TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 4

Chapter: 4

Ḳayin q̇a Avel
K'ayin q'a Avel

Verse: 1

Adamen iz čuux Yevaxun ə͑śaluġebi, Yeval bə͑hi baki sa ġare ečeri. Yevan me äylin c̣iya Ḳayin laxi pine: "Mone, äyel ečeri sa amdar be͑śez baki zu, Buxaʒ́uġone bi moṭo". ^*
Adamen iz çuux Yevaxun ı̌šaluğebi, Yeval bǐhi baki sa ğare eçeri. Yevan me əylin s'iya K'ayin laxi pine: «Mone, əyel eçeri sa amdar běšez baki zu, Buxačuğone bi mot'o». ^*

Verse: 2

Ḳayinaxun oša Yevan šoṭaynaḳ sa vičiyal enečeri, iz c̣iyal Avele laxi. Avel eġel be͑ġale baki, Ḳayinen isä oćali loxole äšpsay.
K'ayinaxun oşa Yevan şot'aynak' sa viçiyal eneçeri, iz s'iyal Avele laxi. Avel eğel běğale baki, K'ayinen isə oç̌ali loxole əşpsay.

Verse: 3

Sa heq̇ädär vädä hari č̣ovaneki, Ḳayinenal Q̣ONƷ́UĠOYNAḲ izi beǯäriši oćalen tadi baraxun paye ečeri.
Sa heq'ədər vədə hari c'ovaneki, K'ayinenal Q'ONČUĞOYNAK' izi becərişi oç̌alen tadi baraxun paye eçeri.

Verse: 4

Avelen isä iz sürünä bakala heyvanxoy süfṭin baloġoxun, šoṭoġoxun č̣eri č̣äyinäx ganxone pay ečeri. Šoṭay biq̇i me äš Q̣ONƷ́UĠOY üḳel baseḳi, Q̣ONƷ́UĠONAL Aveli ečeri me paya q̇abulebi. ^*
Avelen isə iz sürünə bakala heyvanxoy süft'in baloğoxun, şot'oğoxun c'eri c'əyinəx ganxone pay eçeri. Şot'ay biq'i me əş Q'ONČUĞOY ük'el basek'i, Q'ONČUĞONAL Aveli eçeri me paya q'abulebi. ^*

Verse: 5

Ḳayini ečeri paya isä Q̣ONƷ́UĠON tene q̇abulbi, Ḳayinenal äǯuġon biq̇i iz ḳodoġo cinepi.
K'ayini eçeri paya isə Q'ONČUĞON tene q'abulbi, K'ayinenal əcuğon biq'i iz k'odoğo śinepi.

Verse: 6

Q̣ONƷ́UĠON Ḳayina pine: "Vi äǯuġon heṭu göräne biq̇e? Heṭaynaḳen vi ḳodoġo cipe hun?
Q'ONČUĞON K'ayina pine: «Vi əcuğon het'u görəne biq'e? Het'aynak'en vi k'odoğo śipe hun?

Verse: 7

Ägär haq̇ galan vi ḳodoġo cipesa, vi ćoya tez axśumdon ki Zu? Ama metär bi vi boš źalensṭasa, vi üḳe xal bafṭene upsune. Günaxen va iz kiyel basṭune čuresa, ama hun šoṭoxun zorba bakalanu ki, va ə͑śa bites nu bakane".
Əgər haq' galan vi k'odoğo śipesa, vi ç̌oya tez axšumdon ki Zu? Ama metər bi vi boş ǰalenst'asa, vi ük'e xal baft'ene upsune. Günaxen va iz kiyel bast'une çuresa, ama hun şot'oxun zorba bakalanu ki, va ı̌ša bites nu bakane».

Verse: 8

Sa ġiyal Ḳayinen iz viči Avela "eki čöle taġen" pi haq̇i čölene taci. Ṭiya ṗaṗiyal Aveli loxol taci šoṭo besebi. ^*
Sa ğiyal K'ayinen iz viçi Avela "eki çöle tağen" pi haq'i çölene taśi. T'iya p'ap'iyal Aveli loxol taśi şot'o besebi. ^*

Verse: 9

Ṭe vädä Q̣ONƷ́UĠON Ḳayinaxun xavare haq̇i: "Vi viči Avel maya?" Šoṭinal qaybaki "ḳäz ava, vičey q̇aroola zaṗḳalzu zu?" pine.
T'e vədə Q'ONČUĞON K'ayinaxun xavare haq'i: «Vi viçi Avel maya?» Şot'inal qaybaki "k'əz ava, viçey q'aroola zap'k'alzu zu?" pine.

