Page of ms. L: 348R პეტრე და იოვანე აღვიდოდეს ტაძარსა მას ჟამსა ოდენ ლოცვისასა ცხრა ჟამს.
და კაცი ვინმე იყო მკელობელი დედისმუცლითგან თუისით, რომელ-იგი აღიკიდიან და დასუიან ბჭეთა თანა მის ტაძრისათა დღითი-დღედ, რომელსა ერქუა შუენიერ, თხოვად ქველისსაქმრისა შემავალთაგან ტაძრად.
ვითარცა-იგი იხილა პეტრე და იოვანე, შე-რაჲ-ვიდოდეს ტაძრად, ითხოვდა ქველისსაქმარსა მათგან.
მიხედა მას პეტრე იოვანეჲთურთ და ჰრქუა: მოიხილე ჩუენდა!
ხოლო იგი ხედვიდა მათ და ელოდა მოღებად რაჲსამე მათგან.
ჰრქუა მას პეტრე: ოქროჲ და ვეცხლი Page of ms. L: 348V არა მაქუს, ხოლო რომელ მაქუს, გცე შენ: სახელითა იესუ ქრისტე ნაზარეველისაჲთა აღდეგ და ვიდოდე!
და უპყრა ჴელი მარჯუენაჲ მისი და აღადგინა იგი, მეყსეულად განუმტკიცნეს ფერჴნი მისნი და კოჭნი მისნი.
და ახლდა და დადგა.
და იხილა იგი ყოველმან ერმან, ვიდოდა რაჲ იგი და აქებდა ღმერთსა.
იცოდეს იგი, რამეთუ ესე არს, რომელი-იგი ქველისსაქმრისათჳს ზინ ბჭეთა ზედა შუენიერთა ტაძრისათა; და აღივსნეს იგინი შიშითა.
შეკრბებოდა ყოველი ერი მათა სტოასა მას, რომელსა ჰრქუიან სოლომონისი, საკუირველებისა მისთუის.
ვითარცა იხილა პეტრე, ჰრქუა ერსა მას: კაცნო ისრაიტელნო! რაჲსა Page of ms. L: 349R გიკუირს ამას ზედა, ანუ ჩუენ რაჲსა მხედავთ, ვითარცა თუისითა ძალითა ანუ ღმრთისმსახურებითა გუიყოფიეს სლვაჲ ეგე მაგისი?
ღმერთმან აბრაჰამისმან, ღმერთმან ისაკისმან, ღმერთმან იაკობისმან, ღმერთმან მამათა ჩუენთამან ადიდა ძჱ თუისი იესუ, რომელი თქუენ მიეცით და უარ-ჰყავთ წინაშე პილატესა, რომელმან საჯა განტევებაჲ მისი.
ხოლო თქუენ წმიდაჲ იგი და მართალი უარ-ჰყავთ და გამოითხოვეთ კაცი იგი კაცისმკლველი.
ხოლო წინამძღუარი იგი ცხორებისაჲ მოჰკალთ, რომელი ღმერთმან აღადგინა მკუდრეთით.
და აწ უწყი, ძმანო, რამეთუ უმეცრებით ჰქმენით, ვითარცა-იგი მთავართა თქუენთა.
ხოლო, რომელი-იგი წინაჲსწარ აღუთქუა ღმერთმან, ყოველთა წინაწარმეტყუელთა მიერ ვნებაჲ ცხებულისა Page of ms. L: 348V თუისისაჲ, აღასრულა ესრეთ.
აწ უკუე შეინანეთ, რაჲთა აღიჴოცნენ ცოდვანი თქუენნი,
რაჲთა, რაჟამს მოიწინენ ჟამნი განსუენებისანი პირისაგან უფლისა,
Page of ms. L: 452V წინაწარმეტყუელი აღგიდგინოს თქუენ უფალმან ღმერთმან თქუენმან ძმათაგან, ვითარცა-ესე [მე]; მისი ისმინეთ ყოვლისა მისებრ, რომელსა გეტყოდის თქუენ;
და იყოს, ყოველმან სულმან, რომელმან არა ისმინოს მის წინაწარმეტყუელისაჲ, მოისპოს სული იგი ერისაგან თუისისა.
და ყოველნი წინაწარმეტყუელნი, ვიდრე სამოელისითგან [და] შემდგომითი-შემდგომად, რავდენნი იტყოდეს, Page of ms. L: 465R და წინაჲსწარ გუითხრობდეს დღეთა ამათ.
რამეთუ თქუენ ხართ შვილნი [წინაწარმეტყუელ]თანი [და] აღთქუმ[ისანი, რომელ]-იგი აღუთქუა [ღმერთმან მამა]თა თქუენთა, და ჰრქ[უა აბრა]ჰამს, ვითარმედ: ნათესავისა შენისაგან იკურთხეოდიან ყოველნი ნათესავნი ქუეყანისანი.
თქუენ პირველად აღგიდგინა ღმერთმან ძჱ თუისი იესუ და მოავლინა მაკურთხეველად თქუენდა, რაჲთა მოიქცეთ კაცად-კაცადი უკეთურებისაგან.
