მოხუცებული საყუარელსა გაიოზს, რომელი მიყუარს ჭეშმარიტებითა.
საყუარელო, ყოვლისათჳს გლოცავ შენ წარმართებად, ვითარცა-ეგე წარუმართებიეს სულსა შენსა.
რამეთუ განვიხარე ფრიად მომავალთაგან ძმათა, რომელნი წამებდეს ჭეშმარიტებისა შენისათჳს, ვითარ-იგი შენ ჭეშმარიტებით ხუალ.
სხუა უფროს ამისა სიხარული არა მაქუს, რაჲთა მესმოდის შვილთა ჩემთა ჭეშმარიტებით სლვაჲ.
საყუარელო, სარწმუნოდ ჰყოფ, რომელსა-ეგე იქმ ძმათა მიმართ და ესე უცხოთა.
რომელთა წამეს ჭეშმარიტებისა შინისათჳს წინაშე ეკლესიათა, რომელთა კეთილსა ჰყოფ, წარმოჰგზავნი მათ ღირსად ღმრთისა.
რამეთუ სახელისა მისისათჳს უფლისა გამოვიდეს და არარაჲ გამოიღეს წარმართთაგან.
ხოლო ჩუენდა ჯერ-არს შეწყნარებაჲ ეგევითართაჲ მათ, რაჲთა თანა-შემწე ვექმნეთ ჭეშმარიტებასა.
