რბიოდეთ გზათა იჱრუსალემისათა, და იხილეთ და გულის-ჴმა-ყავთ, და ეძიებდით უბნებსა მისსა, ჰპოოთ თუ კაცი მუნ, უკუეთუ იპოვოს ხოლო ვინ მე მყოფელ სამართალისა და მეძიებელ სარწმუნოებისა, და ულხინო მას, იტყჳს უფალი.
ცხოველ არს უფალი თქჳან, ამისთჳს, არა ნუ ცილი ფუციან.
უფალო, თუალნი შენნი სარწმუნოება; ჰგუემენ იგინი, და არა ელმოდა მათ; აღასრულენ იგი<ნი>, და არა ინებეს თავს-დებად სწავლისა; განიმტკიცნეს პირნი მათნი უფროჲს ლოდისა, და არა ინებეს მოქცევად.
და მე ვთქუ ვითარმედ გლახაკ არიან და ვერ შეუძლეს, და რამეთუ ვერ გულის-ჴმა-ყვეს გზაჲ უფლისაჲ, და სამართალი ღმრთისა მათისაჲ.
მივიდე მდიდართა, და ვეტყოდი მათ რამეთუ მათ გულის-ჴმა-ყვეს გზაჲ უფლისაჲ და სამართალი ღმრთისაჲ, და ესერა ერთბამად შემუსრეს უღელი, და განხეთქნეს საკრველნი.
ამისთჳს ეწია მათ ლომი მაღნარით, და მგელი ვიდრე სახლებად მათდამდე მოჰსრვიდა მათ, და ვეფხმან განიღჳძა ქალაქთა მათთა ზედა; ყოველნი რომელ გამოვიდენ მათგან მოინადირნენ, რამეთუ განამრავლეს უღმრთოებაჲ მათი; იძლინეს გარდაქცევითა მათითა.
რომლითა ამათ ზედა მლხინებელ Page of ms. J: A104r გეყო შენ; შვილთა შენთა დამიტევეს/ მე, და ფუცვიდეს არა არსთა მათ ღმერთთა, და აფუცებდეს მათა. განვაძღენ იგინი, და იმრუშებდეს, და სახლსა შინა როსკიპთასა დაადგრებოდეს.
ცხენ ჴდალთ-მდრანჯობელ იქმნნეს, კაცად-კაცადი ცოლისა მიმართ მოყუსისა თჳსისა იქჳრნობდა.
ანუ არა ამას ზედაა ძიება ვყო, იტყჳს უფალი, ანუ ნათესავსა შორის ესე-მლევანსა არა ნუ იძიოს შური სულმან ჩემმან.
აღჴედით ზედა არდაბაგებსა მისსა, და გარდაარღჳეთ, და აღ-ხოლო-ნუ-ასრულებთ, დაუტევენით საფუძველნი მისნი, რამეთუ უფლისაჲ არს.
რამეთუ შეურაცხებით შეურაცხ-მყო მე სახლმან ისრაჱლისამან და სახლმან იუდაჲსმან.
ჰტყუვეს უფალსა მათსა, თქუა უფალმან, და თქუეს; არა არს ესე, არა მოვიდეს ჩუენ ზედა ძჳრი, და მახჳლი და სიყმილი ჩუენ არა ვიხილოთ.
წინაწარმეტყუელნი თქუენნი ქარ იყვნეს, და სიტყუაჲ უფლისაჲ არა იყო მათ თანა; ესრე ეყოს მათ.
ამისთჳს ესრე იტყჳს უფალი ყოვლისა-მპყრობელი, რამეთუ თქუეს სიტყუაჲ ესე; აჰა ესერა მიგცემ შენ სიტყუათა ჩემთა პირსა შინა შენსა ცეცხლად, და ერსა ამას შეშად, და შეჭამნეს იგინი.
აჰა ესერა მე მოვავლინებ თქუენ ზედა ნათესავსა შორით, სახლო ისრაჱლისაო, იტყჳს უფალი; ნათესავი წინანდელი არს, ნათესავი საუკუნითგანი არს, ნათესავი რომლისაჲ არა გესმის ენისა მისისაჲ, არცაღათუ გესმეს რასა იტყოდის.
