TITUS
Biblia Udica, Versio Nizhensis: Vetus Testamentum
Part No. 13
Previous part

Chapter: 13 


Luṭe Avramaxun ǯöybaksun
Lut'e Avramaxun cöybaksun


Verse: 1  Link to rar   Metärluġen, Avramen iz čuġo q̇a izi q̇azayinši girbi ḳä bunesa bitova exṭi Misiräxun č̣ere. Izi vičey ġar Luṭal ičuxuney, šorox qaybaki Negev amc̣i oćalaṭun taci.
   Metərluğen, Avramen iz çuğo q'a izi q'azayinşi girbi k'ə bunesa bitova ext'i Misirəxun c'ere. İzi viçey ğar Lut'al içuxuney, şorox qaybaki Negev ams'i oç̌alat'un taśi.

Verse: 2  Link to rar   Avram Misiräxun gele varlune č̣eri, šoṭay sürüġo bakala heyvanxoy sayal geleney, q̇əzəl-gümüšäl.
   Avram Misirəxun gele varlune c'eri, şot'ay sürüğo bakala heyvanxoy sayal geleney, q'ızıl-gümüşəl.

Verse: 3  Link to rar   Negev amc̣i oćala ṗaṗiṭuxun oša Avram Beṭel šähäräče taci, ečeriyal iz čadəra Beṭel q̇a Ay šähäri arane laxi, izi ṭe vaxṭ čurpi gala čurepi.
   Negev ams'i oç̌ala p'ap'it'uxun oşa Avram Bet'el şəhərəçe taśi, eçeriyal iz çadıra Bet'el q'a Ay şəhəri arane laxi, izi t'e vaxt' çurpi gala çurepi.

Verse: 4  Link to rar   Avramen miya ṭe vaxṭ Q̣ONƷ́UĠOYNAḲ q̇urban ečala gaal düzbeney. Isä ṗurum miya čurpi Q̣ONƷ́UĠO bule ḳoc̣ṗi.
   Avramen miya t'e vaxt' Q'ONČUĞOYNAK' q'urban eçala gaal düzbeney. İsə p'urum miya çurpi Q'ONČUĞO bule k'os'p'i.

Verse: 5  Link to rar   Avramaxun sagala Misiräxun č̣eri Luṭeyal, ham izi sürüġo bakala heyvanxoy say geleney, ham iz külfät kalaney.
   Avramaxun sagala Misirəxun c'eri Lut'eyal, ham izi sürüğo bakala heyvanxoy say geleney, ham iz külfət kalaney.

Verse: 6  Link to rar   Šoṭoġon ene ičoġoy čadərxo suna ə͑śa laxesal teṭun baksay, šoṭo görä ki, ṭe vädä nä ičoġoy heyvanxo otarišala ga tene ṗoyesay, nä ičoġoy külfäti źomo girbes bakala ukun.
   Şot'oğon ene içoğoy çadırxo suna ı̌ša laxesal tet'un baksay, şot'o görə ki, t'e vədə nə içoğoy heyvanxo otarişala ga tene p'oyesay, nə içoğoy külfəti ǰomo girbes bakala ukun.

Verse: 7  Link to rar   Avrami q̇a Luṭe heyvanxo be͑ġala čobanxoval ene sunaxun yaq̇ax teṭun taysay. Ṭe dööräsṭä me oćalxo hälä känanluyox q̇a ṗerizluyoxal yäšäyinšṭunbsay.
   Avrami q'a Lut'e heyvanxo běğala çobanxoval ene sunaxun yaq'ax tet'un taysay. T'e döörəst'ə me oç̌alxo hələ kənanluyox q'a p'erizluyoxal yəşəyinşt'unbsay.

Verse: 8  Link to rar   Ṭe vädä Avramen Luṭa pine: "Eki ṭetär ben ki, nä beši, nä beši čobanxoy arane exlät maq̇an baki, šoṭo görä ki, yan q̇oomyan.
   T'e vədə Avramen Lut'a pine: «Eki t'etər ben ki, nə beşi, nə beşi çobanxoy arane exlət maq'an baki, şot'o görə ki, yan q'oomyan.

Verse: 9  Link to rar   Be͑ġa heq̇ädär oćale bu, eki ǯöybaken här soġo ičeynaḳq̇an baki. Zaynaḳ färg tene bu. Hun tärs täräf taġayin, zu yön täräf taġoz, hun yön taġayin, zu tärs".
   Běğa heq'ədər oç̌ale bu, eki cöybaken hər soğo içeynak'q'an baki. Zaynak' fərg tene bu. Hun tərs tərəf tağayin, zu yön tərəf tağoz, hun yön tağayin, zu tərs».

