TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 6

Chapter: 6

Buxaʒ́uġoy Iz yaratmišiṭoġo äfčibsun čuresun
Buxačuğoy İz yaratmişit'oğo əfçibsun çuresun

Verse: 1

Oćali ćoyel amdarxo taysun avuzebaksay. Šoṭoġoy xuyärmuxe baksay,
Oç̌ali ç̌oyel amdarxo taysun avuzebaksay. Şot'oğoy xuyərmuxe baksay,

Verse: 2

alaxunbitiṭoġonal aḳaṭan ki, me xuyärmux gele gözäle, burṭunqi härṭin iz čureġalṭu č̣äḳṗi šoṭoġo ičoġoynaḳ čuux bsa.
alaxunbitit'oğonal ak'at'an ki, me xuyərmux gele gözəle, burt'unqi hərt'in iz çureğalt'u c'ək'p'i şot'oğo içoğoynak' çuux bsa.

Verse: 3

Ṭe vädä Q̣ONƷ́UĠON pine: "Bezi amdarxoy boš bapi šoṭoġo yäšäyinšesṭala näfäs hämišäluġ tene, äfčibaki taġala bädänäxun q̇eräz hiḳḳal teṭun korox. Šoṭo göräl sabać q̇a usen vaxṭez tasṭa koṭoġo".
T'e vədə Q'ONČUĞON pine: «Bezi amdarxoy boş bapi şot'oğo yəşəyinşest'ala nəfəs həmişəluğ tene, əfçibaki tağala bədənəxun q'erəz hik'k'al tet'un korox. Şot'o görəl sabaç̌ q'a usen vaxt'ez tast'a kot'oğo».

Verse: 4

Ṭe dööräsṭä, lap ošal, oćali ćoyel kakala, burux ḳinäḳ amdarxone buy. Morox amdarxoy xuyärmoġoy alaxunbitiṭoġoxun baki äyluxey. Šorox gele zorbaṭuniy, ičoġoy c̣iyal dünyäne hälä hazar usenxoxun ošal ṭaṗesay.
T'e döörəst'ə, lap oşal, oç̌ali ç̌oyel kakala, burux k'inək' amdarxone buy. Morox amdarxoy xuyərmoğoy alaxunbitit'oğoxun baki əyluxey. Şorox gele zorbat'uniy, içoğoy s'iyal dünyəne hələ hazar usenxoxun oşal t'ap'esay.

Verse: 5

Q̣ONƷ́UĠON be͑neġi ki, oćali ćoyel bakala amdarxo düz yaq̇axun č̣eri ṭetärṭun bake ki, ičoġoy vu͑ġ fikir suna pisluġbsune.
Q'ONČUĞON běneği ki, oç̌ali ç̌oyel bakala amdarxo düz yaq'axun c'eri t'etərt'un bake ki, içoğoy vǔğ fikir suna pisluğbsune.

Verse: 6

Oćali ćoyel amdar yaratmiši arcevksuni axəra metär aḳiyal gele pise baki, moṭo görä Iz üḳ q̇ać̣ṗi
Oç̌ali ç̌oyel amdar yaratmişi arśevksuni axıra metər ak'iyal gele pise baki, mot'o görə İz ük' q'ač'p'i

Verse: 7

pine: "Bez me oćali ćoyel yaratmiši arcevḳi amdarxo äfčiboz Zu! Šoṭoġoxun barabar oćalin ćoyel taraḳala q̇a xoreġala ḳä heyvan, göynul purḳala ḳä q̇uš bunesa šoṭoġoval äfčiboz, šoṭo görä ki, pe͑śmanebi Za Bezi yaratmišiṭoǧon".
pine: «Bez me oç̌ali ç̌oyel yaratmişi arśevk'i amdarxo əfçiboz Zu! Şot'oğoxun barabar oç̌alin ç̌oyel tarak'ala q'a xoreğala k'ə heyvan, göynul purk'ala k'ə q'uş bunesa şot'oğoval əfçiboz, şot'o görə ki, pěšmanebi Za Bezi yaratmişit'oǧon».

Verse: 8

Ama oćali ćoyel Q̣ONƷ́UĠOY piyes šaaṭ aḳeġala täk sa amdare buy, šoval Noyey. ^*
Ama oç̌ali ç̌oyel Q'ONČUĞOY piyes şaat' ak'eğala tək sa amdare buy, şoval Noyey. ^*

Buxaʒ́uġon Noya gämi düzbesṭun
Buxačuğon Noya gəmi düzbest'un

Verse: 9

   Moval Noye bel hariyorox:
   Moval Noye bel hariyorox:
   Häysä exlät taġala me dööräsṭä oćali ćoyel bakala amdarxoy boš düzgün, noxsansuz bakalo täk hame Noyey, šo Buxaʒ́uġo čalxi Šoṭin iču pi ḳinäḳ yäšäyinšalṭoġoxuney. ^*
   Həysə exlət tağala me döörəst'ə oç̌ali ç̌oyel bakala amdarxoy boş düzgün, noxsansuz bakalo tək hame Noyey, şo Buxačuğo çalxi Şot'in içu pi k'inək' yəşəyinşalt'oğoxuney. ^*

Verse: 10

Noye xib ġare buy: Šem, Xam saal Yafeṭ.
Noye xib ğare buy: Şem, Xam saal Yafet'.

