... გუიყუარდეს* და მცნებათა მისთა ვიმარხვიდეთ.
რამეთუ ესე არს სიყუარული ღმრთისაჲ, რაჲთა მცნებათა მისთა ვიმარხვიდეთ და მცნებანი მისნი მძიმე არა არიან*.
რამეთუ ყოველი რომელი შობილ იყოს ღმრთისაგან, სძლოს სოფელსა და ესე არს ძლევაჲ, რომელი სძლევს სოფელსა სარწმუნოებაჲ ჩუენი.
. . . რამეთუ* იესუ არს ძჱ ღმრთისაჲ.
რამეთუ ესე არს, რომელი მოვიდა წყლითა და სისხლითა; იესუ ქრისტჱ არა ხოლო წყლითა, არამედ წყლითა და სისხლითა; და სული არს მოწამე, რამეთუ სული არს ჭეშმარიტება.
და სამნი არიან, რომელნი წამებენ: სული, სისხლი და წყალი და სამნივე ესე ერთითა მით არიან.
უკუეთუ კაცთაჲ წამებაჲ მოვიღით, წამებაჲ ღმრთისაჲ უფროჲს არს, რამეთუ ესე არს წამებაჲ ღმრთისაჲ, რამეთუ წამა ძისა თჳსისათჳს.
რომელსა ჰრწმენეს ძჱ ღმრთისაჲ, აქუნდეს წამებაჲ იგი ღმრთისაჲ თავისა თჳსისა თანა; რომელსა არა ჰრწმენეს ძჱ ღმრთისაჲ, მტყუვრად გამოაჩინა იგი, რამეთუ არა ჰრწმენა წამებაჲ იგი, რომელ წამა ...
და ესე არს განცხადებულებაჲ, რომელ მაქუს მისა მიმართ, რამეთუ უკუეთუ იგი ვითხოოთ ნებისაებრ მისისა, ისმინოს ჩუენი.
რაჲცა-იგი ვითხოო და ვიცი, რამეთუ მაქუს თხოაჲ იგი, რომელი ვითხოვეთ მისგან.
უკუეთუ ვინმე იხილოს ძმაჲ თჳსი, რომელი ცოდვიდეს ცოდვასა არა სასიკუდინესა, ითხოოს და მოსცეს მას ცხორებაჲ; რომელნი-იგი ცოდვენ არა სასიკუდინედ, არს ცოდვაჲ სასიკუდინე, არა ამისთჳს ვიტყჳ, რაჲთა ითხოოს.
ყოველივე სიცრუვჱ ცოდვა არს და არს ცოდვაჲ სასიკუდინე.
ვიცით, რამეთუ ყოველი რომელი შობილ იყოს ღმრთისაგან, არა ცოდოს, არამედ რომელი-იგი შობილ არნ ღმრთისაგან, დაიმარხის თავი თჳსი და ბოროტი არა შეეხოს მას.
ვიცით, რამეთუ ღმრთისაგან ვართ და ყოველი სოფელი ბოროტსა ზედა დგას.
და ვიცით, რამეთუ ძჱ ღმრთისაჲ მოვიდა* და მომცა ჩუენ გონებაჲ, რაჲთა ვიცოდით ჩუენ ჭეშმარიტი ღმერთი და ვართ ჩუენ ჭეშმარიტისა თანა ძისა მისისა იესუ ქრისტჱსა. ესე არს ჭეშმარიტი ღმერთი, ცხორებაჲ საუკუნოჲ.
შვილნო, დაიცვენით თავნი თჳსნი კერპთაგან.
