TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 2

Chapter: 2

Verse: 1

Hametär, Buxaʒ́uġon göyä q̇a göynul bakalṭoġo, oćala q̇a oćali ćoyel bakalṭoġo bitova yaratmiši čareḳi.
Hametər, Buxačuğon göyə q'a göynul bakalt'oğo, oç̌ala q'a oç̌ali ç̌oyel bakalt'oğo bitova yaratmişi çarek'i.

Verse: 2

Buxaʒ́uġon me u͑q ġinasṭa Iz biq̇ala äšurxo bitova čarḳi vu͑ġu͑mǯi ġine isä Iču äšlä tene duġi. ^*
Buxačuğon me ǔq ğinast'a İz biq'ala əşurxo bitova çark'i vǔğǔmci ğine isə İçu əşlə tene duği. ^*

Verse: 3

Buxaʒ́uġon vu͑ġu͑mǯi ġina xeyir-bäräkät tadi šoṭo ṭiyä͑mi ġimxoxun üsṭüne laxi, šoṭo görä ki, ṭe ġi Izi me yaratmišbsuni äšurxo čarḳi dinǯäyinšakala ġine baki. ^*
Buxačuğon vǔğǔmci ğina xeyir-bərəkət tadi şot'o t'iyə̌mi ğimxoxun üst'üne laxi, şot'o görə ki, t'e ği İzi me yaratmişbsuni əşurxo çark'i dincəyinşakala ğine baki. ^*

Verse: 4

Q̣ONƷ́UX Buxaʒ́uġon göyä q̇a oćala yaratmišbsun metäre bakey.
Q'ONČUX Buxačuğon göyə q'a oç̌ala yaratmişbsun metəre bakey.

Adam q̇a Yeva Eden uḳala ganu
Adam q'a Yeva Eden uk'ala ganu

Q̣ONƷ́UX Buxaʒ́uġon göyä q̇a oćala yaratmišaṭan
Q'ONČUX Buxačuğon göyə q'a oç̌ala yaratmişat'an

Verse: 5

oćali ćoyel nä sa dänä xod uḳala šey tene buy, nääl sa dänä göyün o, šoṭo görä ki, Q̣ONƷ́UX Buxaʒ́uġon oćali loxol hälä aġala tene cipey. Oćala bäǯärišes bakala amdaral tene yaratmišey hälä.
oç̌ali ç̌oyel nə sa dənə xod uk'ala şey tene buy, nəəl sa dənə göyün o, şot'o görə ki, Q'ONČUX Buxačuğon oç̌ali loxol hələ ağala tene śipey. Oç̌ala bəcərişes bakala amdaral tene yaratmişey hələ.

Verse: 6

Sayǯä oq̇axun č̣eġala xene lafsṭay oćala.
Saycə oq'axun c'eğala xene lafst'ay oç̌ala.

Verse: 7

Q̣ONƷ́UX Buxaʒ́uġonal ečeri ḳulaxun amdare ^* düzbi. Šoṭay bo͑xmo͑ġoxun fupi Izi elmux tadala näfäsäne bapi šoṭay boš, amdaral diriläyinšebaki. ^* nex.
Q'ONČUX Buxačuğonal eçeri k'ulaxun amdare ^* düzbi. Şot'ay bǒxmǒğoxun fupi İzi elmux tadala nəfəsəne bapi şot'ay boş, amdaral diriləyinşebaki. ^* nex.

Verse: 8

Oša Q̣ONƷ́UX Buxaʒ́uġon be͑ġč̣eġala täräf bakala Edena sa gane lasaki, ečeriyal Izi yaratmiši amdara ṭiya arceveḳi.
Oşa Q'ONČUX Buxačuğon běğc'eğala tərəf bakala Edena sa gane lasaki, eçeriyal İzi yaratmişi amdara t'iya arśevek'i.

