და იყო ჩემდა მომართ სიტყუაჲ უფლისაჲ, და თქუა.
შენ, ძეო კაცისაო, წინაწარმეტყუელებდ, და თქუ. ამას იტყჳს ადონა<ჲ> უფალი; ჵ ჵ დღჱ,
რამეთუ ახლოს არს დღჱ იგი უფლისაჲ, აღსასრული თესლებისაჲ მოიწევის.
და იყოს მახჳლი ეგჳპტელთა ზედა, და იყოს შეძრწუნებაჲ ეთიოპიას, და დაეცნენ წყლულნი ეგჳპტეს, და დაირღუენ საყოფელნი მისნი.
სპარსნი და კრეტელნი და ლუდიელნი და ლჳბიელნი, და ყოველნი მწირნი, ძენი იგი აღთქუმისა ჩემისანი, მათ თანა მახჳლითა დაეცნენ მას შინა.
და დაეცეს სიმტკიცე ეგჳპტისაჲ, და დამდაგლდეს გინებაჲ ძლიერებისა მისისაჲ მაგდალოჲთბან ვიდრე სჳჰენედმდე, მახჳლითა დაეცნენ მას შინა, იტყჳს უფალი უფალი.
და მოოჴრდენ შორის სოფელთა მოოჴრებულთა, და ქალაქნი მათნი შროის ქალაქთა მოოჴრებულთა იყვნენ.
და ცნან რამეთუ მე ვარ უფალი, რაჟამს მოვსცე ცეცხლი ეგჳპტესა, და შეიმუსრნენ ყოველნი შემწენი მისნი.
მას დღესა შინა გამოვიდენ ანგელოზნი მოწრაფენი განრყუნად ეთიოპიაჲსა, და იყოს აღტეხაჲ მათ შორის დღესა მას ეგჳპტისასა, რამეთუ აჰა ესერა მოვალს.
ამას იტყჳს უფალი, და წარვწყმიდო სიმრავლე ეგჳპტელთაჲ ჴელითა ნაბუქოდონოსორისითა, მეფისა ბაბილოვნისაჲთა.
ჴელითა მისითა და ერისა მისისაჲთა, ბილწნი წარმართთაგანნი მოვლინებულნი წარწყმედად ქუეყანისა, და იჴადნენ ყოველთა მახჳლნი ეგჳპტესა ზედა, და აღივსოს ქუეყანაჲ წყლულთაგან.
და მივსცნე მდინარენი მათნი ოჴრად; წარვწყმიდო ქუეყანაჲ და სავსებაჲ მისი ჴელითა უცხოთესლთაჲთა, რამეთუ მე Page of ms. J: B90r უფალი ვიტყოდე./
ამას იტყჳს ადონაჲ უფალი; წარვწყმიდნე დიდებულნი მემფით, და ქუეყანასა ეგჳპტისასა მთავარნი არღარა იყვნენ მერმე.
და წარვწყმიდო ქუეყანაჲ ფათურესაჲ, და მოვჰსცე ცეცხლი თანისსა ზედა, და ვყო შურის-გებაჲ დიოსპოლისს.
და მივჰფინო გულის-წყრომაჲ ჩემი საინსა ზედა, ძალსა მას ეგჳპტისასა, და წარვწყმიდო სიმრავლჱ მემფლეთაჲ.
და მოვსცე ცეცხლი ეგჳპტესა ზედა, და შეძრწუნებით შეძრწუნდეს სჳჰეჱ, და დიოსპოლისს იყოს განხეთქაჲ, და განფინნენ წყალნი.
ჭაბუკნი მზის-ქალაქისანი და ბუბასტესანი მახჳლითა დაეცნენ, და ცოლნი მათნი ტყუედ წარვიდენ.
და ტაფანსა ზედა დაბნელდეს დღჱ, რაჟამს შევმუსრო ტომი ეგჳპტისაჲ, და წარვწყმიდო გინებაჲ ძლიერებისა მისისაჲ, და იგი ღრუბელმან დაფაროს, და ასულნი მათნი ტყუედ წარიყვანნენ.
და ვყო საშჯელი ეგჳპტეს, და ცნან რამეთუ მე ვარ უფალი.
და იყო მეათერთმეტესა წელსა, პირველსა თთუესა, შჳდსა მას თთჳსასა, იყო სიტყუაჲ უფლისაჲ ჩემდა მომართ, და თქუა.
ძეო კაცისაო, მკლავნი ფარაო, მეფისა ეგჳპტისანი, შევმუსრენ, და არა შეიხჳნეს, მიცემად მას კურნებაჲ, მიცემად მის ზედა სალბუნი, მიცემად ძალი პყრობად მახჳლისა.
ამისთჳს ამას იტყჳს უფალი უფალი; აჰა ესერა მე ფარაოს ზედა მეფისა ეგჳპტისასა, და შევმუსრნე მკლავნი მისნი ძლიერნი და განრთხმულნი, და დაუგდო მახჳლი მისი ჴელისაგან მისისა.
და განვაბნიო ეგჳპტჱ თესლებსა შორის, და განვაქრინე იგინი სოფლებსა შორის.
და განვაძლიერნე მკლავნი მეფისა ბაბილონისანი, და მივსცე მახჳლი ჩემი ჴელთა Page of ms. J: B90v მისთა, და ეგჳპტესა ზედა მოავლინოს მახჳლი იგი, და წარიღოს/ ავარი მისი, და წარტყუენოს ნატყუენავი მისი.
და განვაძლიერნე მკლავნი მეფისა ბაბილონისანი, და ფარაოჲსნი დაეცნენ, და ცნან რამეთუ მე ვარ უფალი, რაჟამს მივსცე მე მახჳლი ჩემი ჴელთა მეფისა ბაბილონისათა, და განირთხას იგი ქუეყანასა ეგჳპტისასა .
და განვსთესო ეგჳპტჱ თესლებსა შორის, და განვაბნინე იგინი სოფლებსა შორის, და ცნან რამეთუ მე ვარ უფალი.;
