და იყო, რაჟამს იწყეს კაცთა განმრავლებად ქუეყანასა ზედა, ასულებ ესხნეს მათ.
და იხილნეს ძეთა მათ ღმრთისათა ასულნი იგი კაცთანი, რამეთუ შუენიერ იყვნეს, და მოიყვანნეს თავისა თჳსისა ცოლებად ყოველთაგან, რომელი გამოირჩიეს.
და თქუა ღმერთმან: არა დაადგრეს სული ჩემი კაცთა ამათ, რამეთუ ჴორციელ არიან იგინი; იყვნენ დღენი მათნი ას და ათ წელ.
ხოლო გმირნი იყვნეს ქუეყანასა ზედა მათ დღეთა შინა, და შემდგომად მისა ვითარცა შევიდიან ძენი იგი ღმრთისანი ასულთა კაცთასა და შობდეს მათგან, იყვნეს გმირნი საუკუნითგან კაცნი იგი სახელოვან.
და იხილა უფალმან ღმერთმან, რამეთუ განმრავლდეს უკეთურებანი მათნი ქუეყანასა ზედა და ყოველივე Page of ms. P: 37R განიზრახვიდა განკრძალულად ბოროტსა გულსა თჳსსა ყოველსა დღესა.
და შეინანა ღმერთმან, რამეთუ შექმნა კაცი ქუეყანასა ზედა და განიზრახა.
და თქუა ღმერთმან: აღვჴოცო კაცი, რომელი ვქმენ, პირისაგან ქუეყანისა კაცითგან მიპირუტყუადმდე, და ქუეწარმავალითგან ვიდრე მფრინველადმდე ცისა; შევინანე, რამეთუ ვქმნენ იგინი.
ხოლო ნოვე პოვა მადლი წინაშე ღმრთისა. Page of ms. P: 162V
ესე შობანი არიან ნოვჱსნი: ნოვე კაცი მართალი იყო და სრულ ნათესავსა მას შორის; და სათნო-ეყო ნოვე ღმერთსა.
და შვნა სამ ძჱ: სემ, ქამ და იაფეთ.
და განიხრწნა [ქუეყანაჲ] წინაშე Page of ms. P: 163R ღმრთისა და აღივსო ქუეყანაჲ სიცრუვეთა მათთაგან.
და იხილა უფალმან ღმერთმან ქუეყანაჲ, და იყო იგი განხრწნილ, რამეთუ განხრწნა ყოველმან ჴორციელმან გზაჲ თჳსი ქუეყანასა ზედა.
და ჰრქუა უფალმან ღმერთმან ნოვეს: ჟამი ყოვლისა კაცისაჲ მოიწევის წინაშე ჩემსა, რამეთუ აღივსო ქუეყანაჲ სიცრუვეთა მათთაგან. და აჰა ესერა მე განვხრწნე იგინი და ქუეყანაჲ.
იქმენ თავისა შენისა კიდობანი ძელთაგან ულპოლველთა, ბუდედ-ბუდედ ჰქმნე იგი, მოჰკირო იგი შინაჲთ, გარჱთ ნავთითა.
და ესრჱთ ჰქმნე კიდობანი იგი: სამას წყრთა ჰყო სიგრძჱ კიდობნისაჲ მის და ერგასის წყრთა სივრცჱ მისი და ოცდაათ წყრთა სიმაღლჱ მისი.
ზე-შეკრებულად ჰყო კიდობანი იგი და ერთსა წყრთასა ზედა შეასრულო, ხოლო კარი კიდობნისაჲ მის ჰყო გუერდით კერძო, ქუეშე და ზე სახლებად აღაშჱნო იგი ძგიდედ-ძგიდედ.
ხოლო მე აჰა მოვჰჴადო წყლით-რღუნაჲ ქუეყანასა ზედა განხრწნად ყოველი ჴორციელი, რომელსა თანა არს სული ცხოველი ცასა ქუეშე, და რაოდენი-რაჲ იყოს ცასა ქუეშე, მოწყდეს.
და დავამტკიცო აღთქუმაჲ ჩემი შენ თანა, და შეხჳდე კიდობანსა მას შენ და ძენი შენნი და ცოლი შენი და ცოლნი ძეთა შენთანი შენ თანა კიდობანსა მას.
და ყოველთაგან საცხოართა და ყოვლისაგან ჴორციელისა ორი - მამალი და დედალი - ყოველთაგან პირუტყუთა შეიყვანო კიდობანსა მას, რაჲთა ჰზრდიდე თავისა შენისა თანა; მამალი და დედალი იყოს.
ქუეწარმავალი თესლად-თესლადისა მათისაჲ, ორი ყოვლისაგან შევიდეს შენ თანა მამალი და დედალი - გამოზრდად.
შენ შეიღე შენ თანა ყოველთაგან საზრდელთა, რაჲთა სჭამდე, Page of ms. P: 163V და შეიკრიბო თავისა შენისა, რაჲთა იყოს შენდა და მათდა საჭმლად.
და ყო ნოვე, ვითარცა უბრძანა უფალმან ღმერთმან.
