TITUS Texts: Biblia Udica, Versio Nizhensis: Vetus Testamentum

TITUS
Text collection: VT
The Udi Bible (Nij version)

Old Testament Books

on the basis of the translation by
Racik Aǧacani, Rafik Danakari, Elmina Danakari, Robert Mobili and Naida Rzaeva
as published on https ://www.udibibliya.com
and in
Rut' - Iona / Rut - Yunus,
Chambersburg 2009,
electronically prepared by Wolfgang Schulze and Jost Gippert,
Gräfensteinberg, 2009 / Hamburg, 2022;
TITUS version by Jost Gippert,
Hamburg, 6.6.2022 / 30.11.2024

Book: Gen.
Chapter: 1

Dünyäni yaranmišaksun
Dünyəni yaranmişaksun

Verse: 1

Burqesunasṭa Buxaʒ́uġon süfṭä göyä q̇a oćalane yaratmiši. ^*
Burqesunast'a Buxačuğon süft'ə göyə q'a oç̌alane yaratmişi. ^*

Verse: 2

Dünyä amc̣inaxunal amc̣iney. Oćali ćoyel bakala bä͑ġä͑loy xeyurxoy loxolal bayinq̇luġaxun q̇eräz hiḳḳal buteney, sayǯä Buxaʒ́uġoy näfäse ^* hari taysay ṭe xeyurxoy loxol.
Dünyə ams'inaxunal ams'iney. Oç̌ali ç̌oyel bakala bə̌ğə̌loy xeyurxoy loxolal bayinq'luğaxun q'erəz hik'k'al buteney, saycə Buxačuğoy nəfəse ^* hari taysay t'e xeyurxoy loxol.

Verse: 3

Buxaʒ́uġon pine: "Barta išiġq̇an baki". ^* Išiġal baneki.
Buxačuğon pine: «Barta işiğq'an baki». ^* İşiğal baneki.

Verse: 4

Buxaʒ́uġon aneḳi ki, išiġ šaaṭ šeye, ečeriyal šoṭo bayinq̇luġaxun ǯöyebi.
Buxačuğon anek'i ki, işiğ şaat' şeye, eçeriyal şot'o bayinq'luğaxun cöyebi.

Verse: 5

Šoṭin išiġi c̣iya "ġenaxun", bayinq̇luġi c̣iya isä "üšene" laxi. Biyänebaki, oša saal išiġe biti -- mo samǯi ġi.
Şot'in işiği s'iya "ğenaxun", bayinq'luği s'iya isə "üşene" laxi. Biyənebaki, oşa saal işiğe biti -- mo samci ği.

Verse: 6

Oša Buxaʒ́uġon pine: "Barta xene qə͑yo alaq̇an laci, me ṗä͑ xeyurxo sunaxun ǯöybseynaḳal ičoġoy arane zahmanq̇an baki".
Oşa Buxačuğon pine: «Barta xene qı̌yo alaq'an laśi, me p'ə̌ xeyurxo sunaxun cöybseynak'al içoğoy arane zahmanq'an baki».

Verse: 7

Haketäräl baneki, Buxaʒ́uġon havinaxun bakala sa zahman yaratmiši xeyurxoy qə͑ṭu me zahmanaxun ala, qə͑ṭuval oq̇ane efi.
Haketərəl baneki, Buxačuğon havinaxun bakala sa zahman yaratmişi xeyurxoy qǐt'u me zahmanaxun ala, qǐt'uval oq'ane efi.

Verse: 8

Buxaʒ́uġon me zahmani c̣iya "göye" laxi. Biyänebaki, oša saal išiġe biti -- mo ṗä͑mǯi ġi. ^*
Buxačuğon me zahmani s'iya "göye" laxi. Biyənebaki, oşa saal işiğe biti -- mo p'ə̌mci ği. ^*

Verse: 9

Oša Buxaʒ́uġon pine: "Barta göye oq̇a bakala xeyurxo sagala gireceq̇an ki, q̇ariluġq̇an aḳeci". Haketäräl baneki.
Oşa Buxačuğon pine: «Barta göye oq'a bakala xeyurxo sagala gireśeq'an ki, q'ariluğq'an ak'eśi». Haketərəl baneki.

Verse: 10

Buxaʒ́uġon q̇ariluġi c̣iya "oćal", gireci xeyurxoy c̣iya isä "dänizxone" laxi. Buxaʒ́uġon aneḳi ki, mo šaaṭe.
Buxačuğon q'ariluği s'iya "oç̌al", gireśi xeyurxoy s'iya isə "dənizxone" laxi. Buxačuğon anek'i ki, mo şaat'e.

