Page of ms. P: 222V და მუნ კაცი ერთი იყო ლუსტრას შინა, უძრული ფერჴითა და მკელობელი დედისმუცლითგან, ჯდა, რომელსა არასადა ევლო.
მას ვითარცა ესმნეს სიტყუანი იგი [პავლჱსნი], რომელსა ეტყოდა, ვითარ მიხედა პავლე და იხილა, რამეთუ აქუნდა სარწმუნოებაჲ საცხორებელად მისა,
და ჰრქუა მას ჴმითა დიდითა: შენ გეტყჳ, კაცო, სახელითა იესუ ქრისტჱსითა: აღდეგ ფერჴთა შენთა ზედა მართლ! და აღემართა და იწყო სლვად:
ხოლო ერმან მან, ვითარცა იხილა, რომელი-იგი ქმნა პავლე, აღიმაღლეს ჴმაჲ მათი ჴმითა მის ლუკაონებრითა და იტყოდეს: კერპნი მსგავს არიან კაცთა და გარდამოსრულ არიან ჩუენდა.
და ხადოდეს ბარნაბას დია კერპით და პავლეს -- ერმჱთ, რამეთუ პავლე იყო წინამძღუარ სიტყჳსა მის.
ხოლო მღდელმან მან დია კერპისამან, რამეთუ იგი იყო მთავარი მის ქალაქისაჲ, კურო[ე]ბი და გჳრგჳნები ბჭეთა მის ქალაქისათა მოიღო ერისა მის თანა და ეგულებოდა ზორვაჲ.
ესმა რაჲ მოციქულთა ბარნაბას და პავლეს, დაიპეს სამოსელი მათი და მოუჴდეს ერსა მას, ღაღადებდეს და იტყოდეს:
კაცნო, რასა იქმთ ამას? რამეთუ ჩუენცა კაცნივე ვართ, მსგავსნი თქუენნი, და გახარებთ თქუენ, რაჲთა ამაოებითა ამათგან მოიქცეთ ღმრთისა ცხოველისა, რომელმან ქმნა ცაჲ და ქუეყანაჲ, ზღუაჲ და ყოველი, რაჲ არს მას შინა.
Page of ms. P: 223R რომელმან-იგი წარსრულთა მათ ჟამთა მიუშუა ყოველსა მას [თე]სლებსა სლვად გზათა ნებისა მისისათა.
და არავე უწამებელად დაუტევა ქველისმოქმედებაჲ იგი მისი ყოველსა ჟამსა ზეცით გარდამოცემად თქუენდა წჳმაჲ და ჟამნი ნაყოფის-გამოღებისანი განძღებად საზრდელითა და სიხარულითა გულთა თქუენთაჲთა.
და ესე რაჲ წართქუეს, ძნიად დააცხრვეს ერი იგი, რაჲთა არა უზორონ მათ, და წარსლვად კაცად-კაცადი ვანად თჳსა, ვიდრე იგი[ნი] იქცეოდესღა მუნ და ასწავებდეს,
მოიწინეს ანტიოქიაჲთ და იკონიაჲთ ჰურიანი იგი და ეტყოდეს მათ განცხადებულად და მიაქციეს ერი იგი განშორებად მათგან; ესრე ეტყოდეს, ვითარმედ: არარას ჭეშმარიტსა იტყჳან, არამედ ყოველსა ტყუვილსა; და ქვაჲ დაჰკრიბეს პავლეს და გამოითრიეს გარე ქალაქსა მას, ესრე ეგონა, ვითარმედ მომკუდარ არს.
მოვიდეს და შეჰკრბეს მას გარემოჲს მოწაფენი იგი; Page of ms. P: 224R აღდგა და შევიდა იგი ქალაქად. და ხვალისა გამოვიდა ბარნაბას თანა და მივიდეს დერბედ.
და ახარებდეს მას ქალაქსა, დაიმოწაფნეს მრავალნი და მიიქცეს ლუსტრად და იკონიად და ანტიოქიად;
და განამტკიცებდეს გულთა მათ მოწაფეთასა და ჰლოცვიდეს, რაჲთა მტკიცედ ეგნენ სარწმუნოებასა ზედა, და ვითარმედ: მრავლითა ჭირითა გჳღირს ჩუენ შესლვად სასუფეველსა ღმრთისასა.
Page of ms. P: _ Page of ms. L: 412R და ვითარ განვლეს პოსიდიაჲ, მივიდეს პანფილიად.
და ეტყოდა რაჲ [სიტყუასა ღმრთისასა] პერგეს, წარმოვიდეს იტალონად;
და მიერ ნავითა წარვიდეს და მივიდეს ანტიოქიად, ვინაჲცა იგინი შევედრებულ იყვნეს, განმტკიცებულ მადლითა ღმრთისაჲთა საქმესა მას, რომელიცა აღასრულეს.
და ვითარ მივიდეს, შეკრიბეს კრებული იგი, უთხრობდეს მათ, რავდენი ყო ღმერთმან მათ Page of ms. L: 412V თანა, რამეთუ განუღო წარმართთა [კარი] სარწმუნოვებისაჲ.
