesṗi bezi elmoġo čarḳesṭaz!"
   Samal běš mis'ik' sa şəhəre bu, t'iya t'it'eri p'ap'es bazkon. Axıri t'e ga t'ema kalal tene, barta za t'iya p'ap'esp'i bezi elmoğo çark'est'az!»

Verse: 21  Link to rar   Angelen pine: "Barta vi uḳala ḳinäḳq̇an baki, tez äfčibal ṭe šähärä.
   Angelen pine: «Barta vi uk'ala k'inək'q'an baki, tez əfçibal t'e şəhərə.

Verse: 22  Link to rar   Ama ṭiṭa va usum ṭiya ṗaṗesṗa, šoṭo görä ki, hun vi ganu bamin Zu hiḳḳal bes tez bakon". Ṭe šähäri c̣i isä Coaral * manedi.
   Ama t'it'a va usum t'iya p'ap'esp'a, şot'o görə ki, hun vi ganu bamin Zu hik'k'al bes tez bakon». T'e şəhəri s'i isə Śoaral * manedi.

Verse: 23  Link to rar   Be͑ġ ene e͑qeceney. Luṭ hari Coara ṗaneṗi,
   Běğ ene ěqeśeney. Lut' hari Śoara p'anep'i,

Verse: 24  Link to rar   Q̣ONƷ́UĠONAL ṭetäre bi ki, Sodomi q̇a Homorray loxol göynuxun boḳala kükürde bari.
   Q'ONČUĞONAL t'etəre bi ki, Sodomi q'a Homorray loxol göynuxun bok'ala kükürde bari.

Verse: 25  Link to rar   Šähärmux q̇a šähäre bakaloroxal, dirisṭ ṭe q̇avunluġal, oćalaxun ṭə͑q̇ṗi č̣eġala ḳä bunesa šoroxal -- bito boḳi baredi. *
   Şəhərmux q'a şəhəre bakaloroxal, dirist' t'e q'avunluğal, oç̌alaxun t'ı̌q'p'i c'eğala k'ə bunesa şoroxal -- bito bok'i baredi. *

Verse: 26  Link to rar   Luṭe čuġon isä fərəpi qoše be͑ġi pi, izi bädänen elen źe͑ biq̇ala ḳinäḳ źe͑ biq̇i, haṭe izi čurpi galal manedi. *
   Lut'e çuğon isə fırıpi qoşe běği pi, izi bədənen elen ǰě biq'ala k'inək' ǰě biq'i, hat'e izi çurpi galal manedi. *

Verse: 27  Link to rar   Äyč̣indäri käybakala ḳinäḳ Avraham hayzeri Q̣ONƷ́UĠON ičuxun sa ġi be͑ś äyitṗi galane hari.
   Əyc'indəri kəybakala k'inək' Avraham hayzeri Q'ONČUĞON içuxun sa ği běš əyitp'i galane hari.

Verse: 28  Link to rar   Hariyal be͑neġi ki, Sodom q̇a Homorra bakala ganuxun, dirisṭ ṭe qavunluġaxun ṭetär sa ḳüüne č̣eysa ki, unḳon tarine boksa.
   Hariyal běneği ki, Sodom q'a Homorra bakala ganuxun, dirist' t'e qavunluğaxun t'etər sa k'üüne c'eysa ki, unk'on tarine boksa.

Verse: 29  Link to rar   Buxaʒ́uġon ṭe qavun ganu bakala šähärmoġo äfčibaṭan Avraham Izi eyexey, šoṭo göräne Luṭa ṭeṭiin č̣evḳi čarḳesṭi, šoṭay ṭe careci barala šähäri oq̇a mandi bisuna tene čureci.
   Buxačuğon t'e qavun ganu bakala şəhərmoğo əfçibat'an Avraham İzi eyexey, şot'o görəne Lut'a t'et'iin c'evk'i çark'est'i, şot'ay t'e śareśi barala şəhəri oq'a mandi bisuna tene çureśi.


Luṭe xuyärmoġon äšṗesṭi günax
Lut'e xuyərmoğon əşp'est'i günax


Verse: 30  Link to rar   Luṭen izi ṗä͑ xuyäräl exṭi Coaraxun č̣ere, šoṭo görä ki, ṭiya mansṭuna q̇ə͑nebsay. Šorox taci buruġo sa maġarinaṭun mansṭa burqi.
   Lut'en izi p'ə̌ xuyərəl ext'i Śoaraxun c'ere, şot'o görə ki, t'iya manst'una q'ı̌nebsay. Şorox taśi buruğo sa mağarinat'un manst'a burqi.

