TITUS
Biblia Iberica: Psalterium et Odae
Part No. 40
Previous part

Chapter: 40 
Verse: 2  Link to mcat Link to sept Link to armat   ნეტარ არს, რომელმან გულისხმა-ყო გლახაკისა და დავრდომილისაჲ, დღესა ბოროტსა იჴსნას იგი უფალმან.

Verse: 3  Link to mcat Link to sept Link to armat   უფალმან დაიცვას იგი და აცხოვნოს იგი და სანატრელ ყოს იგი ქუეყანასა ზედა, არა მისცეს იგი ჴელთა მტერთა მისთასა.

Verse: 4  Link to mcat Link to sept Link to armat   უფალი შეეწიოს მას ცხედარსა ზედა სალმობისა მისისასა, ყოველი სარეცელი მისი გარე-მოაქციოს არა-ძლებისა მისისაგან.

Verse: 5  Link to mcat Link to sept Link to armat   მე ვთქუ: უფალო, მიწყალე მე, ულხინე სულსა ჩემსა, რამეთუ ვცოდე შენდა

Verse: 6  Link to mcat Link to sept Link to armat   მტერთა ჩემთა თქუეს ბოროტი ჩემთჳს: ოდესმე მოიკუდეს, და წარწყდეს სახელი მისი.

Verse: 7  Link to mcat Link to sept Link to armat   შემო-თუ-ვიდეს ხილვად, ამაოსავე იტყჳნ; გულმან მისმან შეიკრიბა ურჩულოებაჲ თავისა თჳსისაჲ, გარე განვიდის და მასვე იტყჳნ.

Verse: 8  Link to mcat Link to sept Link to armat   ჩემთჳს ცუნდრუკებდეს ყოველნი მტერნი ჩემნი და ჩემდამო ზრახვიდეს ბოროტსა.

Verse: 9  Link to mcat Link to sept Link to armat   სიტყუაჲ უსჯულოებისაჲ დამდვეს ჩემ ზედა: სძინავნ იგი ვის, არღარა ნუ შესძინისა აღდგომაჲ?

Verse: 10  Link to mcat Link to sept Link to armat   რამეთუ ამანცა, კაცმან მშჳდობისა ჩემისამან, რომელსაცა მე ვესევდი, რომელი ჭამდა პურსა ჩემსა, მან განადიდა ჩემ ზედა შეტყუილი.

Verse: 11  Link to mcat Link to sept Link to armat   არამედ მე შენ, უფალო, მიწყალე მე, აღმადგინე მე და მივაგო მათ.

Verse: 12  Link to mcat Link to sept Link to armat   ამით ვცნა, რამეთუ გთნდი შენ, რაჲთა არა უხაროდის ჩემ ზედა მტერთა ჩემთა

Verse: 13  Link to mcat Link to sept Link to armat   ხოლო შენ უბიწოებითა ჩემითა შემიწყნარე მე, დამამტკიცე მე შენ წინაშე უკუნისამდე.

Verse: 14  Link to mcat Link to sept Link to armat   კურთხეულ არს უფალი ღმერთი ისრაელისაჲ ამიერითგან უკუნისამდე! იყავნ, იყავნ !


Next part


This text is part of the TITUS edition of Biblia Iberica: Psalterium et Odae.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.