Page of ms. P: _ Page of ms. L: 440V პირველად ესე სიტყუაჲ ვყავ ყოვლისა მისთუის. ჵ, ღმრთისმოყუარეო, რომლითა იწყო იესუ ყოფად და სწავლად.
ვიდრე დღედ, რომელადმდე ამცნებდა მოციქულთა სულითა წმიდითა, რომელნი გამოირჩინა, და აღმაღლდა.
რომელთაცა წარუდგინა თავი თუისი ცხოელი შემდგომად ვნებისა მისისა მრავლითა სახითა, ორმეოცთა დღეთა ეჩუენებოდა მათ და ეტყოდა სასუფეველისათუის [ღმრთისა].
და თანაექცეოდა მათ და ამცნებდა: იერუსალჱმით ნუ განეშორებით, არამედ მოელოდეთ აღთქმასა სულისა წმიდისასა, რომელი გესმა ჩემგან.
რამეთუ იოვანე ნათელ-სცემდა წყლითა, ხოლო თქუენ ნათელ-იღოთ სულითა წმიდითა Page of ms. L: _ Page of ms. S: 265V არა მრავალთა ამათ დღეთა შემდგომად.
Page of ms. S: 266R ხოლო რომელნი-იგი შეკრებულ იყვნეს, ჰკითხვიდეს მას და ეტყოდეს: უფალო, უკუეთუ ამათ ჟამთა კუალად მოაგო სასუფეველი ისრაჱლსა?
ხოლო მან ჰრქუა მათ: არა თქუენი არს ცნობად ჟამთა და წელთაჲ, რომელ-იგი მამამან დადვა თჳსითა ჴელმწიფებითა.
არამედ შეიმოსოთ ძალი მოსლვასა სულისა წმიდისასა თქუენ ზედა; და იყვნეთ თქუენ ჩემდა მოწამე იერუსალჱმს და ყოველსა ჰურიასტანსა და სამარიასა. და ვიდრე დასასრულადმდე ქუეყანისა.
Page of ms. S: _ Page of ms. P: 173R მათ დღეთა შინა აღდგა პეტრე შორის ძმათა და ჰრქუა,
რამეთუ ერი შეკრებულ იყო ერთბამად ვითარ ას და ოც ოდენ: კაცნო ძმანო, ჯერ-იყო აღსრულებად სიტყჳსა მის, რომელი წინაჲწარ თქუა სულმან წმიდამან დავითის მიერ იუდაჲსთჳს ისკარიოტელისა, რომელი-იგი წინამძღუარ ექმნა შემპყრობელთა მისთა;
რამეთუ რიცხუსა შემორთულ იყო ჩუენ თანა და წილი ჴდომილ იყო აღთქუმისა მის მოციქულობისა მსახურებისაჲ.
ამან მოიგო დაბაჲ იგი სასყიდლისაგან სიცრუვისა და განსივნა და განსთქდა, და განიბნინეს ყოველნი ნაწლევნი მისნი.
და საცნაურ იქმნა ყოველთა მკჳდრთა იერუსალჱმისათა, ვითარმედ ეწოდა დაბასაცა მას თჳსითა სიტყჳთა მათითა აკელდამა, ესე იგი არს დაბაჲ სისხლისაჲ.
რამეთუ წერილ არს წიგნსა მას ფსალმონთასა: იყავნ სამკჳდრებელი მათი ოჴერ და საყოფელსა მათსა ზედა ნუ იყოფინ მკჳდრი, და განსაგებელი მათი სხუამან მიიღენ.
ჯერ-არს უკუე ჩუენდა, შეკრებულთა ამათ კაცთაჲ ყოველსა ჟამსა, რომელთა შორის შემოვიდა და განვიდა ჩუენგან უფალი იესუ,
იწყო ნათლისმცემელისაგან იოვანჱსა ვიდრე დღედმდე ამაღლებისა ჩუენგან, მოწამედ აღდგომისა მისისა ყოფად ჩუენ თანა, ვითარ ერთი ამათგანი.
და დაადგინნა ორნი ესე: იოსებ, რომელსა ეწოდა ბარსაბა, და მერმე ეწოდა იოსტოს, და მატათია.
და ილოცეს მათ ზედა და თქუეს: შენ, უფალო, გულთმეცნიერო ყოველთაო, გამოაჩინე, რომელი გამოირჩიეს ამათ ორთაგან ერთი
მიღებად ნაწილი ესე მსახურებისაჲ ამის და მოციქულობისაჲ, რომლისაგან განვარდა იუდა მისლვად ადგილსა მისსა.
და მისცეს მას წილი და გამოჴდა წილი იგი მატათიას ზედა Page of ms. P: 173V და თანაშეერაცხა ათერთმეტთა მოციქულთა მეათორმეტედ.
