Page of ms. P: 386V პავლე, მონაჲ იესუ ქრისტჱსი, ჩინებული მოციქული, რჩეული სახარებასა მას ღმრთისასა,
რომელი-იგი წინაჲსწარ აღუთქუა წინაწარმეტყუელთა მის მიერ წიგნთაგან წმიდათა
ძისა მისისათჳს, რომელი-იგი იშვა თესლისაგან დავითისა ჴორციელად,
რომელი-იგი გამოჩნდა ძედ ღმრთისა ძალითა და სულითა მით სიწმიდისაჲთა, აღდგომითა მით მკუდრეთით უფლისა ჩუენისა იესუ ქრისტჱსითა,
რომლისაგან-ესე მოვიღეთ მადლი და მოციქულებაჲ დასამორჩილებელად სარწმუნოებისა ყოველთა წარმართთა სახელისა მისისათჳს,
რომელსა თქუენცა ჩინებულ ხართ ქრისტე იესუჲსა,
ყოველნი რომელნი ხართ ჰრომეს შინა, საყუარელთა ღმრთისათა, რჩეულთა წმიდათა, მადლი თქუენდა და მშჳდობაჲ ღმრთისა მიერ Page of ms. P: 387R მამისა და უფლისა ჩუენისა ქრისტჱსა!
პირველად ვჰმადლობ ღმერთსა ჩემსა იესუ ქრისტჱს მიერ თქუენ ყოველთათჳს, რამეთუ სარწმუნოებაჲ ეგე თქუენი განითქუმის ყოველსა სოფელსა,
რამეთუ მოწამჱ ჩემდა არს ღმერთი, რომელსა-ესე ვმსახურებ სულითა ჩემითა სახარებითა ძისა მისისაჲთა, ვითარ უნაკლულოდ ჴსენებასა თქუენსა ვჰყოფ.
ლოცვათა შინა ჩემთა თქუენთჳს ვილოცავ, რაჲთა მე წარმემართოს მოსლვად თქუენდა,
რამეთუ მსურის ხილვაჲ თქუენი, რაჲთა მი-რაჲმე-გცე მეცა მადლი სულიერი დასამტკიცებელად თქუენდა.
ხოლო არს ესე თანანუგეშინის-ცემა თქუენ შორის ურთიერთასი იგი სარწმუნოებაჲ თქუენი და ჩემი.
არა მნებავს უმეცრებაჲ თქუენი, ძმანო, რამეთუ მრავალგზის მინდა მოსლვად თქუენდა და დავეყენე მოაქადმდე, რაჲთა თქუენ თანაცა ნაყოფ რაჲმე გამოვიღო, ვითარცა სხუათა მათ თესლთა.
წარმართთა და ბარბაროზთა, ბრძენთა და უგუნურთა თანამდებ ვარ.
ესრჱთ არს გულსმოდგინებაჲ, რაჲთა თქუენცა, რომელნი ხართ ჰრომეს შინა, გახარო,
რამეთუ არა მრცხუენის ხარებისა მისთჳს, რამეთუ ძალი ღმრთისაჲ არს მაცხოვრად ყოველთა, რომელთაცა ჰრწამს, -- ჰურიათა მიმართ [პირველად და] მერმე წარმართთა.
[რამეთუ] [სი]მართლჱ ღმრთისაჲ მას ში[ნა] გამოცხადების სარწმუნოებით[ი] სარწმუნოებად, ვითარცა წერილთა [არს,] რამეთუ [მართალი სარწმუნოე]ბითა ცხონდეს.
