TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 8

Chapter: 8

Xene zaṗesun q̇a Noye gäminäxun č̣eysun
Xene zap'esun q'a Noye gəminəxun c'eysun

Verse: 1

Ama Buxaʒ́uġon Noya q̇a Noyaxun sagala gäminä bakala bito ṭe ḳožin q̇a ä͑qnä heyvanxo Izi eyexe badi. Ṭe vädä Buxaʒ́uġon oćali loxol muše yaq̇abi, xeyal bureqi zaṗesa.
Ama Buxačuğon Noya q'a Noyaxun sagala gəminə bakala bito t'e k'ojin q'a ə̌qnə heyvanxo İzi eyexe badi. T'e vədə Buxačuğon oç̌ali loxol muşe yaq'abi, xeyal bureqi zap'esa.

Verse: 2

Oćali q̇a göyurxoy źomone buṭeci, aġalal boṭebaki.
Oç̌ali q'a göyurxoy ǰomone but'eśi, ağalal bot'ebaki.

Verse: 3

Xe oćali ćoyexun zaṗesane burqi. Xenen ćaxpsuni düz sabać ällimǯi ġiney, xe malbaksane burqi me ġi.
Xe oç̌ali ç̌oyexun zap'esane burqi. Xenen ç̌axpsuni düz sabaç̌ əllimci ğiney, xe malbaksane burqi me ği.

Verse: 4

Vu͑ġu͑mǯi xaše vu͑ġec̣c̣emǯi ġineyal gämi hari Ararat buruġoy bel ṭä͑q̇eci čurepi.
Vǔğǔmci xaşe vǔğes's'emci ğineyal gəmi hari Ararat buruğoy bel t'ə̌q'eśi çurepi.

Verse: 5

Vic̣imǯi xašal ciriḳ xe mal-mal zaṗeci, vic̣imǯi xaše samǯi ġineyal buruxmoġoy bulurxone aḳesa burqi.
Vis'imci xaşal śirik' xe mal-mal zap'eśi, vis'imci xaşe samci ğineyal buruxmoğoy bulurxone ak'esa burqi.

Verse: 6

Q̣ərx ġi č̣ovakiṭuxun oša Noyen gämin boš düzbi aynina qaypi
Q'ırx ği c'ovakit'uxun oşa Noyen gəmin boş düzbi aynina qaypi

Verse: 7

sa ġä͑ynäne tärbi. Ġä͑ynäl purpi, ama ṗurum qaybaki enesay, šoṭo görä ki, xe oćali ćoyexun tam tene zaṗecey.
sa ğə̌ynəne tərbi. Ğə̌ynəl purpi, ama p'urum qaybaki enesay, şot'o görə ki, xe oç̌ali ç̌oyexun tam tene zap'eśey.

Verse: 8

Oša Noyen xe oćali ćoyexun tam zaṗeci-nu zaṗesuna avabakseynaḳ sa göyärčine tärbi.
Oşa Noyen xe oç̌ali ç̌oyexun tam zap'eśi-nu zap'esuna avabakseynak' sa göyərçine tərbi.

Verse: 9

Ama göyärčin purpiṭuxun oša ičeynaḳ arcala ga nu bä͑ġä͑bi qaybaki hare, šoṭo görä ki, oćal häläl xene bošey. Noyenal iz kula boxodi göyärčinä iz kiyele arcesṭi, šoṭo ṗurum gäminäne exṭi.
Ama göyərçin purpit'uxun oşa içeynak' arśala ga nu bə̌ğə̌bi qaybaki hare, şot'o görə ki, oç̌al hələl xene boşey. Noyenal iz kula boxodi göyərçinə iz kiyele arśest'i, şot'o p'urum gəminəne ext'i.

Verse: 10

Vu͑ġ ġinaxun oša Noyen saal göyärčinä tärebi.
Vǔğ ğinaxun oşa Noyen saal göyərçinə tərebi.

Verse: 11

Göyärčin biyäsćoyene qaybaki, iz dündüḳi bošal täzä sa zeytuni xazale buy! Metär Noyen q̇amišebaki ki, xe oćali ćoyexun zaṗecene.
Göyərçin biyəsç̌oyene qaybaki, iz dündük'i boşal təzə sa zeytuni xazale buy! Metər Noyen q'amişebaki ki, xe oç̌ali ç̌oyexun zap'eśene.

Verse: 12

Vu͑ġ ġi yaq̇be͑ġiṭuxun oša Noyen saal göyärčinä tärebi, me däfä göyärčin sal qaytenebaki.
Vǔğ ği yaq'běğit'uxun oşa Noyen saal göyərçinə tərebi, me dəfə göyərçin sal qaytenebaki.

