და იყო, შარავანდედობასა მას ამფალისსა, სენაარელთა მეფისასა, არიოქ, მეფჱ ელადელთაჲ, და ქოდოლაგომორ, მეფჱ ელამელთაჲ, და თარგალ, მეფჱ წარმართთაჲ.
მოსრულ იყვნეს ბრძოლად ბარრაჲსა, სოდომელთა მეფისათჳს, და ბარსაჲსა, გომორელთა მეფისა, სენაჰარისა, ადამელთა მეფისა, და [სჳმობორისა], სებოიმელთა მეფისა, და ბარაკ მეფისა, ესე იგი არს სეგორი.
ესე ყოველნი მეფენი შეიზრახნეს და ერი იგი შეიკრიბეს ჴევსა მას მარილოანსა და მთასა ზედა და ზღუასა მას მარილოანსა.
რამეთუ თორმეტ წელ დამონებულ იყვნეს ქოდოლაგომორ მეფესა მას და მეათცამეტესა წელსა განუდგეს მას.
აწ წელსა მას მეათორმეტესა მოვიდა ქოდოლაგომორ, მეფჱ იგი, და მეფენი იგი, რომელ იყვნეს მის თანა, და მოწყჳდნეს მათ გმირნი იგი ასტარონს შინა და კარნამს, და მოსპეს ერი იგი ძრიელი ერთბამად მათ თანა, და უმელნი იგი, რომელ იყვნეს სავჱს ქალაქისანი.
და ქორომელნი იგი, რომელნი იყვნეს მთასა მას სეირსა ვიდრე საზღვრადმდე ბილეკომისა(!), რომელი დგას ფარნეს უდაბნოსა მას.
მერმე მოიქცეს, მოვიდეს იგინი წყაროსა მას ზედა სასჯელისასა, რამეთუ ესე თავადი არს კადჱ. და მოწყჳ\დნეს Page of ms. P: 19R მუნ მთავრები იგი ამალეკელთანი და ამორეველთანი, რომელნი დაშჱნებულ იყვნეს ასასანთამარს შინა.
აწ გამოვიდეს სოდომელთ მეფემან და ადამელთ მეფემან და სებოიმელთ მეფემან, ბარაკ სეგორელთ მეფემან. განეწყვნეს და განემზადნეს ბრძოლად მათ მეფეთა ჴევსა მას ადაოცთასა.
ქოდალაგომორს, ელამელთა მეფესა, და თარგალს, წარმართთა მეფესა, და არიოქ, სერაჰელთა მეფესა - ოთხნი ესე მეფენი შარავანდედნი ხუთთა შარავანდედთა.
და ჴევები ადაოცისაჲ მის უყისაჲ უყსა თანა და გუბი გუბსა თანა, ესე იგი არს მალთითა და კუპრითა სავსჱ. ივლტოდვს და განიბნინეს მეფჱ იგი სოდომელთა და გომორელთაჲ და შთაცჳვეს იგინი გუბსა მას, და რომელნი-იგი დაშთომილ-იყვნეს, მთად კერძო წარივლტოდეს.
მიიწინეს მეფენი იგი და წარიღეს და წარტყუენეს მთით კერძოჲ იგი და ყოველი ნათესავი სოდომელთაჲ და ყოველი ფასი მათი და საცხოვარი და მონაგები ყოველი ტყუედ წარიღეს.
წარტყუენეს ლოთცა, ძმის წული აბრაჰამისი, და ყოველი ნაყოფი და მონაგები მისი და წარვიდეს.
და მოიწია ღაღადის-მგდებელი აბრაჰამისა მუხასა მას წიაღ მამბრესა ძმათა მათგანი ესქორისთაჲ და ავნანისთაჲ, რომელნი-იგი იყვნეს ჴელ-ცემულ აბრაჰამისა.
ესმა რაჲ აბრაჰამს, ვითარმედ წარიტყუენა ლოთ, ძმის წული მისი, აღდგა მუნთქუეს ოდენ, ანდერძ-ყო შვილთა მათ ჴელით სწავლულთაჲ, მონათა თჳსთაჲ, და დევნა-უყო კუალსა მათ მეფეთასა სამას ათურამეტითა ნიჟუგითა.
და დაესხა შარავანდედთა მათ ღამე თავადი იგი და მონანი იგი მისნი მის თანა, Page of ms. P: 19V მოსრნა და მოწყჳდნა იგინი. და დასდვა სახელი მას ველსა ველი შარავანდედთაჲ და ნეშტნი იგი მათნი მეოტად წარიქცინა მიქობადმდე, რომელ არს მარცხლ კერძო დამასკესა.
და უკუმოიქცია ტყუჱ იგი ყოველი რემაკთაჲ და ყოველი მონაგები სოდომელთა მათ და გომორელთაჲ და ლოთ, ძმის წული თჳსი მოაქცია ყოვლითურთ ნატყუენავით და ფასი და მონაგები და ცოლები მათი და ყოველი ერი მათი.
ვითარცა მოვიდა და მოიწია ღელესა მას სავჱსსა, გამოეგებვოდა მას მეფჱ იგი გომორელთაჲ, რაჟამს მოქცეულ იყო და მოვიდოდა იგი შემდგომად მოწყუედისა მის მეფეთაჲსა, შეემთხჳა ველსა მას შარავანდედთასა,
და მელქიზედეკ, მეფემან სალემისამან, გამოაგება მას პური და ღჳნოჲ. და იყო იგი მღდელი ღმრთისა მაღლისაჲ.
და აკურთხა მელქიზედეკ აბრაჰამი და თქუა: კურთხეულ იყავნ აბრაჰამი ღმრთისა მიერ მაღლისა, რომელმან ქმნნა ცანი და ქუეყანაჲ.
კურთხეულ იყავნ ღმერთი მაღალი, რომელმან მოგცნა მტერნი შენნი ქუეშე ფერჴთა შენთა. და მოიღო აბრაჰამ და მისცა მელქიზედეკს ათეული ყოვლისა მისგან ნატყუენავისაჲ.
და ჰრქუა მეფემან სოდომელთამან აბრაჰამს: კაცები ეგე ხოლო ნატყუენავისაჲ მაგის მე მომეც, და ყოველი ეგე რემაკ ჴდალთაჲ და ფასი და ნაყოფი, რომელ დაჰყარე, ეგე ყოველი შენდა იყავნ.
და ჰრქუა აბრაჰამ მეფესა მას სოდომელთასა: აღვიპყრნე ჴელნი ჩემნი უფლისა მიმართ ღმრთისა მაღლისა, რომელმან ქმნნა ცანი და ქუეყანაჲ.
ვითარმედ მკედისა ნაწყუედითგან მიჴამლისტარადმდე არა მოვიღო ყოვლისავე ამისგანი, რომელი-ეგე მე შენ წინა მიყავ, რაჲთა არა სთქუა ხვალის ადრე, ვითარმედ: მე განვამდიდრე აბრაჰამი;
Page of ms. P: 20R გარნა ესე ხოლო, რომელ-რაჲ ჭამეს სპარაზენთა ამათ, და ნაწილი ნადთაჲ ამათ ჩემთაჲ: ავნანისი და ესქურისი და მამბრჱსი. ამათ ხოლო მიიღონ ნაწილი შენგან და განუტევნე იგინი.
