Page of ms. P: 312V და იყო, თთუესა მას პირველსა, მეორესა წელსა გამოსლვასა მათსა ეგჳპტით, თთჳს თავსა აღემართა კარავი იგი.
და დადგნა სუეტის თავნი იგი მისნი და განუთხინა მოქლონი იგი და აღჰმართნა სუეტნი მისნი.
და განჰმარტა ეზოები იგი კარავსა მას, და დაჰბურა საბურველი იგი კარვისაჲ მის ზედა ზედა კერძო, ვითარცა-იგი უბრძანა უფალმან მოსეს.
და მოიხუნა საწამებელნი იგი და შთასხნა იგინი კიდობანსა მას და განუთხინა უღელნი იგი ქუეშე კიდობანსა მას.
და შეიღო კიდობანი იგი შინაგან კარავსა მას და დაჰბურა საბურველი კარვისაჲ მის და დაფარა კიდობანი იგი საწამებელისაჲ, ვითარცა უბრძანა უფალმან მოსეს,
და დადგა ტაბლაჲ Page of ms. P: 313R იგი კარავსა მას შინა საწამებელისასა ჩრდილოჲთ კერძო გარეშე კრეტსაბმელისა მის კარვისა მის საწამებელისასა.
და დააგო მას ზედა პური იგი შესაწირავი წინაშე უფლისა, ვითარცა უბრძანა უფალმან მოსეს;
და დადგა სანოვაგჱ იგი კარავსა მას შინა საწამებლისასა ჩრდილოჲთ კერძო გარეშე კრეტსაბმელისა კარვისა მის საწამებელისა ადგილსა მას სამხრით კერძოსა.
და დადგნა სასანთლენი მისნი მის ზედა წინაშე უფლისა, ვითარცა უბრძანა უფალმან მოსეს.
და დადგა საკურთხეველი იგი ოქროჲსაჲ კარავსა მას შინა საწამებელისასა წინაშე კრეტსაბმელისა მის.
და აკუმია საკუმეველი აღზავებული მას ზედა, ვითარცა უბრძანა უფალმან მოსეს.
და დადგა საკუერთხი იგი ნაყოფთაჲ კართა ზედა კარვისა მის საწამებელისათა.
და აღდგა ეზოჲ იგი გარემო კარავსა მას და საკურთხეველსა მას ზედა და აღასრულა მოსე ყოველივე იგი საქმჱ.
და დაფარა ღრუბელმან მან კარავი იგი საწამებელისაჲ, და აღივსო დიდებითა უფლისაჲთა კარავი იგი.
და ვერ ჴელ-ეწიფა მოსეს შესლვად კარავსა მას საწამებელისასა, რამეთუ აგრილობდა მას ღრუბელი იგი და დიდებითა უფლისაჲთა აღივსო კარავი იგი.