Verse: 11

Oša Buxaʒ́uġon pine: "Barta oćali ćoye bitḳiyoxq̇an č̣eri: iz cil iz loxol bakala oyurxoxun burqi cilurxo iz č̣eḳala meyvin boš bakala här ǯür xodurxol ciriḳ". Haketäräl baneki.
Oşa Buxačuğon pine: «Barta oç̌ali ç̌oye bitk'iyoxq'an c'eri: iz śil iz loxol bakala oyurxoxun burqi śilurxo iz c'ek'ala meyvin boş bakala hər cür xodurxol śirik'». Haketərəl baneki.

Verse: 12

Oćalen bitḳiyoxe ämälä ečeri: iz cil iz loxol bakala oyurxoxun burqi cilurxo iz č̣eḳala meyvin boš bakala här ǯür xodurxol ciriḳ. Buxaʒ́uġonal aneḳi ki, mo šaaṭe.
Oç̌alen bitk'iyoxe əmələ eçeri: iz śil iz loxol bakala oyurxoxun burqi śilurxo iz c'ek'ala meyvin boş bakala hər cür xodurxol śirik'. Buxačuğonal anek'i ki, mo şaat'e.

Verse: 13

Biyänebaki, oša saal išiġe biti -- mo xibimǯi ġi.
Biyənebaki, oşa saal işiğe biti -- mo xibimci ği.

Verse: 14

Oša Buxaʒ́uġon pine: "Barta göynul üše išiġ sakseynaḳ ǯöy, ġenaxun išiġ sakseynaḳ ǯöy čəraġq̇an baki, barta šoṭoġon useni mi xašurxo q̇a gam xašurxo, ġimxoy boxoybaksuna q̇a gödäybaksuna, useni burqsuna q̇a čarksunaq̇aṭun aḳesṭi.
Oşa Buxačuğon pine: «Barta göynul üşe işiğ sakseynak' cöy, ğenaxun işiğ sakseynak' cöy çırağq'an baki, barta şot'oğon useni mi xaşurxo q'a gam xaşurxo, ğimxoy boxoybaksuna q'a gödəybaksuna, useni burqsuna q'a çarksunaq'at'un ak'est'i.

Verse: 15

Barta šorox göynul boḳala čiraġ baki oćali ćoyel išiġq̇aṭun saki". Haketäräl baneki.
Barta şorox göynul bok'ala çirağ baki oç̌ali ç̌oyel işiğq'at'un saki». Haketərəl baneki.

Verse: 16

Buxaʒ́uġon ṗä͑ dänä kala čiraġe yaratmiši. Kalaṭin ġenaxun č̣eri kalaluġbaley, samal mic̣iḳṭin isä üše. Šoṭin hamal muć̣uliġone yaratmiši.
Buxačuğon p'ə̌ dənə kala çirağe yaratmişi. Kalat'in ğenaxun c'eri kalaluğbaley, samal mis'ik't'in isə üşe. Şot'in hamal muč'uliğone yaratmişi.

Verse: 17

Oša Buxaʒ́uġon šoṭoġo göynul ṭaḳepi ki, oćali ćoyel išiġq̇aṭun saki.
Oşa Buxačuğon şot'oğo göynul t'ak'epi ki, oç̌ali ç̌oyel işiğq'at'un saki.

Verse: 18

Šoṭoġonal burṭunqi härṭin ičeynaḳ laxeci vädine č̣eri šünä ġenaxun, bayinq̇luġa išiġaxun ǯöybsa. Buxaʒ́uġonal aneḳi ki, mo šaaṭe.
Şot'oğonal burt'unqi hərt'in içeynak' laxeśi vədine c'eri şünə ğenaxun, bayinq'luğa işiğaxun cöybsa. Buxačuğonal anek'i ki, mo şaat'e.

Verse: 19

Biyänebaki, oša saal išiġe biti -- mo biṗimǯi ġi.
Biyənebaki, oşa saal işiğe biti -- mo bip'imci ği.

Verse: 20

Oša Buxaʒ́uġon pine: "Barta xeyurxo hari iz boš elmux bakala ǯürbäǯür heyvanxon buybakeq̇an, barta oćali ćoyelxun ala, göynul q̇ušurxoq̇an purpi".
Oşa Buxačuğon pine: «Barta xeyurxo hari iz boş elmux bakala cürbəcür heyvanxon buybakeq'an, barta oç̌ali ç̌oyelxun ala, göynul q'uşurxoq'an purpi».

Verse: 21

Buxaʒ́uġonal kakala čäliyox q̇a xene boš źalḳala här ǯür heyvanxone yaratmiši, göynul purpes bakala här ǯür q̇ušurxoval yaratmišebi. Buxaʒ́uġon aneḳi ki, mo šaaṭe.
Buxačuğonal kakala çəliyox q'a xene boş ǰalk'ala hər cür heyvanxone yaratmişi, göynul purpes bakala hər cür q'uşurxoval yaratmişebi. Buxačuğon anek'i ki, mo şaat'e.

