მოხუცებული რჩეულსა დედოფალსა და შვილთა მისთა, რომელნი მიყუარან ჭეშმარიტებით და არა ხოლო მე, არამედ ყოველთა რომელთა უცნობიეს ჭეშმარიტებად.
ჭეშმარიტებისაგან, რომელი დამკჳდრებულ არს ჩუენ შორის და ჩუენ თანა იყოს უკუნისამდე.
იყავნ ჩუენ თანა მადლი, მშჳდობაჲ და წყალობაჲ ღმრთისა მიერ მამისა და უფლისა ქრისტე იესუჲს მიერ ძისა მისისა ჭეშმარიტებით და სიყუარულით.
განვიხარე ფრიად, რამეთუ ვპოენ შვილთაგან შენთა, რომელნი ვლენან ჭეშმარიტებით, ვითარცა-იგი მცნებაჲ მოვიღეთ მამისაგან.
და აწ გიკითხავ შენ, დედოფალო, არა ვითარცა მცნებასა ახალსა მივსწერ შენდა, არამედ რომელი მაქუნდა დასაბამითგან, რაჲთა იყუარობდეთ ურთიერთას.
და ესე არს სიყუარული, რაჲთა ვიდოდით მცნებათა მისთაებრ და ესე არს მცნებაჲ, რაჲთა, ვითარცა-იგი გესმა დასაბამითგან, მას შინა ხუიდოდით.
რამეთუ მრავალნი მაცთურნი შემოვიდეს სოფლად, რომელნი არა აღიარებენ იესუ ქრისტესა ჴორცითა მოსრულსა; ესე არს მაცთური და ანტიქრისტჱ.
ეკრძალენით თავთა თქუენთა, რაჲთა არა* წარსწყმიდოთ, რაჲ-იგი ჰქმენით, არამედ სასყიდელი სავსებით მოიღოთ.
ყოველ[ივე ...]უარი, რომელი არა ეგოს მოძღურებასა ზედა
