TITUS
Biblia Udica, Versio Nizhensis: Vetus Testamentum
Part No. 16
Previous part

Chapter: 16 


Aǯari Avramaxun bə͑hi baki Ismaila ešṭun
Acari Avramaxun bı̌hi baki İsmaila eşt'un


Verse: 1  Link to rar   Sarayen Avrameynaḳ äyel ečes bateneksay. Šoṭay misirlu sa čuux-nökäre buy, iz c̣i Aǯar.
   Sarayen Avrameynak' əyel eçes bateneksay. Şot'ay misirlu sa çuux-nökəre buy, iz s'i Acar.

Verse: 2  Link to rar   Sarayen Avrama metäre pi: "Isä ki Q̣ONƷ́UĠON za äyel tene tasṭa, exṭa bezi me čuux-nökäräxun baka. Bärkä koṭin q̇a bakayin zaynaḳ sa ġar enečeri". Avramen Sarayi äyitä be͑neġi,
   Sarayen Avrama metəre pi: «İsə ki Q'ONČUĞON za əyel tene tast'a, ext'a bezi me çuux-nökərəxun baka. Bərkə kot'in q'a bakayin zaynak' sa ğar eneçeri». Avramen Sarayi əyitə běneği,

Verse: 3  Link to rar   Sarayenal izi čuux-nökärä, misirlu Aǯara exṭi izi išq̇ara čuux pi tanedi. Avrami Känan oćala eysun isä vic̣ useney.
   Sarayenal izi çuux-nökərə, misirlu Acara ext'i izi işq'ara çuux pi tanedi. Avrami Kənan oç̌ala eysun isə vis' useney.

Verse: 4  Link to rar   Avram Aǯaraxun baneki, Aǯaral äyeläne mandi. Aǯaren iz bə͑hi baksuna avabakala ḳinäḳ iču kalane tašṭa burqi.
   Avram Acaraxun baneki, Acaral əyeləne mandi. Acaren iz bı̌hi baksuna avabakala k'inək' içu kalane taşt'a burqi.

Verse: 5  Link to rar   Ṭe vädä Sarayen Avrama pine: "Hunnu koṭo bez bel lačuvḳiyo! Exṭi bez kiin koṭo vaynaḳ čuuxez bi, isääl bə͑hi baki zaynaḳ yaġine bake. Barta isä Q̣ONƷ́UĠONQ̣AN pi šine beši bošṭan düz nex".
   T'e vədə Sarayen Avrama pine: «Hunnu kot'o bez bel laçuvk'iyo! Ext'i bez kiin kot'o vaynak' çuuxez bi, isəəl bı̌hi baki zaynak' yağine bake. Barta isə Q'ONČUĞONQ'AN pi şine beşi boşt'an düz nex».

Verse: 6  Link to rar   Avramen qaybaki metäre pi: "Vi nökäre hunen ava, hetär čurensa haṭetäräl ba". Haṭe ġinaxun Sarayen bureqi iz nökärä pul tadi išiġ nu tasṭa, axərdal ṭetäre baki ki, Aǯaren iz bula haq̇i ṭiṭalane baki.
   Avramen qaybaki metəre pi: «Vi nökəre hunen ava, hetər çurensa hat'etərəl ba». Hat'e ğinaxun Sarayen bureqi iz nökərə pul tadi işiğ nu tast'a, axırdal t'etəre baki ki, Acaren iz bula haq'i t'it'alane baki.

