TITUS
Biblia Iberica: Psalterium et Odae
Part No. 41
Previous part

Chapter: 41 
Verse: 2  Link to mcat Link to sept Link to armat   ვითარცა სურინ ირემსა წყაროთა მიმართ წყალთასა, ეგრეთ სურინ სულსა ჩემსა შენდამი, ღმერთო.

Verse: 3  Link to mcat Link to sept Link to armat   სურინ სულსა ჩემსა შენდამი, ღმერთო ძლიერო და ცხოველო; ოდეს-მე მივიდე და ვეჩუენო მე პირსა ღმრთისასა?

Verse: 4  Link to mcat Link to sept Link to armat   მექმნეს მე ცრემლნი ჩემნი საჭმელ დღე და ღამე, იგინიღა მეტყოდეს მე მარადღე: სადა არს ღმერთი იგი შენი?

Verse: 5  Link to mcat Link to sept Link to armat   ხოლო მე ესე მოვიჴსენი და ნუგეშინის-ვსცი სულსა ჩემსა; რამეთუ განვლო მე ადგილი საყოფელთა საკჳრველთაჲ სახლსა ღმრთისასა, ჴმითა გალობისაჲთა, აღსაარებისაჲთა, ჴმითა ზატიკობისაჲთა.

Verse: 6  Link to mcat Link to sept Link to armat   რად მწუხარე ხარ, სულო ჩემო, ანუ რად შემაძრწუნებ მე? ესევდ ღმერთსა, რამეთუ მე აუარო მას, მაცხოვარსა პირისა ჩემისასა და ღმერთსა ჩემსა.

Verse: 7  Link to mcat Link to sept Link to armat   სული ჩემი შეძრწუნდა ჩემ თანა; ამისთჳს მოგიჴსენო შენ ქუეყანით იორდანით და ერმონით, მთით მცირით.

Verse: 8  Link to mcat Link to sept Link to armat   უფსკრულმან უფსკრულსა ხადა ჴმითა ზე-გარდამოსატევებელთა მისთაჲთა; ყოველნი განსაცხრომელნი შენნი და ღელვანი შენნი მე ზედა-გარდამჴდეს.

Verse: 9  Link to mcat Link to sept Link to armat   დღისი ამცნო უფალმან წყალობაჲ მისი და ღამე გალობაჲ მისი; ლოცვაჲ ჩემი ღმრთისა მიმართ მაცხოვრისა ჩემისა.

Verse: 10  Link to mcat Link to sept Link to armat   ვარქუ ღმერთსა: მწე ჩემდა [ხარ], რად დამაგდებ მე, ანუ რად მწუხარე ვარ მე ჭირითა მტერისაჲთა?

Verse: 11  Link to mcat Link to sept Link to armat   შემუსრვასა ძუალთა ჩემთასა მყუედრიდეს მე მტერნი ჩემნი, იგინიღა მეტყჳედ მე მარადღე, სადა არს ღმერთი იგი შენი?

Verse: 12  Link to mcat Link to sept Link to armat   აწ რად მწუხარე ხარ, სულო ჩემო, ანუ რად შემაძრწუნებ მე? ესევდ ღმერთსა, რამეთუ მე აუვარო მას, მაცხოვარსა პირისა ჩემისასა და ღმერთსა ჩემსა.


Next part


This text is part of the TITUS edition of Biblia Iberica: Psalterium et Odae.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.