Page of ms. L: 357R ამისა შემდგომად კუალად გამოუცხადა თავი თუისი იესუ მოწაფეთა თუისთა ზღუასა მას ზედა ტიბერიაჲსასა. ხოლო გამო-ესრე-უცხადა:
იყვნეს ზოგად სიმონ-პეტ\რე Page of ms. L: 357V და თომა, რომელსა ერქუა მარჩბივ, და ნათანაელ, რომელ იყო კანაჲთ გალილეაჲსაჲთ, და ძენი ზებედესნი, [და] სხუანი მოწაფეთა მისთაგანნი ორნი.
ჰრქუა მათ სიმონ-პეტრე: წარვიდე სათხევლობად. ჰრქუეს მას: მოვიდეთ შენ თანა ჩუენცა. განვიდეს და შევიდეს ნავსა. და მას ღამესა არარაჲ იპყრეს.
და ვითარცა განთენებოდა, დგა იესუ ზღუისკიდესა მას, და არა უწყოდეს მოწაფეთა, ვითარმედ იესუ არს.
ჰრქუა მათ იესუ: ყრმანო, საჭმელ გაქუს რაჲა? მიუგეს და ჰრქუეს: არა.
ხოლო თავადმან ჰრქუა მათ: სდევით ბადე იგი მარჯუენით ნავისა მის და ჰპოოთ. ხოლო მათ სდვეს და ვერღარა ეძლო გამოთრევად სიმრავლისა მისგან თევზისა.
ჰრქუა პეტრეს მოწაფემან მან, რომელი უყუარდა იესუს, ვითარმედ: უფალი არს. Page of ms. L: 358R ხოლო სიმონ-პეტრეს ვითარცა ესმა, რამეთუ უფალი არს, შესამოსელი მოირტყა, რამეთუ შიშუელ იყო, და შთაიგდო თავი თუისი ზღუასა.
ხოლო სხუანი მოწაფენი ნავითა მოვიდეს, [რამეთუ] არა შორს იყვნეს ქუეყანასა, არამედ ორას წყრთასა ოდენ, და გამოითრევდეს ბადესა მას თევზითა სავსესა.
და ვითარცა გამოჴდეს ქუეყანად, იხილეს ნაკურცხალი მდებარჱ და თევზი მას ზედა და პური.
ჰრქუა მათ იესუ: მოიღეთ თევზთა მათგან, რომელ იპყართ აწ.
გამოვიდა სიმონ-პეტრე და გამოითრევდა ბადესა მას ქუეყანად, სავსესა თევზითა, რომელ იყო ას ერგასის [და სამ].
ჰრქუა იესუ: მოვედით და ვისადილნეთ. და არღარავინ იკადრა Page of ms. L: 357V მოწაფეთაგანმან კითხვად, ვითარმედ: შენ ვინ ხარ? იცოდეს, რამეთუ უფალი თუით არს.
მოვიდა იესუ და მოიღო პური და მისცა მათ, თევზი იგი ეგრევე.
ესე სამგზის გამოეცხადა იესუ [მოწაფეთა თუისთა], აღ-რაჲ-დგა იგი მკუდრეთით.
Page of ms. L: _ Page of ms. P: 377V და ოდეს ისადილნეს, ჰრქუა სიმონ-პეტრეს იესუ: სიმონ იონაჲსო, გიყუარ მეა? ჰრქუა მას პეტრე: ჰე, უფალო, შენ იცი, რამეთუ მიყუარ შენ. და ჰრქუა მას: დააძოვენ კრავნი ჩემნი.
მერმე ჰრქუა მას იესუ: სიმონ იონაჲსო, გიყუარ მეა? ჰრქუა მას პეტრე: ჰე, უფალო, შენ იცი, რამეთუ მიყუარ შენ. ჰრქუა მას იესუ: დამწყსენ ცხოვარნი ჩემნი.
მერმე ჰრქუა მას მესამედ: სიმონ Page of ms. P: 378R იონაჲსო, გიყუარ მეა? შეწუხნა პეტრე, რამეთუ ჰრქუა მას მესამედ, ვითარმედ: გიყუარ მეა? და ჰრქუა: უფალო, შენ იცი ყოველი, შენ ყოველი უწყი, რამეთუ მიყუარ შენ. ჰრქუა მას იესუ: დააძოვენ ცხოვარნი ჩემნი.
ამენ, ამენ გეტყჳ შენ: ოდეს იყავ ჭაბუკ, შეირტყი თავით თჳსით და ხჳდოდი, ვიდრე გნებავნ. ხოლო ოდეს დაჰბერდე, განგიპყრნენ ჴელნი შენნი და სხუათა შეგარტყან და მიგიყვანონ, ვიდრე-იგი შენ არა გინდეს.
ესე თქუა და აუწყა, რომლითა სიკუდილითა ადიდოს ღმერთი. და ესე ვითარცა თქუა, მერმე ჰრქუა მას: შემომიდეგ მე.
Page of ms. P: 379R მოიქცა პეტრე და იხილა მოწაფჱ იგი, რომელი უყუარდა იესუს, რომელიცა-იგი მიეყრდნა სერობასა მკერდსა მისსა და ჰრქუა: ვინ არს, უფალო, რომელი მიგცემს შენ?
ესე იგი იხილა პეტრე და ჰრქუა: უფალო, მისთჳს რაჲ სთქუ?
ჰრქუა მას იესუ: უკუეთუ მინდეს ყოფაჲ მაგისი ვიდრე მოსლვად ჩემდადმდე, შენდა რაჲ? შენ შემომიდეგ მე.
და განჴდა სიტყუაჲ ესე ძმათა შორის, ვითარმედ მოწაფჱ იგი არა მოკუდეს და არა ჰრქუა მას იესუ, ვითარმედ: არა მოკუდეს, არამედ: უკუეთუ მინდეს ყოფაჲ მაგისი, ვიდრე მე მოვიდე.
ესე არს იგი მოწაფჱ, რომელი წამებს მისთჳს და რომელმან დაწერა ესე. ვიცით, რამეთუ ჭეშმარიტ არს წამებაჲ მისი.
და არიან სხუანიცა მრავალნი სასწაულნი, რომელნი ქმნნა იესუ, რომელნი, უკუეთუმცა დაწერილ იყვნეს თითოეულად, არღა ვჰგონებ, ვითარმედ სოფელმან ამან დაიტია აღწერილი წიგნები.
