Page of ms. L: 371R და მათ დღეთა შინა და განმრავლებასა მას მოწაფეთასა იყო დრტუინვაჲ ბერძენთაჲ ებრაელთა მიმართ, რამეთუ უგულებელს-იქმნებოდა მსახურებაჲ იგი დღითი-დღე ქურივთა მათთაჲ.
მაშინ მოუწოდეს ათორმეტთა მათ [მოციქულთა] სიმრავლესა მოწაფეთასა და ჰრქუეს: არა სათნო-არს ჩუენდა დატევებაჲ სიტყუისა ღმრთისაჲ და მსახურებაჲ ტაბლებსა.
გამოირჩიენით, ძმანო, კაცნი თქუენგანნი, რომელნი წამებულ იყვნენ, შჳდნი, სავსენი სულითა წმიდითა და სიბრძნითა, რომელნი დაადგინნეთ საქმესა ამას ზედა;
ხოლო ჩუენ ლოცვასა და მსახურებასა ამის სიტყუისასა განვეკრძალნეთ.
და სათნო-უჩნდა სიტყუაჲ Page of ms. L: 371V ესე წინაშე ყოველსა მას სიმრავლესა; და გამოირჩინეს სტეფანე, კაცი სავსჱ სარწმუნოვებითა და სულითა წმიდითა, და ფილიპე, და პროქორონ, და ნიკანორა, და ტიმონა, და პარმენა და ნიკოლაოს მწირი ანტიოქიელი
და დადგინნეს წინაშე მოციქულთა; და ულოცეს და დაასხნეს მას ზედა ჴელნი მათნი.
და სიტყუაჲ უფლისაჲ აღორძნდებოდა, რიცხუი იგი მოწაფეთაჲ განმრავლდებოდა ფრიად იერუსალჱმს; და მრავალი ერი მღდელთაჲ ერჩდა სარწმუნოვებასა.
Page of ms. L: _ Page of ms. P: 374R ხოლო სტეფანე სავსე იყო სულითა წმიდითა და მადლითა, იქმოდა ნიშებსა დიდსა ერსა შორის სახელითა უფლისა ჩუენისა იესუ ქრისტჱსითა.
აღ-ვინმე-დგეს კრებულისა მისგანნი, რომელსა ჰქჳან ლიბინტიელთაჲ და ალექსანდრელთაჲ, და ეძიებდეს სტეფანჱს თანა სიტყუასა.
და ვერ შეუძლებდეს წინადადგომად სიბრძნითა მისითა და სულითა წმიდითა, რომელსა იტყოდა.
მაშინ აბირნეს ვინმე კაცნი, რომელნი იტყოდეს, ვითარმედ: გუესმა მაგისგან სიტყუაჲ გმობისაჲ, რომელსა იტყოდა მოსჱსთჳს და ღმრთისა.
აღძრეს ერი იგი და მოხუცებულნი და მთავარნი და ზედამივიდეს სტეფანესა და მოიყვანეს კრებულსა მათსა შორის.
და წარმოადგინნეს მოწამენი ცრუნი, რომელნი იტყოდეს: კაცი ესე არა დასცხრების სიტყუასა ბოროტსა ადგილისა ამისთჳს წმიდისა და რჩეულისა.
გუესმა მაგისგან, რამეთუ იტყოდა, ვითარმედ: იესუ ნაზარეველმან დაარღჳოს ადგილი ესე და ცვალოს შჯული, რომელი მომცა ჩუენ მოსე.
ხედვიდეს მას, რომელნი-იგი მუნ დგეს კრებულსა მას შორის, და იხილეს პირი მისი, ვითარცა პირი ანგელოზისაჲ.
