მერმე კუალად ეტყოდავე იესუ და ჰრქუა მათ: მე ვარ ნათელი სოფლისაჲ. რომელი შემომიდგეს მე, არა ვიდოდის ბნელსა, არამედ აქუნდეს ნათელი ცხორებისაჲ.
Page of ms. L: 424R ჰრქუა მათ იესუ მერმეცა: მე წარვალ, და მეძიებდეთ მე და ცოდვათა შინა თქუენთა მოსწყდეთ; და ვიდრე მე მივალ, თქუენ ვერ ჴელ-გეწიფების მოსლვად.
იტყოდეს ჰურიანი იგი ურთიერთას: ნუუკუე მოიკლავს თავსა თუისსა, რამეთუ იტყუის: ვიდრე-იგი მე მივალ, Page of ms. L: 424V თქუენ ვერ ჴელ-გეწიფების მოსლვად?
და ეტყოდა მათ: თქუენ ქუეყანისანი ხართ, ხოლო მე ზეცისაგანი ვარ; თქუენ ამის სოფლისაგანნი ხართ, ხოლო მე არა ამის სოფლისაგანი ვარ.
გარქუ თქუენ: მოსწყდეთ ცოდვათა შინა თქუენთა; უკუეთუ არა გრწმენეს, რამეთუ მე ვარ, მოსწყდეთ ცოდვათა შინა თქუენთა.
ეტყოდეს მას: ვინ ხარ შენ? [ჰრქუა მათ იესუ]: პირველად, რამეთუ მე გეტყუი თქუენ.
მრავალი მაქუს სიტყუად თქუენდა და განკითხვად, ვითარმედ რომელმან მომავლინა მე, ჭეშმარიტ არს, და რაჲ-იგი მესმა [მისგან], მას ვიტყუი სოფელსა შინა.
არა ცნეს, რამეთუ მამასა თჳსსა უთხრობდა მათ.
ჰრქუა მათ იესუ მერმეცა: ოდეს აღამაღლოთ ძჱ კაცისაჲ, მაშინ სცნათ, რამეთუ მე ვარ და თავით ჩემით არა ვიქმ, არამედ ვითარცა მასწავა მე Page of ms. L: _ Page of ms. K: 261R მამამან, მას ვიტყჳ.
და რომელმან მომავლინა მე, ჩემ თანა არს; არა დამიტევა მე მარტოჲ, რამეთუ მე სათნოებასა მისსა ვიქმ მარადის.
ამას რაჲ ეტყოდა მათ, მრავალთა ჰრწმენა მისი.
Page of ms. K: _ Page of ms. L: 429R და ეტყოდა უფალი მორწმუნეთა მათ მისთა ჰურიათა: უკუეთუ თქუენ დაადგრეთ სიტყუათა ჩემთა, ჭეშმარიტად მოწაფენი ჩემნი ხართ.
და სცნათ ჭეშმარიტი, და ჭეშმარიტებამან განგათავისუფლნეს თქუენ.
ჰრქუეს მას: ნათესავნი აბრაჰამისნი ვართ და არასადა ვის ვჰმონებდით, ვითარ-ეგე შენ იტყუი: განთავისუფლდეთ.
მიუგო იესუ და ჰრქუა: ამენ, ამენ გეტყუი თქუენ: ყოველმან რომელმან ქმნეს ცოდვაჲ, მონაჲ არს იგი ცოდვისაჲ.
და მონაჲ არა დაადგრეს სახლსა შინა უკუნისადმდე,
არამედ მეძიებთ მე მოკლვად, რამეთუ სიტყუაჲ ჩემი ვერ დაიტევის თქუენ შორის.
რომელი ვიხილე მამისა მიერ, მას ვიტყუი; Page of ms. L: 429V და თქუენ რომელი გესმის მამისა თქუენისაგან, მას იქმთ.