Verse: 31  Link to rar   Sa ġi Luṭe kala xuyären iz mic̣iḳ xunča metäre pi: "Mone, beši baval ene q̇ožanebaksa, miya q̇eräz išq̇aral tene bu ki, hayzeri ǯamaati xuyärmoġollariḳ išq̇ara taġayan.
   Sa ği Lut'e kala xuyəren iz mis'ik' xunça metəre pi: «Mone, beşi baval ene q'ojanebaksa, miya q'erəz işq'aral tene bu ki, hayzeri camaati xuyərmoğollarik' işq'ara tağayan.

Verse: 32  Link to rar   Eki beši bava u͑ġesṭi ičuxun basḳen, bärkä bešiyal sa äyel baneki, metärluġen beši tumal tene äfčibakon".
   Eki beşi bava ǔğest'i içuxun bask'en, bərkə beşiyal sa əyel baneki, metərluğen beşi tumal tene əfçibakon».

Verse: 33  Link to rar   Šoṭoġon haṭe üše ičoġoy bava fi tadi u͑ġesṭundi, kala xuyäräl baci iz bavaxun baseḳi. Luṭen isä ṭema u͑ġeney ki, nä xuyäri hari izi ṭo͑ġo͑l basksunane avabaki, nääl šoṭay hayzeri taysuna.
   Şot'oğon hat'e üşe içoğoy bava fi tadi ǔğest'undi, kala xuyərəl baśi iz bavaxun basek'i. Lut'en isə t'ema ǔğeney ki, nə xuyəri hari izi t'ǒğǒl basksunane avabaki, nəəl şot'ay hayzeri taysuna.

Verse: 34  Link to rar   Äyč̣indäri kala xuyären mic̣iḳṭu pine: "Č̣ovaki šü zuz basḳi bavaxun, eki me üšeyal bava u͑ġesṭen hun basḳa ičuxun. Sa äyel ečayan beši tumal tene äfčibakon".
   Əyc'indəri kala xuyəren mis'ik't'u pine: «C'ovaki şü zuz bask'i bavaxun, eki me üşeyal bava ǔğest'en hun bask'a içuxun. Sa əyel eçayan beşi tumal tene əfçibakon».

Verse: 35  Link to rar   Haketäräl biṭun, ečeri bava ṗurum fi tadi u͑ġesṭundi, mic̣iḳ xuyäräl hari iz bavaxun baseḳi. Luṭen isä ṭema u͑ġeney ki, nä xuyäri hari izi ṭo͑ġo͑l basksunane avabaki, nääl šoṭay hayzeri taysuna.
   Haketərəl bit'un, eçeri bava p'urum fi tadi ǔğest'undi, mis'ik' xuyərəl hari iz bavaxun basek'i. Lut'en isə t'ema ǔğeney ki, nə xuyəri hari izi t'ǒğǒl basksunane avabaki, nəəl şot'ay hayzeri taysuna.

Verse: 36  Link to rar   Hametär, Luṭe ṗä͑ xuyäräl ičoġoy bavaxun äyläṭun mandi.
   Hametər, Lut'e p'ə̌ xuyərəl içoğoy bavaxun əylət'un mandi.

Verse: 37  Link to rar   Kala xuyären sa ġar ečeri iz c̣iya Moave * laxi. Moavluyox uḳala azuḳal hame Moavaxun ämälä hariyoroxe.
   Kala xuyəren sa ğar eçeri iz s'iya Moave * laxi. Moavluyox uk'ala azuk'al hame Moavaxun əmələ hariyoroxe.

Verse: 38  Link to rar   Mic̣iḳ xuyärenal sa ġar ečeri iz c̣iya Ben-Ammine * laxi. Šoṭoxunal häysäṭin "ammonluyox" uḳala azuḳe töräyinšaki.
   Mis'ik' xuyərenal sa ğar eçeri iz s'iya Ben-Ammine * laxi. Şot'oxunal həysət'in "ammonluyox" uk'ala azuk'e törəyinşaki.

Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.