Page of ms. J: A98r სიტყუაჲ უფლისაჲ, რომელი იყო იერემიაჲსა მიმართ ქელკიანისა მღდელთაგანისა, რომელი დამკჳდრებულ იყო ანათოთს ქუეყანასა ბენიამენისსა.
რომელ იყო სიტყუაჲ ღმრთისაჲ მისა მიმართ დღეთა მათ იოსიაჲსთა ძისა Page of ms. J: A98v ამონისთა მეფისა იუდაჲსთა, წელსა მეათცა/მეტესა მეფობასა მისსა.
და იყო დღეთა მათ იოაკიმისთა ძისა იოსიაჲსთა მეფისა იუდაჲსთა, ვიდრე მეათერთმეტედ წლადმდე სედეკიაჲსა მეფისა იუდაჲსა, ვიდრე წარტყუენვად იჱრუსალემისა თთუესა მეხუთესა.
და იყო სიტყუაჲ უფლისაჲ მისა მიმართ,
ვიდრე შთავრდომადმდე მუცელსა დედისასა გიცან შენ, და ვიდრე გამოსლვადმდე შენდა საშოჲთ წმიდა გყავ შენ, წინაწარმეტყუელად წარმართთა და ნათესავთა ზედა დაგადგინე შენ.
და ვთქუ: რომელი ეგე ხარ უფალო, აჰა ესერა არა ვიცი სიტყუაჲ, რამეთუ ყრმა ვარი მე.
და მრქუა მე უფალმან, ნუ იტყჳ ვითარმედ ყრმა ვარი მე, რამეთუ ყოველთა მიმართ რომელთა მიგავლინო შენ მიხჳდე, და ყოველი რაოდენი გამცნო შენ იტყოდი.
ნუ გეშინინ პირისაგან მათისა, და ნუცა ზარ გაც<ნ> შენ წინაშე მათსა, რამეთუ მე შენ თანა ვარ განრინებად შენდა, იტყჳს უფალი.
და მოყო უფალმან ჴელი მისი ჩემდა, და შემახო პირსა ჩემსა, და მრქუა მე უფალმან, აჰა ესერა მიგცენ სიტყუანი ჩემნი პირსა შინა შენსა.
აჰა ესერა დაგადგინე შენ დღეს ნათესავთა ზედა და მეუფებათა აღფხურად და დათხრად, წარწყმედად და დარღუევად; აღშჱნებად და დანერგვად.
და იყო სიტყუაჲ <უფლისაჲ> ჩემდა მომართ, და მრქუა მე; რასა ხედავ შენ, იერემია. და ვთქუ; არგანსა ნიგოზისასა ვხედავ მე.
და მრქუა მე უფალმან, კეთილად იხილე, რამეთუ განმიღჳძებიეს მე სიტყუათა ჩემთა ზედა ყოფად მათა.
და იყო სიტყუაჲ უფლისაჲ ჩემდამო მეორედ, და მრქუა; რასა ჰხედავ შენ. და ვთქუ, სიავსა ერთსა ქუეშჱ მგზებარესა ვხედავ მე, და პირი მისი პირით ჩრდილოჲთ.
და მრქუა მე უფალმან; პირისაგან ჩრდილოჲსა აღატყდეს Page of ms. J: A99r ძჳრი ყოველთა ზედა მკჳდრთა ქუეყანისათა./
რამეთუ აჰა ესერა მე მოუწოდო ყოველთა მეფეთა მეფ<ობა>თასა ჩრდილოჲთ ქუეყანით, იტყჳს უფალი, და მოვიდენ და დაიდგნენ თითოეულად საყდარნი მათნი ზღურბლთა ზედა ბჭეთა იჱრუსალემისათა, და ყოველთა ზედა ზღუდეთა გარემო მისა, და ყოველთა ზედა ქალაქთა იუდაჲსთა.
და ვიტყოდი მე საშჯელით მათა მიმართ ყოვლისა უკეთურებისა მათისა თჳს, რამეთუ დამიტევეს მე, და უზორვიდეს ღმერთთა უცხოოა, და თაყუანის-სცემდეს ქმნულსა ჴელთა მათთასა.
და შენ შეიმტკიცენ წელნი შენნი, და აღდეგ და არქუ მათ ყოველი რაჲცა გამცნო შენ, ნუ გეშინინ შენ პირისაგან მათისა, ნუცა შესძრწუნდები წინაშე მათსა, რამეთუ მე შენ თანა ვარ განძლიერებად შენდა, იტყჳს უფალი.
და მე ესერა დაგდევ შენ დღეს დღჱ ვითარცა ქალაქი ძლიერი, და ვითარცა სუეტი რკინისაჲ, და ვითარცა ზღუდჱ რვალისაჲ ყოველთა მიმართ მეფეთა იუდაჲსთა, და მთავართა მისთა, და მღდელთა მათთა, და ერსა ქუეყანისასა,
გბრძოდიან და შენ ვერ გძლონ, რამეთუ მე შენ თანა ვარ განრინებად შენდა, იტყჳს უფალი.
