Buxaʒ́uġon Noya metär pi xeyir-bäräkäte tadi: "Avuzbakanan, gelebaki oćali ćoya buybanan. *
Oćali loxol taraḳala q̇a xoreġala ḳä heyvan, göynul purḳala q̇ušurxo q̇a dänizi boš bakala ḳä čäli bunesa, bitoṭay loxol vä͑n kalaluġbalnan. Zaṗeġalṭun šorox bito vä͑xun, pula haq̇alnan vä͑n šoṭoġoy.
Bito heyvanxoxun ukes banankon, zu vä͑x oćali ćoyel č̣eġalṭoġoxun uksuna iǯaza tadi ḳinäḳ, isääl me heyvanxoy yeq̇axunez uksuna iǯaza tasṭa.
Ama ṗi iz bošṭan nu bari yeq̇ umakanan, šoṭo görä ki, ṗi yäšäyinš upsune. *
Ef ṗiya ciḳalṭoġoxunal häyifä haq̇oz Zu, ṭiyä͑miṭay elmoġo haq̇suni ǯazina zapesṭoz, čuresa mo amdarq̇an baki, čuresa heyvan.
Iču ošq̇are yaratmiše Buxaʒ́uġon amdara, šoṭo göräl amdar besṗi šoṭay ṗiya ciḳalṭay elmoġoval ṭesunṭin ṗi cipi haq̇ale. *
Avuzbakanan, gelebaki oćali ćoya buybanan, bartanan ef say gelebakeq̇an". *
Oša Buxaʒ́uġon Noya q̇a iz ġarmoġo metäre pi:
"Mone, vä͑xun q̇a vä͑xun bakiṭoġoxun sa iräziluġez ġaćesa Zu.
Vä͑xun sagala gäminäxun č̣eri ḳä heyvan bunesa, šoṭoġoxunal ġaćezsa me iräziluġa: oćali ćoyel taraḳala q̇a xoreġala ḳä heyvan, göynul purḳala ḳä q̇uš bunesa bitoṭuxun.
Vä͑x äyitez tasṭa ki, ene sal sa vädä oćala xenen tene ćaxḳal, oćali ćoyel bakalṭoġo xenen tumexun äfčibsun tene bakal ene".
Buxaʒ́uġon pine: "Bezi häysä vä͑x q̇a iz boš elmux bakalṭoġoy bitoṭu hämišäluġ tadi me äyiti loxol čurpsuna isä efi piin aḳalnan vä͑n:
Mone, göynul asoyxoy loxol Bezi murdufaz suruḳpsa Zu, šoṭin aḳesṭale Bezi vä͑x tadi äyiti loxol čurpsuna.
Här däfä Zu göynul asoyxo girbi ečaṭan, me murduf č̣eġale,
Zuval Bezi eyex badoz vä͑xun q̇a iz boš elmux bakalṭoġoy bitoṭuxun ġaćeci iräziluġa. Ene sal sa vädä xenen oćala ćaxṗi iz loxol bakalṭoġoy bitoṭu äfčitenebal.
Me murdufa moṭaynaḳez laxsa: šoṭo aḳi oćali ćoyel izi boš elmux bakalṭoġoy bitoṭuxun ġaćeci me hämišäluġ iräziluġa nu eyexun č̣evkseynaḳ".
Buxaʒ́uġon Noya ṗurum pine: "Göynul č̣eġala me murduf bakale Bezi iz boš elmux bakalṭoġoy bitoṭu tadi äyiti loxol čurpsuna aḳesṭalo".
Noye gäminäxun č̣eri ġarmux moroxey: Šem, Xam saal Yafeṭ. Känan hame Xame ġarey.
Häysä oćali ćoyel bakala azuḳxoyal bito me xibaraxun, Noye me xib ġaraxune ämälä hare.
Noyen oćale beǯärišbsa burqi, ečeriyal ṭulluġe lasaki.
Sa ġi Noyen fi u͑ġi finaġoye baki, šo iz čadəri boš čuplaġ basḳeney.
Xamen, Känan šoṭay ġarey, iz bava čuplaġ aḳi č̣eri moṭo iz ṗä͑ vičäl pine.
Šemen q̇a Yafeṭen isä ičoġoy ä͑mnäbel sa paltar laṗṭi, šoṭo bać̣anexun alabi ṗä͑ belxun biq̇iṭuxun oša qoš-qoš čadəra baci ičoġoy bavay čuplaġ bädänä buṭṭunki. Bavay äyibä maq̇aṭun aḳi pi ičoġoy ćoya ṭe soġo täräfṭun taradey šoṭoġon.
Noyen iz finaġoyluġ č̣ovaki muġurbakiṭuxun oša iz mic̣iḳ ġaren biq̇i äšlä avabaki
pine: "Mone, q̇arġiši q̇onʒ́uxe baki Känan! Iz vičimoġoy ḳulurxoynaḳal ḳul bakale šo!"
Oša metäräl pine: "Alxəšq̇an baki Šeme Buxaʒ́ux bakala Q̣ONƷ́UĠO! Barta Känan Šeme ḳulq̇an baki!
Barta Buxaʒ́uġon Yafeṭi oćalxo gelebeq̇an, barta Yafeṭi čadərxoval Šeme čadərxoy ṭo͑ġo͑lq̇an laxeci! Känaneynaḳ isä iz vičimoġoy ḳul baksune cameci".
Oćala xenen ćaxṗiṭuxun oša Noy hälä sa xibbać älli usenal yäšäyinšebi,
biyaṭanal izi düz vuybać älli yäše buy.
