TITUS
Biblia Iberica: Psalterium et Odae
Part No. 57
Previous part

Chapter: 57 
Verse: 2  Link to mcat Link to sept Link to armat   ჭეშმარიტად თუმცა სიმართლესა იტყოდეთ და მართალსა სჯიდით, ძენო კაცთანო;

Verse: 3  Link to mcat Link to sept Link to armat   არამედ აწ უფროჲს გულითა თქუენითა უსჯულოებასა იქმთ ქუეყანასა ზედა, სიცრუესა ჴელნი თქუენნი ნივთებენ.

Verse: 4  Link to mcat Link to sept Link to armat   უცხო იქმნეს ცოდვილნი დედისაგან სცთებოდეს საშოჲთგან და იტყოდეს სცრუესა.

Verse: 5  Link to mcat Link to sept Link to armat   გუელის წყრომაჲ მათი მსგავს არს გუელისა ვითარცა ასპიტისა და იქედნისა ყრუისა, რომლისანი დაყოფილ არიედ ყურნი მისნი.

Verse: 6  Link to mcat Link to sept Link to armat   რამეთუ არა ესმინ მას ჴმაჲ მსახრვალისა ჴელოვნისაჲ, არცა მიიღის მან წამალი წამლის მცემელისაგან ბრძნისა.

Verse: 7  Link to mcat Link to sept Link to armat   ღმერთმან შემუსრნეს კბილნი მათნი პირსა შინა მათსა, და შუანი ლომთანი შეფქვნეს უფალმან.

Verse: 8  Link to mcat Link to sept Link to armat   შეურაცხ იქმნენ იგინი ვითარცა წყალი დათხეული, და გარდაცუმასა მშუილდისა მათისასა მოუძლურდენ.

Verse: 9  Link to mcat Link to sept Link to armat   ვითარცა ცჳლი რაჲ დადნის, ეგრე მოესრულნენ; დაეცა მათ ზედა ცეცხლი და არა იხილეს მზე.

Verse: 10  Link to mcat Link to sept Link to armat   ვიდრემდის არღა თანა-ეყოს ეკალი მათი, და ვითარცა ძეძუმან რისხვით ცხოველნი შეწუნეს იგინი.

Verse: 11  Link to mcat Link to sept Link to armat   იხარებდეს მართალი, რაჟამს ხედვიდეს შურის-გებასა, ჴელნი თჳსნი დაიბანეს სისხლითა ცოდვილისაჲთა.

Verse: 12  Link to mcat Link to sept Link to armat   თქუას კაცმან, რამეთუ ჭეშმარიტად არს ნაყოფი მართლისაჲ; და არს ღმერთ, რომელმაႬ საჯნეს იგინი ქუეყანასა ზედა.


Next part


This text is part of the TITUS edition of Biblia Iberica: Psalterium et Odae.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.