Verse: 10

Q̣ONƷ́UĠON pine: "Ḳän bi hun? Vi vičey ṗiyan cipi, isääl ṭe ṗiyen muz qaypi Zane ḳale, "bezi häyifä haq̇a" nexe. ^*
Q'ONČUĞON pine: «K'ən bi hun? Vi viçey p'iyan śipi, isəəl t'e p'iyen muz qaypi Zane k'ale, "bezi həyifə haq'a" nexe. ^*

Verse: 11

Mone, q̇arġiši q̇onʒ́uxen baki hun, vi kiin cipi vičey ṗiya q̇uč̣ṗi oćalenal va irapedi.
Mone, q'arğişi q'ončuxen baki hun, vi kiin śipi viçey p'iya q'uc'p'i oç̌alenal va irapedi.

Verse: 12

Meyin oša hun oćala beǯärišalbayin šoṭin va hiḳḳal tene tadal. Vi ḳožaxun-mesaxun bakalnu hun, ömüri axəral ciriḳ dädärgün bakalnu".
Meyin oşa hun oç̌ala becərişalbayin şot'in va hik'k'al tene tadal. Vi k'ojaxun-mesaxun bakalnu hun, ömüri axıral śirik' dədərgün bakalnu».

Verse: 13

Ḳayinen Q̣ONƷ́UĠO pine: "Me ǯaza bezi zapes bakalṭuxun bə͑hine baki.
K'ayinen Q'ONČUĞO pine: «Me caza bezi zapes bakalt'uxun bı̌hine baki.

Verse: 14

Za häysä šäṗensa me oćalaxun, zuval Vi piin be͑śṭan aćoz, bezi ḳožaxun-mesaxun baki dädärgün bakoz. Ama memiin č̣eysun q̇a za šinesa biq̇i bespsun sa bakale".
Za həysə şəp'ensa me oç̌alaxun, zuval Vi piin běšt'an aç̌oz, bezi k'ojaxun-mesaxun baki dədərgün bakoz. Ama memiin c'eysun q'a za şinesa biq'i bespsun sa bakale».

Verse: 15

Q̣ONƷ́UĠON isä qaybaki metäre pi: "Ketär tene, va besṗalṭuxun Bez äǯuġo vu͑ġ q̇at haq̇oz!" Metär piyal Q̣ONƷ́UĠON Ḳayini loxol niśane laxi ki, šoṭay loxol kul alabi iz elmoġo haq̇al maq̇an baki.
Q'ONČUĞON isə qaybaki metəre pi: «Ketər tene, va besp'alt'uxun Bez əcuğo vǔğ q'at haq'oz!» Metər piyal Q'ONČUĞON K'ayini loxol nišane laxi ki, şot'ay loxol kul alabi iz elmoğo haq'al maq'an baki.

Verse: 16

Metärluġen, Ḳayin Q̣ONƷ́UĠOY piin be͑śṭan aneći, Eden ganuxun be͑ġč̣eġalač taciyal Nod ^* uḳala ganune yäšäyinšbsa burqi.
Metərluğen, K'ayin Q'ONČUĞOY piin běšt'an aneç̌i, Eden ganuxun běğc'eğalaç taśiyal Nod ^* uk'ala ganune yəşəyinşbsa burqi.

Ḳayinaxun bakiyorox
K'ayinaxun bakiyorox

Verse: 17

Ḳayinen iz čuġoxun ə͑śaluġebi, čuuxal bə͑hi baki Xanoḳane ečeri. Ṭe vädä Ḳayinen sa šähäre biq̇say, ečeriyal me šähäri c̣iya iz ġare c̣iyaxune laxi, yäni Xanoḳ.
K'ayinen iz çuğoxun ı̌šaluğebi, çuuxal bǐhi baki Xanok'ane eçeri. T'e vədə K'ayinen sa şəhəre biq'say, eçeriyal me şəhəri s'iya iz ğare s'iyaxune laxi, yəni Xanok'.

Verse: 18

Xanoḳaxun Irade baki. Iradaxun Mehuyael uḳala ġare baki. Mehuyaelaxun Meṭušaele baki. Meṭušaelaxunal izi ġar Lemeḳe baki.
Xanok'axun İrade baki. İradaxun Mehuyael uk'ala ğare baki. Mehuyaelaxun Met'uşaele baki. Met'uşaelaxunal izi ğar Lemek'e baki.