Verse: 7  Link to rar   Amc̣i oćala, Šur šähäre taġala yaq̇e loxol sa orayine buy, Aǯar hari miya ṗaṗala vädine Q̣ONƷ́UĠON Iz angela šoṭay be͑ś č̣evḳi Iz muzin
   Ams'i oç̌ala, Şur şəhəre tağala yaq'e loxol sa orayine buy, Acar hari miya p'ap'ala vədine Q'ONČUĞON İz angela şot'ay běš c'evk'i İz muzin

Verse: 8  Link to rar   pesedi: "Ay Sarayi nökär Aǯar, sa upa be͑yn, metär mayinen eysa, maćun taysa?" Aǯarenal qaybaki "šineynaḳ ki nökärluġezbsa, šoṭoxunez bez bula haq̇i ṭisṭa -- Sarayaxun" pine.
   pesedi: «Ay Sarayi nökər Acar, sa upa běyn, metər mayinen eysa, maç̌un taysa?» Acarenal qaybaki "şineynak' ki nökərluğezbsa, şot'oxunez bez bula haq'i t'ist'a -- Sarayaxun" pine.

Verse: 9  Link to rar   Ṭe vädä Q̣ONƷ́UĠON angela Iz muzin saal pesedi: "Qaybaka taki, vi bulal ḳoc̣ṗa vi nökärluġa ba".
   T'e vədə Q'ONČUĞON angela İz muzin saal pesedi: «Qaybaka taki, vi bulal k'os'p'a vi nökərluğa ba».

Verse: 10  Link to rar   Oša metäre pi: "Vaxun kala sa näsil töräyinšakale, šoṭoġoy saya ṭeq̇ädär booz ki, bo͑q̇ä͑lpi čarḳesṭala tene bakal šoṭoġo".
   Oşa metəre pi: «Vaxun kala sa nəsil törəyinşakale, şot'oğoy saya t'eq'ədər booz ki, bǒq'ə̌lpi çark'est'ala tene bakal şot'oğo».

Verse: 11  Link to rar   Q̣ONƷ́UĠON saal angeli muzin äyitṗi pine: "Avazu ki, bə͑hinu. Vi sa ġar bakale, iz c̣iya Ismail * laxa, šoṭo görä ki, Buxaʒ́uġon vi ṭar ġine va inebaki.
   Q'ONČUĞON saal angeli muzin əyitp'i pine: «Avazu ki, bı̌hinu. Vi sa ğar bakale, iz s'iya İsmail * laxa, şot'o görə ki, Buxačuğon vi t'ar ğine va inebaki.

Verse: 12  Link to rar   Vi me ġaren šuḳḳala bać̣an tene ḳoc̣ṗal, izi kalo ič bakale hämišä. Nä ič šuḳḳalaxun tene ṗaq̇al, nääl ičuxun teṭun yaq̇ax taġal. Šoṭay ara izi vičimoġoxunal šaaṭ tene bakal".
   Vi me ğaren şuk'k'ala bač'an tene k'os'p'al, izi kalo iç bakale həmişə. Nə iç şuk'k'alaxun tene p'aq'al, nəəl içuxun tet'un yaq'ax tağal. Şot'ay ara izi viçimoğoxunal şaat' tene bakal».

Verse: 13  Link to rar   Aǯaren "mone, za Aḳalṭu zuval azḳi" pi, ičuxun äyitḳala Q̣ONƷ́UĠOY c̣iya "Za aḳala Buxaʒ́uxe" laxi.
   Acaren "mone, za Ak'alt'u zuval azk'i" pi, içuxun əyitk'ala Q'ONČUĞOY s'iya "Za ak'ala Buxačuxe" laxi.

Verse: 14  Link to rar   Koṭo göräṭun häysääl Qadeši q̇a Beredi arane bakala ṭe orayini c̣iya Beer-Laxay-Roi * nex.
   Kot'o görət'un həysəəl Qadeşi q'a Beredi arane bakala t'e orayini s'iya Beer-Laxay-Roi * nex.

Verse: 15  Link to rar   Hametär, Aǯaren Avrameynaḳ sa ġare ečeri, Avramenal ṭe ġare c̣iya Ismaile laxi.
   Hametər, Acaren Avrameynak' sa ğare eçeri, Avramenal t'e ğare s'iya İsmaile laxi.

Verse: 16  Link to rar   Aǯaren Ismaila ečaṭan Avrami säksän u͑q yäše buy.
   Acaren İsmaila eçat'an Avrami səksən ǔq yəşe buy.
Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.