დასაბამსა მეფისა იოაკიმისა, ძისა იოსიაჲსა, მეფისა იუდაჲ<ს>სა, იყო სიტყუაჲ უფლისა მიერ, და თქუა.
ესრე მრქუა უფალმან; დადეგ ეზოსა შინა ტაძრისა უფლისასა, და უბრძანე ყოველსა იუდასა მომავალსა თაყუანის-ცემად ტაძარსა შინა უფლისასა ყოველნი სიტყუანი, რომელ გიბრძანენ შენ თხრობად მათა; ნუ მოაკლებ სიტყუასა.
ვინ უწყის, ისმინონ ხოლო თუ, და მოიქცეს კაცად-კაცადი გზისაგან თჳსისა ბოროტისა, და ვსცხრე ძჳრისაგან, რომელი მე განმიზრახავს ყოფად მათა უკეთურთათჳს სლვათა მათთათჳს.
და ჰრქუა მათ; ესრე თქუა უფალმან, არა თუ ისმინოთ ჩემი სლვად შჯულსა ჩემსა, რომელ მიგეც წინაშე პირსა თქუენსა,
სმენად სიტყუათა წინაწარმეტყუელთა მონათა ჩემთაჲ, რომელ მე მოვავლინენ განთიად, და არა ისმინეთ.
და მივსცე სახლი ესე ვითარცა სელომი, და ქალაქი ესე მივსცე საწყეველად ყოველთა ნათესავთა ქუეყანისათა.
და ესმა მღდელთა და ცრუ-წინაწარმეტყუელთა და ყოველსა ერსა იერემიაჲს სიტყუაჲ, იტყოდა რაჲ იგი სახლსა შინა უფლისასა.
და იყო ვითარცა დადუმნა იერემია სიტყჳსაგან ყოველი რომელი უბრძანა მას უფალმან თხრობად ყოვლისა ერისა, და შეიპყრეს იგი მღდელთა და ცრუ-წინაწარმეტყუელთა და ყოველმან ერმან, და ჰრქუეს, სიკუდილით მოჰკუდე,
რამეთუ სწინაწარმეტყუელებ სახელითა უფლისაჲთა, და იტყჳ; ვითარცა სელომი იყოს სახლი ესე, და ქალაქი ესე აღოჴრდეს მკჳდრთაგან, და განკრბა ყოველი ერი იერემიაჲს ზედა სახლად უფლისა.
და ვითარცა ესმეს სიტყუანი ესე მთავართა იუდაჲსთა, და აღმოვიდეს ტაძრით მეფისაჲთ Page of ms. J: A126v სახლად უფლისა, და დასხდეს წინაშე კართა/ ბჭეთა უფლისა ახალთა.
და ჰრქუეს მღდელთა და ცრუ-წინაწარმეტყუელთა მთავართა მიმართ და ყოველსა ერსა, საშჯელი სიკუდილისაჲ არს ამის კაცისაჲ, რამეთუ წინაწარმეტყუელებდა ქალაქისა ამისთჳს, ვითარცა გესმა ყურთა თქუენთა.
და თქუა იერემია მთავართა მიმართ და ყოვლისა ერისა, უფალმან მომავლინა მე წინაწარმეტყუელებად სახლსა ამას ზედა და ქალაქსა ამას ყოველთა ამათ სიტყუათა, რომელ გესმეს.
და აწ უმჯობეს ყვენით გზანი თქუენნი და საქმენი თქუენნი, და ისმინეთ ჴმაჲ უფლისა ღმრთისა თქუენისაჲ, და დასცხრეს უფალი ბოროტებათაგან, რომელ თქუა თქუენ ზედა.
და ესერა მე ჴელთა შინა თქუენთა ვარ; მყავთ მე ვითარცა ჯერ არს, და ვითარ უმჯობეს გიჩს თქუენ.
ხოლო უწყებით უწყოდეთ, უკუეთუ მომკლათ მე, რამეთუ სისხლსა უბრალოსა დასთხევთ თქუენ ზედა და ქალაქსა ამას ზედა და დამკჳდრებულთა ზედა მას შინა, რამეთუ ჭეშმარიტად მომავლინა მე უფალმან თქუენდა, სიტყუად ყურთა თქუენთა ყოველთა ამათ სიტყუათა.
და თქუეს მთავართა და ყოველმან ერმან მღდელთა მიმართ და ცრუ-წინაწარმეტყუელთა; არა არს ამის კაცისათჳს საშჯელი სიკუდილისაჲ, რამეთუ სახელითა უფლისა ღმრთისა ჩუენისაჲთა იტყჳს ჩუენდამო.
და აღდგეს კაცნი მოხუცებულთაგანნი ერისანი, და ეტყოდეს ყოველსა კრებულსა ერისასა, და თქუეს;
მიქეა მორათიტელი წინაწარმეტყუელებდა დღეთა ეზეკია მეფისა იუდაჲსთა, და ყოველსა ერსა იუდაჲსსა ჰრქუა; ეს<რ>ე თქუა უფალმან; სიონი ვითარცა აგარაკი მოიჴნას, და იჱრუსალემი ვითარცა ხილის-საცავი იყოს, და მთაჲ იგი სახლისა უფლისაჲ იყოს სერტყ მაღნარის.
მოკლვით ნუ მოკლა ეზეკია, მეფემან იუდაჲსმან, და ყოველმან იუდამან, არამედ შეეშინა მათ უფლისა, და ევედრნეს პირსა უფლისასა, და დასცხრა უფალი ბოროტებათაგან, რომელ თქუა მათ ზედა, და ჩუენ ვქმენთ ძჳრი დიდი სულთა ზედა ჩუენთა.
და კაცი ერთი ვინ მე წინაწარმეტყუელებდა სახელითა უფლისაჲთა; ურია, ძჱ სამეაჲსი კარიათიარიმელი, ქალაქსა ამას ზედა და ქუეყანისა ამისთჳს მსგავსად ყოველთა სიტყუათა იერემიაჲსთა .
და ესმა მეფესა იოაკიმს და ყოველთავე მდიდართა მისთა და ყოველთა Page of ms. J: A127r მთავართა/ ყოველნი სიტყუანი მის-მიერნი, და ეძიებდეს მას მოკლვად, და ესმა ურიას, და შეეშინა, და ივლტოდა და შევიდა ეგჳპტედ.
და წარავლინნა იოაკიმ მეფემან კაცნი ეგჳპტედ, ელდათან, ძჱ აქაბორისი, და კაცნი მის თანა.
და გამოიყვანეს იგი მიერ, და მოიყვანეს იგი მეფისა იოაკიმისა, და მოკლა იგი მახჳლითა, და შთააგდო მძორი მისი სამარესა ძეთა ერისა მისისათა.
ხოლო ჴელი აქიკამისი, საფანის ძისაჲ, იყო იერემიაჲს თანა, რაჲთამცა არა მიეცა იგი მოკლვად ჴელთა ერისათა.