Verse: 13

Noye u͑qbać sa yäš tamambaki useni samǯi xaše samǯi ġinasṭa oćali ćoye bakala xe zaṗeci. Noyen gämin loxolxun qayepi, iz bula č̣evḳiyal be͑neġi ki, oq̇a xe tene mande.
Noye ǔqbaç̌ sa yəş tamambaki useni samci xaşe samci ğinast'a oç̌ali ç̌oye bakala xe zap'eśi. Noyen gəmin loxolxun qayepi, iz bula c'evk'iyal běneği ki, oq'a xe tene mande.

Verse: 14

P̣ä͑mǯi xaše saq̇ovu͑ġu͑mǯi ġine isä oćal dirisṭ q̇arinebaki.
P'ə̌mci xaşe saq'ovǔğǔmci ğine isə oç̌al dirist' q'arinebaki.

Verse: 15

Ṭe vädä Buxaʒ́uġon Noya pine:
T'e vədə Buxačuğon Noya pine:

Verse: 16

"Vi čuġo, vi ġarmoġo q̇a ġarmoġoy čupuxxoval exṭa gäminäxun č̣eki.
«Vi çuğo, vi ğarmoğo q'a ğarmoğoy çupuxxoval ext'a gəminəxun c'eki.

Verse: 17

Vaxun gäminä exṭi heyvanxoval bitova č̣evḳa: oćali ćoyel taraḳala q̇a xoreġala heyvanxo, q̇ušurxo. Barta šorox avuzbakeq̇aṭun, barta gelebaki oćali ćoya buybeq̇aṭun".
Vaxun gəminə ext'i heyvanxoval bitova c'evk'a: oç̌ali ç̌oyel tarak'ala q'a xoreğala heyvanxo, q'uşurxo. Barta şorox avuzbakeq'at'un, barta gelebaki oç̌ali ç̌oya buybeq'at'un».

Verse: 18

Noyenal iz čuġo, iz ġarmoġo, iz ġarmoġoy čupuxxoval exṭi gäminäxun č̣ere.
Noyenal iz çuğo, iz ğarmoğo, iz ğarmoğoy çupuxxoval ext'i gəminəxun c'ere.

Verse: 19

Iz bać̣anexun gäminä bakala heyvanxoval bito soġo-soġo č̣erṭun: iz boš elmux bakala ḳä heyvan bunesa bito, oćali loxol taraḳala q̇a xoreġala heyvanxoxun burqi q̇ušurxol ciriḳ.
İz bač'anexun gəminə bakala heyvanxoval bito soğo-soğo c'ert'un: iz boş elmux bakala k'ə heyvan bunesa bito, oç̌ali loxol tarak'ala q'a xoreğala heyvanxoxun burqi q'uşurxol śirik'.

Buxaʒ́uġoy Noyaxun iräziluġ ġaćesun
Buxačuğoy Noyaxun irəziluğ ğaç̌esun

Verse: 20

Oša Noyen sa q̇urban ečala gane düzbi, halal hesabbakala heyvanxoxun q̇a q̇ušurxoxun bitoṭuxun śampiyal Q̣ONƷ́UĠOYNAḲ boḳospsuni q̇urbane ečeri.
Oşa Noyen sa q'urban eçala gane düzbi, halal hesabbakala heyvanxoxun q'a q'uşurxoxun bitot'uxun šampiyal Q'ONČUĞOYNAK' bok'ospsuni q'urbane eçeri.

Verse: 21

Boḳala yeq̇e aden ala laci Q̣ONƷ́UĠO iräzinebi, Šoṭinal Iz üḳe boš metäre pi: "Ene sal sa vädä oćalen amdarxoy biq̇ala äšurxo görä q̇arġiš tene ukal. Düze, amdaren iz pula qaypsun q̇a pis yaq̇en taysun sane baksa, ama ene sal sa vädä moṭo görä iz boš elmux bakalṭoġo tez äfčibal Zu.
Bok'ala yeq'e aden ala laśi Q'ONČUĞO irəzinebi, Şot'inal İz ük'e boş metəre pi: «Ene sal sa vədə oç̌alen amdarxoy biq'ala əşurxo görə q'arğiş tene ukal. Düze, amdaren iz pula qaypsun q'a pis yaq'en taysun sane baksa, ama ene sal sa vədə mot'o görə iz boş elmux bakalt'oğo tez əfçibal Zu.

Verse: 22

   Heq̇ädär ki, me oćal iz galane,
   Heq'ədər ki, me oç̌al iz galane,
   Bisṭun q̇a expsunal bakale,
   Bist'un q'a expsunal bakale,
   Gamluġ q̇a čaxluġal.
   Gamluğ q'a çaxluğal.
   Yäy čarḳi ə͑źenal baġale,
   Yəy çark'i ı̌ǰenal bağale,
   Üše q̇a ġenaxunal iz gala bakale".
   Üşe q'a ğenaxunal iz gala bakale».

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.