Page of ms. P: 72R ყოველთა ამათ მცნებათა, რომელთა გამცნებ თქუენ დღეს, დაიმარხენით ყოფად, რაჲთა სცხონდეთ და განმრავლდეთ და დაიმკჳდროთ ქუეყანაჲ იგი, რომლისათჳს ეფუცა უფალი მამათა თქუენთა.
და მოიჴსენოთ ყოველივე იგი გზაჲ, რომელსა მოგიყვანა შენ უფალმან ღმერთმან შენმან უდაბნოსა მას, რაჲთა განგაბოროტოს და გამოგცადოს შენ და გამოცადოს გული შენი, და-ძი-იმარხნე მცნებანი მისნი ანუ არა.
და ბოროტი გიყო შენ, დაგამშია შენ, და გაჭამა მანანაჲ უდაბნოსა ზედა, რომელი არა იცო\დეს Page of ms. P: 72V მამათა შენთა, რაჲთა გითხრას შენ, რამეთუ არა ხოლო პურითა ცხონდების კაცი, არამედ ყოვლითა სიტყჳთა, რომელი გამოვალს პირისაგან ღმრთისა, ცხონდების კაცი.
სამოსელი შენი არა განკფდა შენგან, ფერჴი შენი არა გამოგტკუფეს.
და სცნა გულითა შენითა, რამეთუ ვითარცა-ვინ სწავლინ კაცი შვილსა თჳსსა, ეგრჱთ გსწავლიდა შენ უფალი.
და დაიმარხენ მცნებანი უფლისა ღმრთისა შენისანი სლვად გზათა მისთა და რაჲთა გეშინოდის მისა.
რამეთუ უფალსა ღმერთსა შენსა შეჰყავ შენ ქუეყანასა მას კეთილსა და ფრიადსა, სადა-იგი ჴევნი წყალთანი და წყარონი უფსკრულთანი გამოვლენ ველთაგან მისთა;
ქუეყანაჲ იფქლისა და ქრთილისაჲ, ვენაჴოანი და ლეღოანი, ბროწეულისაჲ, ქუეყანაჲ ზეთის-ხილისაჲ, ზეთისა და თაფლისაჲ;
ქუეყანაჲ, რომელსა ზედა არა ნაკლულევანებით სჭამდენ პურსა შენსა, და არა გაკლდეს მას ზედა, რომლისა ქვანი მისნი არიან რკინა, და ქვათაგან მისთა გამოჰკუეთნე რვალნი.
სჭამდე და განსძღებოდი, და აკურთხევდე უფალსა ღმერთსა შენსა ქუეყანასა მას კეთილსა, რომელი უფალმან ღმერთმან შენმან მოგცეს შენ.
ეკრძალე თავსა შენსა, ნუუკუე დაივიწყო უფალი ღმერთი შენი, ვითარმცა არა დაიმარხენ მცნებანი მისნი და სამართალნი მისნი, რაოდენთა გამცნებ შენ დლეს.
ნუუკუე სჭამდე რაჲ და განსძღებოდი და სახლებსა კეთილსა იშჱნებდე და დაიმკჳდრო მას შინა;
ცხოვარი და ზროხაჲ და განგიმრავლდეს შენ, ოქროჲ და ვეცხლი შენი და ყოველი, რაჲ იყოს შენი;
და აჰმაღლდე გულითა შენითა და დაივიწყო უფალი ღმერთი შენი, რომელმან გამოგიყვანა შენ ქუეყანით ეგჳპტით სახლისაგან კირთებისა;
რომელმან მოგიყვანა შენ უდაბნოსა მას დიდსა და საშინელსა, სადა-იგი გუელი და ღრიაკალი კბენდა Page of ms. P: 73R და სადა-იგი არა იყო წყალი, რომელმან გამოგიდინა შენ წყაროჲ წყლისაჲ კლდისაგან;
... რომელი არა იცოდე შენ, არცა მამათა შენთა, რაჲთა ბოროტი გიყოს შენ და გამოგცადოს და კეთილი გიყოს შენ უკუანაჲსკნელ.
ნუ იტყჳ გულსა შენსა, ვითარმედ ძალმან ჩემმან და სიმტკიცემან მკლავისა ჩემისამან მიყო მე ძალი ესე დიდი.
და მოიჴსენო უფალი ღმერთი შენი, რამეთუ მან მოგცა შენ ძალი ყოფად ძრიელებისა, რაჲთა დაამტკიცოს აღთქუმაჲ მისი, რომელ ეფუცა მამათა შენთა, ვითარცა-ესე დღეს.
და იყოს, უკუეთუ დავიწყებით დაივიწყო უფალი ღმერთი შენი და მიხჳდე შედგომად ღმერთთა უცხოთა და მსახურებდე მათ, გიწამებ თქუენ ცასა და ქუეყანასა, წარწყმედით წარწყმდეთ.
ვითარცა-იგი სხუანი ნათესავნი, რომელნი უფალმან ღმერთმან წარწყმიდნა პირისაგან შენისა, ეგრე წარსწყმდეთ ამისთჳს, რამეთუ არა ისმინეთ ჴმაჲ უფლისა ღმრთისა თქუენისაჲ.