Verse: 22

Oša šoṭoġo xeyir-bäräkät tadi pine: "Avuzbakanan, gelebaki dänizi xeyurxo buybanan, barta q̇ušurxoval gelebakeq̇an".
Oşa şot'oğo xeyir-bərəkət tadi pine: «Avuzbakanan, gelebaki dənizi xeyurxo buybanan, barta q'uşurxoval gelebakeq'an».

Verse: 23

Biyänebaki, oša saal išiġe biti -- mo qomǯi ġi.
Biyənebaki, oşa saal işiğe biti -- mo qomci ği.

Verse: 24

Oša Buxaʒ́uġon pine: "Barta oćali ćoyel här ǯür heyvanq̇an baki: beliġoxun q̇a eġelxoxun burqi xoreġala heyvanxoxun q̇a čöle bakala här ǯür ä͑qnä heyvanxol ciriḳ". Haketäräl baneki.
Oşa Buxačuğon pine: «Barta oç̌ali ç̌oyel hər cür heyvanq'an baki: beliğoxun q'a eğelxoxun burqi xoreğala heyvanxoxun q'a çöle bakala hər cür ə̌qnə heyvanxol śirik'». Haketərəl baneki.

Verse: 25

Buxaʒ́uġon här ǯür ä͑qnä heyvan, beliyox q̇a eġelxo saal oćali ćoyel xoreġala ǯürbäǯür heyvanxone yaratmiši. Buxaʒ́uġonal aneḳi ki, mo šaaṭe.
Buxačuğon hər cür ə̌qnə heyvan, beliyox q'a eğelxo saal oç̌ali ç̌oyel xoreğala cürbəcür heyvanxone yaratmişi. Buxačuğonal anek'i ki, mo şaat'e.

Verse: 26

Oša Buxaʒ́uġon pine: "Yallariḳ saal yax ošq̇ardala amdar yaratmišen. Barta šoṭin dänizi boš bakala čäliġoy, göynul purḳala q̇ušurxoy, oćali ćoyel taraḳala q̇a xoreġala bito heyvanxoy saal oćali iziyal loxol kalaluġq̇anbi". ^*
Oşa Buxačuğon pine: «Yallarik' saal yax oşq'ardala amdar yaratmişen. Barta şot'in dənizi boş bakala çəliğoy, göynul purk'ala q'uşurxoy, oç̌ali ç̌oyel tarak'ala q'a xoreğala bito heyvanxoy saal oç̌ali iziyal loxol kalaluğq'anbi». ^*

Verse: 27

Metärluġen, Buxaʒ́uġon amdare yaratmiši, šoṭo Iču ošq̇are yaratmiši. Buxaʒ́uġon ham čuux, ham išq̇are yaratmiši. ^*
Metərluğen, Buxačuğon amdare yaratmişi, şot'o İçu oşq'are yaratmişi. Buxačuğon ham çuux, ham işq'are yaratmişi. ^*

Verse: 28

Buxaʒ́uġon šoṭoġo xeyir-bäräkät tadi pine: "Avuzbakanan, gelebaki oćali ćoya buybanan. Dänizi boš bakala čäliġoy, göynul purḳala q̇ušurxoy, oćali ćoyel taraḳala q̇a xoreġala bito heyvanxoy q̇a oćali iziyal loxol kalaluġbanan". ^*
Buxačuğon şot'oğo xeyir-bərəkət tadi pine: «Avuzbakanan, gelebaki oç̌ali ç̌oya buybanan. Dənizi boş bakala çəliğoy, göynul purk'ala q'uşurxoy, oç̌ali ç̌oyel tarak'ala q'a xoreğala bito heyvanxoy q'a oç̌ali iziyal loxol kalaluğbanan». ^*

Verse: 29

Oša Buxaʒ́uġon pine: "Mone, oćali ćoyel iz cil iz loxol bakala bito oyurxoxun q̇a cilurxo iz č̣eḳala meyvin boš
Oşa Buxačuğon pine: «Mone, oç̌ali ç̌oyel iz śil iz loxol bakala bito oyurxoxun q'a śilurxo iz c'ek'ala meyvin boş

Verse: 30

Iz boš näfäs taci eġala heyvanxoy bitoṭin isä, göynul purḳala q̇ušurxon, oćali ćoyel taraḳala q̇a xoreġala ḳä heyvan bunesa bitoṭin, göyün oyaxun ukale". Haketäräl baneki.
İz boş nəfəs taśi eğala heyvanxoy bitot'in isə, göynul purk'ala q'uşurxon, oç̌ali ç̌oyel tarak'ala q'a xoreğala k'ə heyvan bunesa bitot'in, göyün oyaxun ukale». Haketərəl baneki.

Verse: 31

Buxaʒ́uġonal aneḳi ki, Iz yaratmiši här šey gele šaaṭe. Biyänebaki, oša saal išiġe biti - mo u͑qu͑mǯi ġi.
Buxačuğonal anek'i ki, İz yaratmişi hər şey gele şaat'e. Biyənebaki, oşa saal işiğe biti -- mo ǔqǔmci ği.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.