განიძარცუე, იჱრუსალემ, სამოსელი გლოვისა შენისაჲ და ურვილებისა შენისაჲ, და შეიმოსე შუენიერებაჲ [!] დიდებისაგან ღმრთისაჲსა უკუნისამდე,
Page of ms. J: B49v შეიმოსე ჩოტკეცი სიმართ/ლისაგან ღმრთისაჲსა, და დაიდგ ხოირი თავსა შენსა დიდებისა საუკუნოჲსაჲ.
ხოლო ღმერთმან უჩუენოს ყოველთა ცისკიდეთა ბრწყინვალებაჲ შენი,
რამეთუ გერქუას შენ სახელი შენი ღმრთისაგან უკუნისამდე, მშჳდობა სიმართლის და დიდება ღმრთის სასოების.
აღდეგ, იჱრუსალემ, და დადებ ზედა მაღალსა, და მიიხილე აღმოსავალად, და იხილენ შეკრებულნი შვილნი შენნი მზის-დასავალითგან მი-აღმოსავალ<ა>დმდე; სიტყჳთა წმიდისაჲთა უხარის მოჴსენებითა ღმრთისაჲთა;
რამეთუ განვიდეს შენგან მკურცხილნი წარქცეულნი მტერთაგან, ხოლო შემოიყვანნეს იგინი ღმერთმან შენდა აღმაღლებულნი დიდებითა ვითარცა საყდარნი მეუფეთანი.
რამეთუ უბრძანა ღმერთმან დამდაბლებად ყოველთა მთათა მაღალთა და ბორცუთა საუკუნეთა, და ჴევთა აღმოვსებად მოსაწყნარებელად ქუეყანისა, რაჲთა ვიდოდის ისრაჱლი კრძალულ<ა>დ დიდებითა ღმერთისაჲთა.
რამეთუ დააგრილეს მაღნართაცა <და> ყოველთა ხეთა სულნელთა ისრაჱლი ბრძანებითა ღმრთისაჲთა;
რამეთუ უძღოდის ღმერთი ისრაჱლსა სიხარულითა ნათლისა დიდებისა მისისაჲთა ერთბამად მოწყალებითა <და> სიმართლითა მისითა.
