Page of ms. K: _ Page of ms. L: 363V პირველითგან იყო სიტყუაჲ და სიტყუაჲ იგი იყო ღმრთისა თანა, ღმერთი იყო სიტყუაჲ იგი.
ესე იყო პირველითგან ღმრთისა თანა.
ყოველივე მის მიერ იქმნა, თუინიერ მისა არცა ერთი რაჲ იქმნა, რავდენი-რაჲ იქმნა.
მის თანა ცხორებაჲ იყო და ცხორებაჲ იგი იყო ნათელ კაცთა.
და ნათელი იგი ბნელსა შინა ჩას, და ბნელი მას ვერ ეწია.
იყო კაცი მოვლინებული ღმრთისა მიერ, და სახელი მისი იოვანე.
ესე მოვიდა მოწამედ, რაჲთა წამოს ნათლისა მისთჳს, რაჲთა ყოველთა ჰრწმენეს მის გამო.
არა თუ იგი იყო ნათელ, არამედ რაჲთა წამოს ნათლისა მისთჳს.
იყო ნათელი ჭეშმარიტი, რომელი განანათლებს ყოველსა კაცსა, მომავალსა სოფლად.
სოფელსა შინა იყო, და სოფელი მის მირ შეიქმნა, სოფელმან იგი ვერ იცნა.
თუისთა მოვიდა, და თჳსთა Page of ms. L: 363V იგი არა შეიწყნარეს.
ხოლო რავდენთა-იგი შეიწყნარეს, მოსცა მათ ჴელმწიფებაჲ შვილ ღმრთისა ყოფად, რომელსა ჰრწმენეს სახელი მისი;
რომელი არა სისხლთაგან, არცა ნებითა მამაკაცისაჲთა, არამედ ღმრთისა მიერ იშვა.
და სიტყუაჲ იგი ჴორციელ იქმნა და დაემკუიდრა ჩუენ შორის; და ვიხილეთ დიდებაჲ მისი, დიდებაჲ ვითარცა მხოლოდშობილისაჲ [მამისა] მიერ, სავსეჲ მადლითა და ჭეშმარიტებითა.
იოვანე წამა მისთუის, ღაღატ-ყო და თქუა: ესე არს, რომლისათუის ვთქუ: რომელი-იგი ჩემსა შემდგომად მოვალს, ჩემსა უწინარეს იყო, რამეთუ პირველ ჩემსა არს.
რამეთუ სავსებისაგან მისისა ჩუენ ყოველთა მოვიღეთ მადლი მადლისა წილ.
რამეთუ შჯული მოსესგან მოეცა, ხოლო მადლი და ჭეშმარიტებაჲ ქრისტე იესუის მიერ იყო.
Page of ms. L: _ Page of ms. P: 364V ღმერთი არასადა ვინ იხილა, გარნა მხოლოდ-შობილმან [ძემან], რომელი იყო წიაღთა მამისათა, მან გამოთქუა.
და ესე არს წამებაჲ იოვანესი, რომელსა ჟამსა მოავლინნეს იერუსალჱმით Page of ms. P: 365R ჰურიათა მათ მღდელნი და ლევიტელნი, რაჲთა ჰკითხონ მას: შენ ვინ ხარ?
და მან აღიარა და არა უარ-ყო; აღიარა და თქუა, ვითარმედ: მე არა ქრისტე ვარ.
ჰკითხვიდეს მას და ჰრქუეს: აწ უკუე ვინ ხარ? ჰელია ხარ? და თქუა: არა;
და ჰრქუეს: წინაწარმეტყუელი ვინ ხარ? მიუგო და ჰრქუა: არა.
და ჰრქუეს მას: და უკუე ვინ ხარ შენ, მითხარ ჩუენ, რაჲთა მიუგოთ ჩუენცა მომავლინებელთა ჩუენთა, რაჲ სთქუ შენთჳს?
და თქუა: მე -- ჴმაჲ ღაღადებისაჲ უდაბნოსა ზედა; წრფელ ყვენით გზანი უფლისანი, ვითარცა თქუა ესაია წინაწარმეტყუელმან.
და მოციქულნი იგი, რომელ იყვნეს ფარისეველთაგანნი,
ჰკითხვიდეს და ჰრქუეს მას: და უკუე შენ რად ნათელ-სცემ, შენ-ღა არა ქრისტე ხარ, არცა ჰელია ხარ და არცა წინაწარმეტყუელთაგანი, ვინ ხარ?