Verse: 11

Buxaʒ́uġoy piyexune biti oćal, iriṭepi Šoṭin amdarxoy biq̇ala pis äšurxo aḳi.
Buxačuğoy piyexune biti oç̌al, irit'epi Şot'in amdarxoy biq'ala pis əşurxo ak'i.

Verse: 12

Buxaʒ́uġon be͑neġi amdarxo ṭemane düz yaq̇axun č̣eri pisluġi bać̣anexun taysa ki, dünyänä murdarluġen haq̇ene tanesa.
Buxačuğon běneği amdarxo t'emane düz yaq'axun c'eri pisluği bač'anexun taysa ki, dünyənə murdarluğen haq'ene tanesa.

Verse: 13

Ṭe vädä Buxaʒ́uġon Noya pine: "Oćali ćoyel bakala amdarxoy bitoṭu tumexun äfčiboz Zu, šoṭo görä ki, ičoġoy biq̇ala pis äšurxon buye me oćal. Šoṭoġoxun sagala me oćali ćoyel ḳä bunesa bitova äfčiboz.
T'e vədə Buxačuğon Noya pine: «Oç̌ali ç̌oyel bakala amdarxoy bitot'u tumexun əfçiboz Zu, şot'o görə ki, içoğoy biq'ala pis əşurxon buye me oç̌al. Şot'oğoxun sagala me oç̌ali ç̌oyel k'ə bunesa bitova əfçiboz.

Verse: 14

Hun isä vaynaḳ xe nu tärbala daxṭaḳaxun buṭ sa gämi düzba, iz boš otaġxoval bakeq̇an. Gäminä bonaxunal, ćoyexunal q̇ir duġa.
Hun isə vaynak' xe nu tərbala daxt'ak'axun but' sa gəmi düzba, iz boş otağxoval bakeq'an. Gəminə bonaxunal, ç̌oyexunal q'ir duğa.

Verse: 15

Šoṭo metär düzba: izi boxoyluġ xibbać ä͑m, ^* gengluġ älli ä͑m, alloyluġal otuz ä͑mq̇an baki.
Şot'o metər düzba: izi boxoyluğ xibbaç̌ ə̌m, ^* gengluğ əlli ə̌m, alloyluğal otuz ə̌mq'an baki.

Verse: 16

Gäminä alaxun ṭetär buṭḳa ki, härrämine sa ä͑m ga išiġ bisṭeynaḳ qayq̇an mandi, börinexun ćomoval laxa. Gämin bošṭan xib q̇atq̇an baki: oq̇in, bə͑ġin saal alin.
Gəminə alaxun t'etər but'k'a ki, hərrəmine sa ə̌m ga işiğ bist'eynak' qayq'an mandi, börinexun ç̌omoval laxa. Gəmin boşt'an xib q'atq'an baki: oq'in, bı̌ğin saal alin.

Verse: 17

Mone, Zu ṭetär booz ki, oćala xenen ćaxḳale, me dünyäne iz boš näfäs taci eġala ḳä bunesa ḳac̣eġale. Oćali ćoyel bakalorox bito äfčibaki taġale.
Mone, Zu t'etər booz ki, oç̌ala xenen ç̌axk'ale, me dünyəne iz boş nəfəs taśi eğala k'ə bunesa k'as'eğale. Oç̌ali ç̌oyel bakalorox bito əfçibaki tağale.

Verse: 18

Ama vaxun sa iräziluġez ġaćesa Zu, vi ġarmoġo, vi ġarmoġoy čupuxxo q̇a vi čuġoval exṭi me vi düzbi gäminä baġalnu hun.
Ama vaxun sa irəziluğez ğaç̌esa Zu, vi ğarmoğo, vi ğarmoğoy çupuxxo q'a vi çuğoval ext'i me vi düzbi gəminə bağalnu hun.

Verse: 19

Insanaxun q̇eräz iz boš elmux bakala ḳä bunesa šoṭoġoxunal härṭuxun sa čüt, yäni sa ärkäy, sa diši vaxun exṭalnu. Exṭalnu ki, šoroxal vaxun sagala dirisṭ mandeq̇aṭun.
İnsanaxun q'erəz iz boş elmux bakala k'ə bunesa şot'oğoxunal hərt'uxun sa çüt, yəni sa ərkəy, sa dişi vaxun ext'alnu. Ext'alnu ki, şoroxal vaxun sagala dirist' mandeq'at'un.

Verse: 20

Oćali ćoyel taraḳala q̇a xoreġala ḳä heyvan, göynul purḳala ḳä q̇uš bunesa, šoṭoġoxun härṭuxun sa čüt exṭi baġalnu ki, šoroxal maq̇aṭun ṗuri.
Oç̌ali ç̌oyel tarak'ala q'a xoreğala k'ə heyvan, göynul purk'ala k'ə q'uş bunesa, şot'oğoxun hərt'uxun sa çüt ext'i bağalnu ki, şoroxal maq'at'un p'uri.

Verse: 21

Vä͑ynaḳ ukun, šoṭoġoynaḳal geleǯä yem exṭa, ṭetär ba ki, ukunaxun q̇idluġ nu zapḳanan".
Və̌ynak' ukun, şot'oğoynak'al gelecə yem ext'a, t'etər ba ki, ukunaxun q'idluğ nu zapk'anan».

Verse: 22

Noyenal bitova Buxaʒ́uġon iču pi ḳinäḳ bine. ^*
Noyenal bitova Buxačuğon içu pi k'inək' bine. ^*

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.