Page of ms. P: 212V და მესამეს[ა] დღესა ქორწილი იყო კანას გალილეაჲსასა, და იყო მუნ დედაჲ იესუჲსი.
და მიჰხადეს იესუსცა და მოწაფეთა მისთა ქორწილსა მას.
და ვითარ მოაკლდა ღჳნოჲ, ჰრქუა იესუს დედამან მისმან: ღჳნოჲ არა აქუს.
ჰრქუა მას იესუ: [რაჲ არს შენდა და ჩემ]და, დედაკაცო? არღა მოწევნულ არს ჟამი ჩემი.
ჰრქუა დედამან მისმან მსახურთა მათ, ვითარმედ: რაჲცა გრქუას, ყავთ თქუენ.
და იყვნეს მუნ სარწყულნი ქვისანი მდგომარენი ექუსნი, მსგავსად განწმედისა მის ჰურიათაჲსა, რომელთა შთაასხიან საწყაული ორი გინა სამი.
ჰრქუა მათ იესუ: აღავსენით სარწყულნი ეგე წყლითა! და აღავსნეს იგინი პირს-პირ.
ჰრქუა მათ იესუ: აღმოავსეთ და მოართჳთ პურისა უფალსა! და მათ ყვეს ეგრე.
და ვითარცა გემოჲ იხილა პურისა უფალმან წყალი იგი, რომელი ღჳნო იქმნა, და არა იცოდა, ვინაჲ იყო, არამედ მსახურთა მათ ხოლო იცოდეს, რომელთა აღევსნეს წყლითა, მოუწოდა პურისა უფალმან სიძესა.
და ჰრქუა მას: ყოველმან კაცმან კეთილი ღჳნოჲ პირველად წარმოდგის და, ოდეს დაითრვ[ნიან, მაშინ უჯე]რჱსიცა. Page of ms. P: 213R ხოლო შენ დაჰმარხე ღჳნოჲ კეთილი აქამომდე.
ესე ქმნა იესუ დასაბამად სასწაულთა კანას გალილეაჲსასა და გამოუცხადა დიდებაჲ მისი: და ჰრწმენა მისი მოწაფეთა მისთა.
Page of ms. P: _ Page of ms. L: 433V ამისა შემდგომად შთავიდა იესუ კაფარნაუმდ, იგი თავადი და დედაჲ მისი და ძმანი მისნი [და მოწაფენი მისნი მის თანა]; და იქცეოდა იგი მუნ მცირედ დღე.
და იყო მახლობელ დღესასწაული იგი Page of ms. L: 434R ჰურიათაჲ და აღვიდა იესუ იერუსალჱმდ.
და პოვნა ტაძარსა მას, რომელნი ჰყიდდეს ზროხასა მას და ცხოართა და ტრედსა, და კერმისმცვალებელნი, რომელნი სხდეს.
და ქმნა შოლტი საბელთაჲ და გამოასხა ყოველი ტაძრისა მისგან, ცხოარი იგი და ზროხაჲცა; და სპილენძი თესლისმოფარდულთაჲ მათ განაბნია;
და ჰრქუა: აღიღეთ ესე ამიერ და ნუ ჰყოფთ სახლსა მამისა ჩემისასა სახლ სავაჭროდ.
მოეჴსენა მოწაფეთა, რამეთუ წერილ არს: შურმან სახლისა შენისამან შემჭამა მე.
მიუგეს ჰურიათა და ჰრქუეს მას: რასა სასწაულსა მიჩუენებ ჩუენ, [რამეთუ] ამას იქმ?
მიუგო იესუ Page of ms. L: 433V და ჰრქუა: დაჰჴსენით ტაძარი ესე ღმრთისაჲ და მესამესა დღესა აღვმართო ეგე.
ჰრქუეს მას ჰურიათა: ორმეოც და ექუსსა წელსა აღეშენა ტაძარი ესე, და შენ სამსა დღესა აღმართო ეგე?
იგი იტყოდა არა ტაძრისათუის, არამედ თუისისა გუამისათუის.
მოეჴსენა მისი მოწაფეთა მისთა, რამეთუ ამისთჳს იტყოდა, და ჰრწმენა წიგნისაჲ და სიტყუაჲ იგი, რომელ ჰრქუა მათ იესუ.
და ოდეს იყო იერუსალჱმს პასექსა მას დღესასწაულსა, მრავალთა ჰრწმენა მისი, რამეთუ ხედვიდეს სასწაულთა მისთა, რომელთა იქმოდა.
ხოლო იესუ თუით არავის არწმუნებდა
რამეთუ არა უჴმდა, რაჲთა წამოს ვინმე კაცისა მისთუის, [რამეთუ] იცოდა, Page of ms. L: 435R რაჲ იყო კაცისა მის თანა
Page of ms. L: 534R და ვითარცა აღვიდა იესუ იერუსალჱმდ ზატიკსა მას დღესასწაულსა, მრავალთა ჰრწმენა მისი სახელისა მიმართ მისისა, რამეთუ ხედვიდეს სასწაულთა მისთა, რომელთა იქმოდა.
ხოლო თუით იესუ არა არწმუნებდა მათ თავით თუისით, რამეთუ იცოდეს იგი ყოველთა;
[რამეთუ არა უჴმდა], რაჲთა წამოს ვინმე კაცისა მისთუის, რამეთუ მან თუით იცოდა, კაცისა მის თანა რაჲ იყო.
