დასაბამსა მეფისა იოაკიმისა, ძისა იოსიაჲსა, მეფისა იუდაჲსა, იყო სიტყუაჲ ესე იერემიაჲს მიმართ უფლისა მიერ, და თქუა.
ესრე მრქუა მე უფალმან; იქმნენ შენდად შესაკრველნი და საჴივნი, და დაისხენ ქედსა შენსა.
და მიუძღუანენ იგინი მეფესა იუდაჲსსა და მეფესა ძეთა ამონისთასა და მეფესა ტჳროსისა და მეფესა სიდონისასა ჴელითა მოციქულთაჲთა, რომელნი მივიდოდიან შემთხუევად მათა იჱრუსალემდ სედეკიაჲსა, მეფისა იუდაჲსა.
და ამცენ უფალთა მათ მიმართ, და არქუ; ესრე თქუა უფალმან ძალთამან, ღმერთმან ისრაჱლისამან,
ესრე არქუთ უფალთა თქუენთა; მე შევქმენ ქუეყანაჲ და კაცი და საცხოვარი, რაოდენნი არიან პირსა ზედა ქუეყანისასა, ძალითა ჩემითა დიდითა, და მკლავითა ჩემითა მაღლითა; და მივეც იგი მას, რომელიცა მთნდა წინაშე თუალთა ჩემთა. და აწცა მე ვარ;
მივსცე ყოველი ესე ქუეყანაჲ ჴელსა ნაბუქო<დო>ნოსორ, მეფისა ბაბილოვნისა, მონისა ჩემისასა, და მჴეცნიცა ველისანი საქმედ,
მიმიცემიან მას დამონებად მისა ყოველნი ნათესავნი, და ძესა მისსა და ძესა ძისა მისისასა, ვიდრე მოსლვადმდე ჟამისა რისხვისა მისისაჲსა, და ჰმონოს მას ნათესავმან მრავალმან და მეფეთა დიდთა.
და იყოს ნათესავი და მეუფებაჲ, რომელთა არა ჰმონონ ნაბუქოდონოსორ, მეფესა ბაბილოვნისასა, რომელთა არა შეყონ ქედი მათი Page of ms. J: A127v უღელსა ქუეშჱ მეფისა ბაბილოვნისასა, მახჳლითა და სიყმილითა და/ სიკუდილითა მე მოვიძინე იგინი, თქუა უფალმან, ვიდრემდე მოაკლდეს მათ ჴელსა შინა მისსა.
და თქუენ ნუ ისმენთ ცრუ-წინაწარმეტყუელთა თქუენთასა, და მისანთა თქუენთასა, და ჩუენებათა თქუენთა, და მლაღობელთა თქუენთასა, და მზმნელთა თქუენთასა, და მეწამლეთა თქუენთასა, რომელნი გეტყჳან; ნუ იქმთ საქმესა მეფისა ბაბილოვნისასა.
რამეთუ ცილსა გიწინაწარმეტყუელებენ თქუენ, რაჲთამცა განგაშორნა თქუენ ქუეყანისაგან თქუენისა, და განგაბნინე თქუენ, და წარსწყმდეთ.
და ნათესავმან, რომელმან შეყოს ქედი თჳსი უღელსა ქუეშჱ მეფისა ბაბილოვნისასა, და უქმნეს მას, დაუტევო იგი ქუეყანასა ზედა, თქუა უფალმან, იქმოდის მუნ და დაეშენოს მუნ.
და სედეკიაჲს მიმართ, მეფისა იუდაჲსა, ვიტყოდე მსგავსად ყოველთა ამათ სიტყუათა, და ვთქუ; მიუპყართ ქედი თქუენი უღელსა ქუეშჱ მეფისა ბაბილოვნისასა, და ჰმონეთ მას და ერსა მისსა, და სცხომდეთ.
და რაჲსათჳს მოჰკუდები შენ და ერი შენი მახჳლითა და სიყმილითა და სიკუდილითა, ვითარცა თქუა უფალმან ნათესავისა მიმართ, რომელმან არა ჰმონოს მეფესა ბაბილოვნისასა.
და ნუ ისმენთ სიტყუასა ცრუ-წინაწარმეტყუელთასა, რომელნი გეტყჳან თქუენ, არა უქმოდით მეფესა ბაბილოვნისასა, რამეთუ იგინი ცრუსა წინაწარმეტყუელებენ თქუენდა მომართ.
რამეთუ არა მივავლინენ იგინი, იტყჳს უფალი, და იგინი გიწინაწარმეტყუელებენ თქუენ სახელითა ჩემითა სიცრუვით, რაჲთა წარგწყმიდნენ თქუენ, და წარწყმდენ თქუენ თანა წინაწარმეტყუელნიცა იგი.
და მღდელთა და ყოველსა ერსა ვეტყოდე და ვარქუ; ესრე თქუა უფალმან, ნუ ისმენთ სიტყუათა წინაწარმეტყუელთასა, რომელნი გიწინაწარმეტყუელებენ თქუენ, და იტყჳან, აჰა ესერა ჭურჭერი სახლისა უფლისაჲ მოიქცევის ბაბილონით აწ ადრე, რამეთუ ცრუსა გიწინაწარმეტყუელებენ თქუენ. არა მივავლინენ იგინი და არა არს სიტყუაჲ უფლისაჲ მათ შორის.
ნუ ისმენთ მათსა, ჰმონებდით მეფესა ბაბილოვნისასა, და სცხომდეთ; და რაჲსათჳს იქმნების ქალაქი ესე ოჴერ.
წინაწარმეტყუელნი თუ არიან, და არს სიტყუაჲ უფლისაჲ მათ შორის, სიტყუას უგებედ უფალსა ძალთასა, რაჲთა არა წარიღოს ნეშტი იგი Page of ms. J: A128r ჭურ/ჭერა სახლისა უფალისაჲ და სახლისა მეფისა იუდაჲსისაჲ და იჱრუსალემისაჲ ბაბილონდ.
რამეთუ ესრე იტყჳს უფალი ძალთაჲ სუეტთათჳს, და ზღჳსათჳს და მექონოთთათჳს, და ნეშტთა ზედა ჭურჭერთა, რომელ დაშთომილ არიან ქალაქსა ამას შინა.
რომელ არა წარიღო ნაბუქოდონოსორ, მეფემან ბაბილოვნისამან, რაჟამს წარტ<ყ>უენა იექონია და იოაკიმ მეფენი იუდაჲსნი იჱრუსალემით ბაბილონდ, და ყოველნი აზნაურნი იუდაჲსნი და იჱრუსალემი.
რამეთუ ესრე იტყჳს უფალი ძალთაჲ, ღმერთი ისრაჱლისაჲ, ჭურჭელსა ზედა, რომელ დაშთომილ არს სახლსა შინა უფლისასა, და სახლსა შინა მეფისა იუდაჲსსა, და იჱრუსალემს შინა.
ბაბილონდ წარიღონ, და მუნ იყოს ვიდრე დღედმდე მოძიებისა მათისა, ესრე იტყჳს უფალი, და აღმოვიღო იგი და მო<ვ>აქციო იგი ამასვე ადგილსა.;
