Page of ms. P: 357R და იყო, ადგილსა რომელსამე თავადი ილოცვიდა. და ვითარცა დასცხრა ლოცვისაგან, ჰრქუა ვინმე მას მოწაფეთაგანმან: [უფალო], გუასწავე ჩუენ ლოცვაჲ, ვითარცა-იგი იოვანე ასწავა თჳსთა მოწაფეთა.
ხოლო თავადმან ჰრქუ მათ: რაჟამს ილოცვიდეთ, თქუთ: მამაო ჩუენო ზეცათაო, წმიდა იყავნ სახელი შენი, მოვედინ სუფევაჲ შენი, იყავნ ნებაჲ შენი,
პური ესე ჩუენი არსებისაჲ მომეც ჩუენ დღითი-დღე, და მომიტევენ ჩუენ ცოდვანი ჩუენნი, და ჩუენცა მიუტეობთ ყოველთა თანა-ნადებთა, ჩუენთა, და ნუ შემიყვანებ ჩუენ განსაცდელსა.
და ეტყოდა მათ: ვის თქუენგანსა ესუას მეგობარი და მოვიდეს მისა შუა-ღამეს და ჰრქუას[ს] მას: მეგობარო, მავასხენ სამნი პურნი,
რამეთუ მეგობარი მოვიდა ჩემდა გზით, და არაჲ მაქუს, რაჲ დაუგო მას.
მიუგოს მას შინაჲთ გამო და ჰრქუას: ნუ შრომასა შემამთხუევ მე, რამეთუ კარი დაჴშულ არს. და ყრმანი ჩემნი ჩემ თანა არიან სახელსა ზედა; ვერ ძალ-მიც აღდგომად და მიცემად შენდა.
გეტყჳ თქუენ: და ღათუ არა ეძლოს აღდგომად და მიცემად, რამეთუ არს იგი მეგობარ მისა, წყინებისა მისთჳს მისისა აღდგეს და მისცეს მას, რაოდენიცა უჴმდეს მას.
ხოლო მე გეტყჳ თქუენ: ითხოვდით და მოგეცეს, ეძიებდით და ჰპოოთ, ირეკდით და განგეღოს თქუენ,
რამეთუ ყოველი რომელი ითხოვდეს, მოიღოს, და რომელი ეძიებდეს, პოოს, და რომელი ირეკდეს, განეღოს.
ვის უკუე თქუენგანსა მამასა სთხოვდეს ძჱ პურსა, ქვაჲ ნუ მისცესა? გინა თუ თევზსა სთხოვდეს, ნუ თევზისა წილ გუელი მისცესა?
გინა თუ კუერთხსა სთხოვდეს, ნუ ღრიაკალი მისცესა? უკუეთუ თქუენ უკეთურთა იცით მისაცემელი კეთილი მიცემად შვილთა თქუენთა, რაოდენ უფროჲს მამამან ზეცით მოსცეს სული წმიდაჲ, რომელნი სთხოვდენ მას.
Page of ms. P: 268R და იყო, ვიდრე იგი იტყოდა-ღა მას, არ-ვინმე-იღო დედაკაცმან ჴმაჲ ერსა შორის და ჰრქუა მას: ნეტარ არს მუცელი, რომელმან გიტჳრთა შენ, და ძუძუნი, რომელთა სწოვდ შენ.
ხოლო თავადმან ჰრქუა მას: არამედ ნეტარ არიან, რომელთა ისმინონ სიტყუაჲ ღმრთისაჲ და დაიმარხონ იგი.
და ვითარცა ერი იგი შეკრბებოდა მის წინაშე, იწყო სიტყუად მათა: ნათესავი ესე ნათესავი ბოროტი არს, სასწაულსა ითხოვს, და საწაული არა ეცეს მას, არამედ სასწაული იგი იონაჲსი.
ვითარ-იგი ექმნა [იონა] სასწაულ Page of ms. P: 268V ნინეველთა, ეგრჱთ იყოს ძჱ კაცისაჲ.
დედოფალი იგი სამხრისაჲ აღდგეს სასჯელსა მას კაცთა თანა ამის ნათესავითა და დასჯიდეს მათ, რამეთუ მოვიდა კიდით ქუეყანისაჲთ სმენად სიბრძნესა სოლომონისსა; და აჰა ესერა უფროჲს სოლომონისსა არს აქა.
კაცნი ნინეველნი აღდგენ სასჯელსა ნათესავისა ამის თანა და დასჯიდენ მათ, რამეთუ შეინანეს ქადაგებასა მას იონაჲსსა; და აჰა ესერა უფროჲს იონაჲსსა არს აქა.
Page of ms. P: 252R ამისთჳსცა-იგი სიბრძნემან ღმრთისამან თქუა: მივავლინენ მათა წინაწარმეტყუელნი და მოციქულნი, და მათგანნი მოსწყჳდენით და სდევნენით.
რაჲთა იძიოს სისხლი იგი ყოველთა წინაწარმეტყუელთაჲ, დათხეული დასაბამითგან სოფლისაჲთ ნათესავისა ამისგან,
სისხლითგან აბელის მართლისაჲთ ვიდრე სისხლადმდე ზაქარიაჲსა, ძისა ბარაქისა, რომელი წარსწყმიდეთ შორის საკურთხევლისა მის [და] ტაძრისა. [ჰე] გეტყჳ თქუენ, გამოიძიოს ნათესავისა ამისგან.
ვაჲ თქუენდა, შჯულის-მოძღუარნო, რამეთუ დაჰმალენით კლიტენი სასუფეველისანი; თქუენ შე-არა-ხუალთ და შემავალთა აყენებთ.
და ვითარცა ამას იტყოდა იესუ წინაშე ყოვლისა ერისა, განიზრახვიდეს მწიგნობარნი იგი და ფარისეველნი ბოროტსა; და უნდა სიტყუაჲ; და ჰგმობდეს მას მრავლისათჳს სიტყჳსა,
და უმზირდეს მას [პოვნად] პირისა მისისაგან სიტყუასა, რაჲთა შეასმინონ იგი.
