Page of ms. K: _ Page of ms. P: 217R მოციქულნი იგი მიმო-რაჲ-დაიბნინეს ჭირისა მისგან, რომელი იყო სტეფანჱს ზედა, მი-ვინმე-ვიდეს ზღჳთ კერძო, რომელნიმე კჳპრედ და ანტიოქიად, არას ვის რას გარეწარსა ეტყოდეს სიტყუასა გარნა ჰურიათა მათ
ხოლო იყვნეს ვინმე მათგანნი კჳპრელნი და კჳრინელნი კაცნი, რომელნი მოვიდეს ანტიოქიად და ეტყოდეს ბერძლ მეტყუელთა მათ და ახარებდეს უფალსა იესუს.
და იყო ჴელი უფლისაჲ მათ ზედა განკურნებად მათა; და მრავალთა ჰრწმენა და მოიქცეს უფლისა.
ესმა სიტყუაჲ ესე ყურთა მის ერისათა, რომელნი იყვნეს იერუსალჱმს მათთჳს, და მიავლინეს ბარნაბა ვიდრე ანტიოქიადმდე.
რომელი-იგი მოვიდა, იხილა მადლი უფლისაჲ და განიხარა, და ჰლოცვიდა ყოველთა გულსმოდგინებითა გულისაჲთა დადგრომად უფლისა მიმართ.
რამეთუ იყო კაცი იგი სახიერ და სავსე სულითა წმიდითა და სარწმუნოებითა. და შეეძინებოდა ერი მრავალი უფალსა.
ხოლო იგი გამოვიდა ტარსონდ მოძიებად სავლესა, და პოა და წამოიყვანა იგი და მოვიდეს ანტიოქიად.
და იყო მუნ მათი წელიწადი ერთი შეკრებად ეკლესიასა და სწავლად ერისა მის მრავლისა, და სახე ყოფად პირველად ანტიოქიას შინა მოწაფეთა მათ ქრისტეანობად.
ამათ დღეთა შინა გარდამოვიდეს იერუსალჱმით წინაწარმეტყუელნი ანტიოქიად.
აღდგა ერთი მათგანი, რომელსა სახელი ერქუა აგაბოს, რომელი-იგი აუწყებდა სულითა წმიდითა, ვითარმედ სიყმილი სასტიკი ყოფად არს ყოველსა სოფელსა, რომელი-იგი იყო დღეთა მათ კლავდი კეისრისათა.
ხოლო მოწაფეთა მათ, ვითარცა ჴელ-\-რაჲ-ეწიფებოდა, Page of ms. P: 217V ბრძანეს თითოეულმან კაცად-კაცადმან სამსახურებელად მიძღუანებად ძმათა მათ, რომელ-იგი მყოფ იყვნეს ჰურიასტანს,
რომელიცა-იგი ყვეს, წარმოძღუანეს ხუცესთა მათ ჴელითა ბარნაბაჲსითა და პავლესითა.