მიუგო იოჰანე და ჰრქუა: მე ნათელ-გცემ თქუენ წყლითა, თქუენსა შორის დგას იგი, რომელი თქუენ არა იცით.
რომელი-იგი ჩემსა შემდგომად მოსლვად არს, მისა არა ღირს ვარ მე, რაჲთა\მცა Page of ms. P: 365V განუჴსენ ჴამლის საბელი ერთი ფერჴთა მისთაჲ.
ესე ბეთაბრას იყო, წიაღ იორდანესა, სადა-იგი იყო იოჰანე და ნათელ-სცემდა.
Page of ms. P: _ Page of ms. L: 460R ხვალისა დღე დგა კუალად იოვანე და მოწაფეთა მისთაგანნი ორნი.
და მიხედა იესუს, ვიდოდა რაჲ Page of ms. L: 460V იგი, და თქუა: აჰა, ქრისტე, ტარიგი ღმრთისაჲ.
ესმა მისი ორთა მათ მოწაფეთა, იტყოდა რაჲ ამას, და მისდევდეს იესუს.
მოექცა იესუ და იხილნა იგინი, და ჰრქუა მათ: რასა ეძიებთ? მათ ჰრქუეს მას: რაბი, რომელი ითარგმანების: "მოძღუარ", სადა იყოფი?
ჰრქუა მათ: მოედით და იხილეთ. და მივიდეს და [იხილეს], სადა იყოფვოდა, და მის თანა დაადგრეს მას დღესა შინა. ჟამი იყო ვიდრე მეათჱ.
იყო ანდრია, ძმაჲ სიმონ-პეტრესი, ერთი ორთაგანი, რომელთა ესმა იოვანესგან; მისდევდეს მას.
პოა მან პირველად სიმონ და ჰრქუა: ვპოეთ მესია, რომელ არს თარგმანებით: "ქრისტე".
ამან მოიყვანა იესუისა. მიხედა მას იესუ და ჰრქუა: შენ ხარა სიმონ, ძეჲ იონაჲსი? შენ გეწოდოს კეფა, რომელ ითარგმანების: "კლდე".
Page of ms. L: _ Page of ms. P: 210R ხვალისაგან უნდა განსლვად გალილეად, პოვა ფილიპე და ჰრქუა მას იესუ: მომდევდი მე.
ხოლო იყო ფილიპე ქალაქისგან ანდრეაჲსა და პეტრჱსა.
პოვა ფილიპე ნათანაელი და ჰრქუა მას: რომელი დაწერა მოსე შჯულსა და წინაწარმეტყუელთა, ვპოვეთ: იესუ ძჱ იოსებისი, ნაზარეთით გალილეაჲსაჲთ.
ჰრქუა მას ნათანაელ: და ნაზარეთით შესაძლებელ არსა კეთილისა რაჲსამე ყოფაჲ? ჰრქუა მას ფილიპე: მოვედ და იხილე.
და ვითარ იხილა იესუ ნათანაელი, მომავალი მისა, თქუა მისთჳს: ჭეშმარიტად ისრაიტელი, რომლისა თანა ზაკუვაჲ არა არს.
ჰრქუა მას ნათანაელ: ვინაჲ მიცი მე? მიუგო იესუ და Page of ms. P: 210V ჰრქუა მას: პირველად ფილიპჱსა ჴმობადმდე შენდა, ვიდრე იყავაღა ლეღუსა მას ქუეშე, გიხილე შენ.
ჰრქუა მას ნათანაელ: რაბი, შენ ხარ ძჱ ღმრთისაჲ, შენ ხარ მეუფჱ ისრაჱლისაჲ.
მიუგო იესუ და ჰრქუა მას: რამეთუ გარქუ შენ, ვითარმედ: გიხილე ლეღუსა მას ქუეშე, და გრწამს. უფროჲსიღა ამისსა იხილო შენ.
მერმე ჰრქუა მას: ამენ, ამენ გეტყჳ თქუენ, რამეთუ: იხილნეთ ცანი განხუმულნი და ანგელოზნი ღმრთისანი, აღმავალნი და გარდამომავალნი ძესა ზედა კაცისასა..