მიუგეს მას და ჰრქუეს: მამაჲ ჩუენი აბრაჰამია. მიუგო იესუ და ჰრქუა მათ: უკუეთუმცა შვილნი აბრაჰამისნი იყვენით, საქმესამცა აბრაჰამისსა იქმოდეთ.
ხოლო აწ მეძიებთ მე მოკლვად.
ჰრქუეს მას: ჩუენ სიძვისაგან არა შობილ ვართ, ერთი მამაჲ ვიცით _ ღმერთი.
ჰრქუა მათ იესუ: უკუეთუმცა მამაჲ თქუენი იყო ღმერთი, გიყუარდიმცა მე, რამეთუ ღმრთისაგან გამოვედ, არა თავით თუისით მოსრულ ვარ, არამედ მან მომავლინა მე.
რაჲსათჳს სიტყუანი ესე არა იცნით?
თქუენ მამისა ეშმაკისანი ხართ და გულისთქუმაჲ მამისა თქუენისაჲ გნებავს ყოფად; რამეთუ ჭეშმარიტებაჲ არაი არს მის თანა. ოდეს Page of ms. L: 430R იტყუინ ტყუილსა, თუისისაგან გულისა [იტყუინ], რამეთუ მამაჲცა მისი მტყუანი იყო.
ხოლო მე ჭეშმარიტსა გეტყუი თქუენ, და არა გრწამს.
მიუგეს ჰურიათა და ჰრქუეს მას: არა კეთილად ვთქუთ, ვითარმედ: სამარიტელ ხარ შენ და ეშმაკი არს შენ თანა?
მიუგო მათ იესუ და ჰრქუა: ჩემ თანა ეშმაკი არა არს, არამედ პატივ-ვსცემ მამასა ჩემსა, და თქუენ მაგინებთ მე.
ხოლო მე არა ვეძიებ დიდებასა ჩემსა; არს, რომელი ეძიებს და შჯის.
ამენ, ამენ გეტყუი თქუენ: უკუეთუ ვინმე სიტყუაჲ ჩემი დაიმარხოს, სიკუდილი არა იხილოს უკუნისადმდე.
ჰრქუეს მას ჰურიათა მათ: აწ გუიცნობიეს, რამეთუ ეშმაკეულ ხარ: აბრაჰამ მოკუდა და წინაწარმეტყუელნი, და შენ იტყუი: Page of ms. L: 430V უკუეთუ ვინმე სიტყუანი ჩემნი დაიმარხნეს, სიკუდილისა გემოი არა იხილოს უკუნისადმდე.
ნუუკუე შენ უფროის ხარა მამისა ჩუენისა აბრაჰამისა, რომელი მოკუდა, და წინაწარმეტყუელნი მოწყდეს?
მიუგო იესუ და ჰრქუა მათ: უკუეთუ მე ვადიდებდე თავსა ჩემსა, დიდებაჲ ჩემი არარაჲ არს; არამედ არს მამაჲ ჩემი, რომელმან მადიდოს მე, რომლისაჲ სთქუით: ღმერთი ჩუენი არს იგი.
და არა იცით იგი, ხოლო მე ვიცი; უკუეთუ ვთქუა, ვითარმედ: არა ვიცი იგი, ვიყო მეცა მსგავს თქუენდა მტყუარ, არამედ ვიცი იგი და სიტყუათა მისთა ვიმარხავ.
აბრაჰამს, მამასა თქუენსა, უხაროდა, რაჲთა იხილოს დღჱ ესე ჩემი, და იხილა და განიხარა.
ჰრქუეს მას ჰურიათა მათ: ერგასის წლის არღა ხარ შენ, აბრაჰამ გიხილავსა? Page of ms. L: 431R
ჰრქუა მათ იესუ: ამენ, ამენ გეტყუი თქუენ: ვიდრე აბრაჰამის ყოფამდე მე ვარ.
აღიღეს ქვაჲ ჰურიათა, რაჲთა დაჰკრიბონ მას. ხოლო იესუ დაეფარა და გარდავიდა ტაძრით და განვლო შორის მათსა და წარვიდა.