კაპარჭნი მათნი ვითარცა სამარჱ აღებული. ყოველნი ძლიერ არიან, და მოჭამონ სამკალი თქუენი,
და პური თქუენი, შეჭამნენ ძენი თქუენნი და ასულნი თქუენნი, შეჭამონ ცხოვარი თქუენი და ზროხაჲ თქუენი; მოჭამნენ ვენაჴნი თქუენნი და ლეღოვანი თქუენი და ზეთის-ხილოვანი თქუენი, და დალეწნენ ქალაქნი თქუენნი მტკიცენი, რომელთა თქუენ ესავთ მახჳლითა.
და იყოს მათ დღეთა შინა, იტყჳს უფალი ღმერთი შენი, არა ვყო თქუენთჳს აღცდა./ Page of ms. J: A104v
და იყოს რაჟამს სთქუათ, რაჲსათჳს გჳყო ჩუენ უფალმან ღმერთმან ჩუენმან ესე ყოველი; და ჰრქუა მათ; მის წილ რამეთუ დამიტევეთ მე, და ჰმონეთ ღმერთთა უცხოთა ქუეყანასა თქუენსა, ეგრე ჰმონებდეთ უცხოთა ქუეყანასა მას არა თქუენსა.
მიუთხართ ესე სახლსა იაკობისსა, და <ესმოდენ სახლსა იუდაჲსსა> .
ესმოდენ ესე ერსა ცოფსა და უგულოსა. თუალ არიან მათა და არა ხედვენ, ყურ არიან მათა და არა ესმის.
<ანუ> ჩემდა არა გეშინოდის იტყჳს უფალი, ანუ პირისაგან ჩემისა არა შეიკდიმოთ, რომელმან დავდევ მქჳშაჲ საზღვრად ზღუასა საუკუნედ, და არა გარდაჴდეს იგი, და აღიძრას და ვერ შეუძლოს, და ოხრიდენ ღელვანი მისნი და ვერ გარდაჴდენ მას.
ხოლო ერსა მას ექმნა გული უსმ და ურჩ, განდრკეს და წარვიდეს.
და არა თქუეს გულსა შინა მათსა, შევიშინოთ უფლისა მიმართ ღმრთისა ჩუენისა, რომელმან მოგუცა ჩუენ წჳმაჲ მსთუაჲ და მცხუედი ჟამსა თჳსსა, ჟამად ჟამად ბრძანებანი არეთანი დაგჳმარხნა ჩუენ.
უშჯულოებათა თქუენთა გარდააქციეს ესე, და ცოდვათა თქუენთათჳს განგეყენა კეთილი თქუენგან.
რამეთუ იჴოვნეს შორის ერსა ჩემსა უღმრთონი, და მახჱ დაარწყუეს განსაპრწნელად კაცთა და შეიპყრობდეს.
ვითარცა მახჱ დადგომილი სავსჱ მფრინველითა, ეგრეცა სახლები მათი სავსე არს ზაკუვითა; ამისთჳს რამეთუ განდიდნეს და განმდიდრდეს და განსუქნეს და განჴოხნეს, და გარდაჴდეს სიტყუათა ჩემთა უკეთურებად.
და სამართალსა არა შჯიდეს, და საშჯელსა ობლისა და ქურივისასა არა განიკითხვიდეს.
ანუ მას ზედა არა მე ძიება ვყო, იტყჳს უფალი, ანუ შორის ნათესავსა ესე-მლევანსა არა მე იძიოს შური სულმან ჩემმან.
საკჳრველი და საზარელი იქმნა ქუეყანასა ზედა.
წინაწარმეტყუელნი წინაწარმეტყუელებდეს ცრუსა და მღდელნი უქებდეს ჴელითა მათითა, და ერმან ჩემმან შეიყუარა ესრე, და რაჲ უყოთ შემდგომთა ამისთა./ Page of ms. J: A105r