Verse: 9

Q̣ONƷ́UX Buxaʒ́uġon ṭetäre bi ki, ṭe ganu ǯürbäǯür xodure č̣eri: ham ičoġoy loxol be͑ġaṭan üḳ qayeġala, hamal ičoġoy č̣eḳala meyvoġo čuki ukes bakala. Gane bə͑yex isä yäšäyinš tadala xode buy saal šaaṭ-pis ḳä baksuna avabakesṭala xod. ^*
Q'ONČUX Buxačuğon t'etəre bi ki, t'e ganu cürbəcür xodure c'eri: ham içoğoy loxol běğat'an ük' qayeğala, hamal içoğoy c'ek'ala meyvoğo çuki ukes bakala. Gane bı̌yex isə yəşəyinş tadala xode buy saal şaat'-pis k'ə baksuna avabakest'ala xod. ^*

Verse: 10

Me Eden uḳala ganuxun oqe taysay, me oćala xe duġsun č̣ovaki taciyal biṗ galane ǯöybaksay.
Me Eden uk'ala ganuxun oqe taysay, me oç̌ala xe duğsun c'ovaki taśiyal bip' galane cöybaksay.

Verse: 11

Me ǯöybaki taġala oqe sunṭay c̣i Pišone, manu ki, dirisṭ Xavila bölginäxune č̣ovaki taysa. Miya hälä q̇əzəlal baneksa,
Me cöybaki tağala oqe sunt'ay s'i Pişone, manu ki, dirist' Xavila bölginəxune c'ovaki taysa. Miya hələ q'ızılal baneksa,

Verse: 12

ičal šaaṭ q̇əzəle miyanin q̇əzəl. Me bölginä xodurxoxun č̣eġala šaaṭ adeġala mätäl baneksa, oniks uḳala toyexlu źe͑yal.
içal şaat' q'ızıle miyanin q'ızıl. Me bölginə xodurxoxun c'eğala şaat' adeğala mətəl baneksa, oniks uk'ala toyexlu ǰěyal.

Verse: 13

P̣ä͑mǯi oqe c̣i Gixone. Šo Ḳuš bölginäxune č̣ovaki taysa.
P'ə̌mci oqe s'i Gixone. Şo K'uş bölginəxune c'ovaki taysa.

Verse: 14

   Xibimǯi oq Ṭigre, šo Aššur uḳala šähäri be͑ġč̣eġala täräfäxune č̣ovaki taysa.
   Xibimci oq T'igre, şo Aşşur uk'ala şəhəri běğc'eğala tərəfəxune c'ovaki taysa.
   Biṗimǯiyo isä Yevfrat uḳala oqe.
   Bip'imciyo isə Yevfrat uk'ala oqe.

Verse: 15

Q̣ONƷ́UX Buxaʒ́uġon amdara me Eden ganu arceveki ki, šoṭo äšṗi be͑ġeq̇an.
Q'ONČUX Buxačuğon amdara me Eden ganu arśeveki ki, şot'o əşp'i běğeq'an.

Verse: 16

Q̣ONƷ́UX Buxaʒ́uġon amdara metäre tapšurbi: "Ganu bakala bito xodurxoy meyvinäxun čuki ukes bankon,
Q'ONČUX Buxačuğon amdara metəre tapşurbi: «Ganu bakala bito xodurxoy meyvinəxun çuki ukes bankon,

Verse: 17

sayǯä šaaṭa q̇a pisa avabakesṭala xodin meyvinäxun bašq̇a. Ṭe xodin meyvinäxun čuki uksunen bisun ečale". ^*
saycə şaat'a q'a pisa avabakest'ala xodin meyvinəxun başq'a. T'e xodin meyvinəxun çuki uksunen bisun eçale». ^*

Verse: 18

Oša Q̣ONƷ́UX Buxaʒ́uġon metäre pi: "Amdari savsa baksun šaaṭ tene, barta šoṭaynaḳ ičuxun biq̇ala soġo yaratmišaz, iz kula alabeq̇an".
Oşa Q'ONČUX Buxačuğon metəre pi: «Amdari savsa baksun şaat' tene, barta şot'aynak' içuxun biq'ala soğo yaratmişaz, iz kula alabeq'an».