Verse: 19

Lemeḳen ṗä͑ čuuxe haq̇i: sunṭay c̣i Ada, ṭe sunṭay c̣i Cillaney.
Lemek'en p'ə̌ çuuxe haq'i: sunt'ay s'i Ada, t'e sunt'ay s'i Śillaney.

Verse: 20

Adan ġare ečeri, iz c̣i Yaval. Eġel q̇a beli be͑ġi iz sürüġoynaḳ šaaṭ otarišala ga bä͑ġä͑biṭuxun oša iz čadəral haṭe gala laxi yäšäyinšalo süfṭä hame Yavale baki.
Adan ğare eçeri, iz s'i Yaval. Eğel q'a beli běği iz sürüğoynak' şaat' otarişala ga bə̌ğə̌bit'uxun oşa iz çadıral hat'e gala laxi yəşəyinşalo süft'ə hame Yavale baki.

Verse: 21

Yavali sa vičiyal buney, iz c̣i Yuval. Me Yuval isä än süfṭä arfa q̇a ṭüṭṭäy farpiyone bake.
Yavali sa viçiyal buney, iz s'i Yuval. Me Yuval isə ən süft'ə arfa q'a t'üt't'əy farpiyone bake.

Verse: 22

Lemeḳi Cillaxun baki ġare c̣i isä Ṭuval-Ḳayiney. Šo dämir ṭaṗḳaley. Dämirä q̇a tunǯa xebiṭuxun oša šoṭoġo ṭapi här ǯür äṭṭäǯ düzbiyo süfṭä hame Ṭuval-Ḳayine bake. Šoṭay sa xunčiyal buney, iz c̣i Naama.
Lemek'i Śillaxun baki ğare s'i isə T'uval-K'ayiney. Şo dəmir t'ap'k'aley. Dəmirə q'a tunca xebit'uxun oşa şot'oğo t'api hər cür ət't'əc düzbiyo süft'ə hame T'uval-K'ayine bake. Şot'ay sa xunçiyal buney, iz s'i Naama.

Verse: 23

   Sa ġi Lemeḳen iz čupuxxo ḳalpi pine:
   Sa ği Lemek'en iz çupuxxo k'alpi pine:
   "Ay Ada q̇a Cilla, u͑mu͑xlaxanan!
   «Ay Ada q'a Śilla, ǔmǔxlaxanan!
   Ay Lemeḳi čupuxxo, ibakanan ḳäz nex!
   Ay Lemek'i çupuxxo, ibakanan k'əz nex!
   Bez loxol kul alabsun čureġalṭay elmoġoz haq̇on zu,
   Bez loxol kul alabsun çureğalt'ay elmoğoz haq'on zu,
   Za duġsun čureġala ǯäyilä besezbon!
   Za duğsun çureğala cəyilə besezbon!

Verse: 24

   Ḳayina görä vu͑ġ q̇at äǯuġ haq̇eġalesa,
   K'ayina görə vǔğ q'at əcuğ haq'eğalesa,
   Lemeḳa görä yetmiš vu͑ġ q̇at haq̇eġale".
   Lemek'a görə yetmiş vǔğ q'at haq'eğale».

Šeṭ q̇a Enoš
Şet' q'a Enoş

Verse: 25

Adamen ṗurum iz čuġoxun ə͑śaluġebi, iz čuux Yevanal sa ġar ečeri iz c̣iya Šeṭe ^* laxi. Šoṭin metäre pi: "Ḳayinen besṗi Aveli gala Buxaʒ́uġon za me ġarane pay tadi".
Adamen p'urum iz çuğoxun ı̌šaluğebi, iz çuux Yevanal sa ğar eçeri iz s'iya Şet'e ^* laxi. Şot'in metəre pi: «K'ayinen besp'i Aveli gala Buxačuğon za me ğarane pay tadi».

Verse: 26

Šeṭe izi ġar bakaṭan isä šoṭay c̣iya Enoše laxi. Amdarxon Q̣ONƷ́UĠOY c̣iya duġi afərəpsunal hame vädämoġone burqeci.
Şet'e izi ğar bakat'an isə şot'ay s'iya Enoşe laxi. Amdarxon Q'ONČUĞOY s'iya duği afırıpsunal hame vədəmoğone burqeśi.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.