Verse: 10  Link to rar   Luṭenal be͑neġi ki, Iordan oqe ṭo͑ġen bakala oćalxo taci Coara ṗaṗamin šaaṭ xe lafṭala oćalxone, lap Buxaʒ́uġon Edena lasaki ganu q̇a Misirä bakala oćalxone ošq̇arsṭa. Me exlät baki vädine Q̣ONƷ́UĠON hälä Sodoma q̇a Homorra carpiteney.
   Lut'enal běneği ki, İordan oqe t'ǒğen bakala oç̌alxo taśi Śoara p'ap'amin şaat' xe laft'ala oç̌alxone, lap Buxačuğon Edena lasaki ganu q'a Misirə bakala oç̌alxone oşq'arst'a. Me exlət baki vədine Q'ONČUĞON hələ Sodoma q'a Homorra śarpiteney.

Verse: 11  Link to rar   Metärluġen, Luṭen Iordan oqe ṭo͑ġä č̣äḳṗi be͑ġč̣eġalače taġala baki. Hametär šorox ǯöyṭunbaki:
   Metərluğen, Lut'en İordan oqe t'ǒğə c'ək'p'i běğc'eğalaçe tağala baki. Hametər şorox cöyt'unbaki:

Verse: 12  Link to rar   Avram Känan oćala manedi, Luṭen isä Iordan oqe ṭo͑ġen taġala oćalxo č̣äḳṗi, iz čadərxoval tašeri Sodom šähärä ə͑śa lanexi.
   Avram Kənan oç̌ala manedi, Lut'en isə İordan oqe t'ǒğen tağala oç̌alxo c'ək'p'i, iz çadırxoval taşeri Sodom şəhərə ı̌ša lanexi.

Verse: 13  Link to rar   Sodom šähäri amdarxo isä Q̣ONƷ́UĠO nu čalxala sa amdarxoṭuniy, šorox günaxi boš batḳeṭuniy taṭunsay.
   Sodom şəhəri amdarxo isə Q'ONČUĞO nu çalxala sa amdarxot'uniy, şorox günaxi boş batk'et'uniy tat'unsay.

Verse: 14  Link to rar   Luṭ ǯöybaki taciṭuxun oša Q̣ONƷ́UĠON Avrama pine: "Sa fərəpa vi čurpi ganu be͑ġa mayal ciriḳe taysa!
   Lut' cöybaki taśit'uxun oşa Q'ONČUĞON Avrama pine: «Sa fırıpa vi çurpi ganu běğa mayal śirik'e taysa!

Verse: 15  Link to rar   Vi häysä aḳala me oćala dirisṭ va tadoz, vaxun töräyinšakiṭoġoy bakale šo hämišäluġ. *
   Vi həysə ak'ala me oç̌ala dirist' va tadoz, vaxun törəyinşakit'oğoy bakale şo həmişəluğ. *

Verse: 16  Link to rar   Oćali ćoyel bakala q̇ume hama booz Zu vaxun töräyinšaki näsili saya. Ṭe q̇uma nu bo͑q̇ä͑lpi čarḳesṭes bakala ḳinäḳ, šoṭoġoval bo͑q̇ä͑lpi čarḳesṭes tene bakal.
   Oç̌ali ç̌oyel bakala q'ume hama booz Zu vaxun törəyinşaki nəsili saya. T'e q'uma nu bǒq'ə̌lpi çark'est'es bakala k'inək', şot'oğoval bǒq'ə̌lpi çark'est'es tene bakal.

Verse: 17  Link to rar   Isä taki Zu va tadala me oćala belxun ośel tarapa!"
   İsə taki Zu va tadala me oç̌ala belxun ošel tarapa!»

Verse: 18  Link to rar   Memiinal č̣eriṭuxun oša Avram Xevronače taci, tašeriyal izi čadərxo Mamreni mä͑xluġ uḳala ganu ə͑śa laxi čurepi. Šoṭin miya Q̣ONƷ́UĠOYNAḲ q̇urban ečala gaal düzebi.
   Memiinal c'erit'uxun oşa Avram Xevronaçe taśi, taşeriyal izi çadırxo Mamreni mə̌xluğ uk'ala ganu ı̌ša laxi çurepi. Şot'in miya Q'ONČUĞOYNAK' q'urban eçala gaal düzebi.
Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.