Verse: 19

Q̣ONƷ́UX Buxaʒ́uġonal ečeri oćali ḳulaxun bito ä͑qnä heyvanxo q̇a göynul purḳala q̇ušurxone yaratmiši. Oša šoṭoġo amdari ṭo͑ġo͑le ečeri ki, be͑yn šoṭoġo hetär c̣iya tasṭa, amdarenal šoṭoġo hetär c̣i tanedisa, šorox haṭetäräl ḳaleci.
Q'ONČUX Buxačuğonal eçeri oç̌ali k'ulaxun bito ə̌qnə heyvanxo q'a göynul purk'ala q'uşurxone yaratmişi. Oşa şot'oğo amdari t'ǒğǒle eçeri ki, běyn şot'oğo hetər s'iya tast'a, amdarenal şot'oğo hetər s'i tanedisa, şorox hat'etərəl k'aleśi.

Verse: 20

Hametär, amdaren ḳožin heyvanxoy, göynul purḳala q̇ušurxoy saal ä͑qnä heyvanxoy bitoṭu c̣ine tadi, ama me heyvanxoy bošṭan ičuxun biq̇ala, iz kula alabes bakala kömäyči tene bä͑ġä͑yeci.
Hametər, amdaren k'ojin heyvanxoy, göynul purk'ala q'uşurxoy saal ə̌qnə heyvanxoy bitot'u s'ine tadi, ama me heyvanxoy boşt'an içuxun biq'ala, iz kula alabes bakala köməyçi tene bə̌ğə̌yeśi.

Verse: 21

Ṭe vädä Q̣ONƷ́UX Buxaʒ́uġon ṭetäre bi ki, amdara bä͑ġä͑loy neṗene tašeri, neṗax vädineyal šoṭay ṭoḳmaśin sunṭu č̣evḳi iz ganu yeq̇en buṭeḳi.
T'e vədə Q'ONČUX Buxačuğon t'etəre bi ki, amdara bə̌ğə̌loy nep'ene taşeri, nep'ax vədineyal şot'ay t'ok'mašin sunt'u c'evk'i iz ganu yeq'en but'ek'i.

Verse: 22

Q̣ONƷ́UX Buxaʒ́uġon me ṭoḳmaśinaxun čuux düzbi šoṭo amdari ṭo͑ġo͑le ečeri.
Q'ONČUX Buxačuğon me t'ok'mašinaxun çuux düzbi şot'o amdari t'ǒğǒle eçeri.

Verse: 23

   Amdarenal pine:
   Amdarenal pine:
   "Isä pes bazkon ki,
   «İsə pes bazkon ki,
   Iz u͑q̇en bez u͑q̇enaxun,
   İz ǔq'en bez ǔq'enaxun,
   Iz yeq̇ bez yeq̇axun bakalṭu bä͑ġä͑zbi.
   İz yeq' bez yeq'axun bakalt'u bə̌ğə̌zbi.
   Barta ko čuuxq̇an ḳaleci,
   Barta ko çuuxq'an k'aleśi,
   Šoṭo görä ki, išq̇araxune haq̇ece". ^*
   Şot'o görə ki, işq'araxune haq'eśe». ^*
   "čuux" äyitmux suna ošq̇are, šoṭo göräne metär nex. Ṭe muzin "iš" išq̇ar, "išša" isä čuux upsune.
   "çuux" əyitmux suna oşq'are, şot'o görəne metər nex. T'e muzin "iş" işq'ar, "işşa" isə çuux upsune.

Verse: 24

Moṭo göräne oša išq̇ar iz bava- nanaxun ǯöybaki iz čuġo ġaćeci, ṗo͑ġo͑ sa bädän baki. ^*
Mot'o görəne oşa işq'ar iz bava- nanaxun cöybaki iz çuğo ğaç̌eśi, p'ǒğǒ sa bədən baki. ^*

Verse: 25

Adamal, ^* iz ṭo͑ġo͑l bakala čuuxal čuplaxṭun taraney, ama ičoġosṭa oṭ buteney.
Adamal, ^* iz t'ǒğǒl bakala çuuxal çuplaxt'un taraney, ama içoğost'a ot' buteney.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.