Page of ms. P: 287R და ჰრქუა უფალმან ღმერთმან აბრაჰამს: გამოვედ ქუეყანისაგან შენისა და სახლისაგან მამისა შენისა და მოვედ ქუეყანად, რომელი მე გიჩუენო შენ,
და გყო შენ ნათესავად დიდად და გაკურთხო შენ და განვადიდო სახლი შენი. Page of ms. P: 288R და იყო შენ კურთხეულ.
და ვაკურთხნე მაკურთხეველნი შენნი და ვწყევნე მწყევარნი შენნი. და იკურთხეოდიან შენდამი ყოველნი ტომნი ქუეყანისანი.
და წარმოვიდა აბრაჰამ, ვითარცა ეტყოდა მას უფალი, და მოვიდა მის თანა ლოთცა. ხოლო აბრაჰამ იყო სამეოც და ათორმეტის წლის, რაჟამს გამოვიდა ქუეყანით ქარანით.
და მოიყვანა აბრაჰამ სარა, ცოლი თჳსი, და ლოთ, ძმისწული მისი, და ყოველი მონაგები მისი, რომელი მოეგო ქარანს შინა. გამოვიდეს მოსლვად ქუეყანად ქანანისა და მოვიდეს ქუეყანასა მას ქანანელთასა.
და მიმოვლო აბრაჰამ ქუეყანასა მას და იხილა სიგრძჱ მისი ვიდრე ადგილადმდე სჳქემისა მუხასა მას მაღალსა. ხოლო ქანანელნი იგი მაშინ დამკჳდრებულ იყვნეს ქუეყანასა მას.
და ეჩუენა აბრაჰამს უფალი და ჰრქუა მას: ნათესავსა შენსა მივსცე ქუეყანაჲ ესე. და უშჱნა მუნ აბრაჰამ საკურთხეველი უფალსა, რომელი-იგი ეჩუენა მას.
და წარმოვიდა მიერ მთასა მას აღმოსავალით ბეთელდ. და აღმართა მუნ კარავი თჳსი ბეთელი ზღჳთ კერძო. და უშჱნა მუნ საკურთხეველი უფალსა და უწოდა ადგილსა მას სახლი ღმრთისაჲ.
