Page of ms. K: 280V ხოლო ჴელითა მოციქულთაჲთა იქმნებოდა ნიშები და სასწაულები ერსა შორის; და იყვნეს ყოველნი ერთბამად სტოვასა მას სოლომონისსა.
ხოლო სხუათა მათ ვერ ეძლო შეხებად მათდა, არამედ ადიდებდა მათ ერი იგი.
უფროჲსღა შეეძინებოდა სიმრავლჱ მამათაჲ და დედათაჲ მორწმუნეთაჲ უფალსა.
ვითარმედ უბანთა ზედაცა გამოაქუნდეს უძლურნი და დასდგმიდეს ცხედრებითა და საკაცებითა, რაჲთა მოსლვასა ოდენ პეტრჱსსა აჩრდილი ოდენ ვისმე მიადგეს მათ[გან]სა.
და შეკრბებოდა სიმრავლჱ [გარ]ემო ქალაქებისაჲ იერუსალჱმდ [და მ]ოაქუნდა უძლურები და ურვილები სულთაგან არაწმიდათა და განიკურნებოდეს ყოველნი.
Page of ms. K: _ Page of ms. P: 219V აღდგა მღდელთმოძღუარი იგი და ყოველნი მისთანანი, რომელი იყო წვალებაჲ სადუკეველთაჲ, და აღივსნეს შურითა,
და დაასხნეს ჴელნი მათნი მოციქულთა ზედა და შესხნეს იგინი საპყრობილესა, დამარხვად ხვალისა ეგულებოდა.
ხოლო ანგელოზმან ღამე განახუნა კარნი საპყრობილისანი და გამოიყვანნა იგინი და ჰრქუა მათ:
მივედით და დადეგით და ეტყოდეთ ტაძარსა შინა ერსა მას. ყოველთა მათ სიტყუათა ამის ცხორებისათა.
ხოლო მათ ვითარცა ესმა ესე, შევიდეს ცისკარს ოდენ ტაძრად და ასწავებდეს ერსა მას. მაშინ მოვიდეს მღდელთმოძღუარნი იგი და ყოველნი მისთანანი და მოუწოდეს კრებულსა მას და მოხუცებულთა ძეთა ისრაჱლისათა და მიავლინნეს საპყრობილედ მოყვანებად მოციქულთა.
ხოლო მი-რაჲ-ვიდეს მსახურნი იგი, არა პოვნეს იგინი საპყრობილესა შინა; მოიქცეს იგინი,
და უთხრეს მათ, ვითარმედ: საპყრობილჱ იგი გპოვეთ ყოველითა კრძალულებითა და მცველნი იგი მდგომარენი წინაშე კართა საპყრობილისათა; გან-რაჲ-ვაღეთ, შინა არა ვპოვენით.
ხოლო მათ ვითარცა ესმნეს სიტყუანი ესე, ერისთავსა მას ტაძრისასა და მღდელთმოძღუართა, განიზრახვიდეს მათთჳს, რაჲმე იქმნნეს.
მო-ვინმე-ვიდა და უთხრა მათ, ვითარმედ: კაცნი იგი, რომელნი შესხენით საპყრობილესა, არიან ტაძარსა შინა, დგანან და ასწავებენ ერსა მას.
მაშინ მივიდა ერისთავი იგი მსახურთა თანა და მოჰყვანდეს იგინი არა ძლით, რამეთუ ეშინოდა ერისა მის, ნუუკუე ქვაჲ დაჰკრიბონ მათ.
მოიყვანნა იგინი და დაადგინნა შორის კრებულსა. ჰკითხვიდა მღდელთმოძღუარი იგი და ჰრქუა:
მცნებით გამცენით, რაჲთა არა ასწავებდეთ სახელითა ამით. აწ, ესერა, აღგივსიეს იერუსალჱმი მოძღურებითა თქუენითა და ჩუენ ზედაცა გეგულების მოწევნად სისხლი ამის მართლისაჲ.
მიუგო პეტრე და ჰრქუა: მორჩილებაჲ ჯერ-არს ღმრთისაჲ ვიდრე კაცთაჲ,
ღმერთმან მამათა ჩუენთამან აღადგინა იესუ, რომელსა-იგი თქუენ ჴელნი შეასხენით და დამოჰკიდეთ ძელსა.
ესე ღმერთმან წინამძღურად და მაცხოვრად ჩუენდა აღამაღლა მარჯუენითა თჳსითა მოცემად სინანული ისრაჱლსა და მოტევებად ცოდვათა.
და ჩუენ მოწამე ვართ მისა სიტყუათა მათ და სული წმიდაჲ, რომელი მოსცა ღმერთმან მოშიშთა მისთა.
Page of ms. P: _ Page of ms. L: 362R აღ-ვინმე-დგა კრებულსა შორის ფარისეველთასა, რომელსა სახელი ერქუა გამალიელ, შჯულისმოძღუარი, პატიოსანი ერსა შორის, ბრძანა გარეგანყვანებაჲ კაცთა მათ.
და ჰრქუა მათ: კაცნო ისრაიტელნო! ეკრძალენით თავთა თქუენთა კაცთა ამათთჳს, [რაჲ] გეგულების ყოფად?
რამეთუ უწინარეს დღეთა ამათ აღდგა თევდა, და ეტყოდა თავსა თუისსა, რომელსა მისდევდეს კაცნი რიცხჳთ ვითარმედ ოთხასი ოდენ; რომელ\-იგიცა Page of ms. L: 362V მოისრა, და ყოველნი მორჩილნი მისნი განირყუნეს და იქმნეს ვითარცა არარაჲ.
ამისა შემდგომად აღდგა იუდა გალილეველი, დღეთა მათ სოფლის-წერისათა, და განიდგინა ერი მრავალი შემდგომად მისა. იგიცა წარწყმდა, და ყოველნი მორჩილნი მისნი განიბნინეს.
და აწ, გეტყუი თქუენ: განეშორენით კაცთა ამათგან, უტევენით ეგე, [რამეთუ], უკუეთუ კაცთაგან არს საქმჱ ესე ანუ სიტყუაჲ, დაჰჴსნდეს.
უკუეთუ ღმრთისაგან არს, ვერ ჴელ-ეწიფების დაჴსნად: ნუუკუე ღმრთისა მოლალეცა იპოვნეთ.
ხოლო იგინი ერჩდეს მას; მოუწოდეს მოციქულთა, ტანჯნეს იგინი და ამცნეს მათ, რაჲთა არა იტყოდიან სახელითა იესუისითა და განუტევნეს იგინი.
ხოლო Page of ms. L: 363R იგინი წარვიდეს კრებულისა მისგან და უხაროდა, რამეთუ ღირს-იქმნეს სახელისათჳს უფლისა გინებად.
და ყოველსავე ჟამსა ტაძარსა შინა იყოფოდეს და არა დასცხრებოდეს მოძღურებითა და სახარებითა იესუ ქრისტესითა.
