ამას იტყჳს უფალი, სამთა მათ ზედა და ოთხთა უღმრთოებათა მოაბისათა, არა გარე-მოვექცე მას, ამისთჳს რამეთუ დაწუნეს ძუალნი მეფისა იდუმიაჲსანი მტუერად.
და გამოვავლინო ცეცხლი მოაბსა ზედა, და შეჭამნეს საფუძველნი ქალაქებისა მისისანი, და მოკუდეს უძლურებათა შინა მოაბი ღაღადებითა და ჴმითა ნესტჳსაჲთა.
და მოვსრა მსაჯული მისგან, და ყოველნი მთავარნი მისნი მოვსწყჳდნე მათ თანა, იტყჳს უფალი.
ამას იტყჳს უფალი, სამთა <მათ> ზედა უღმრთოებათა ძეთა იუდაჲსთა და ოთხთა, არა გარე-მოვექცე მათ, განშორებისა მისთჳს შჯულისა უფლისაჲსა, და რამეთუ ბრძანებანი მისნი არა დაიმარხნეს, და შეაცთუნნა იგინი ამაოთა მათთა, რომელნი ქმნნეს, რომელთაცა შეუდგეს მამანი მათნი შემდგომად მათა.
და გამოვავლინო ცეცხლი იუდასა ზედა, და შეჭამნას საფუძველნი იჱრუსალემისანი.
ამას იტყჳს უფალი, სამთა მათ ზედა უღმრთოებათა ისრაჱლისათა და ოთხთა, არა გარე-მოვექცე მას, ამისთჳს რამეთუ განყიდეს მართალი ვეცხლად, და გლახაკი ფერჴთ-შესასხმელად.
რომელი დასთრგუნავნ მიწასა ქუეყანისასა, Page of ms. J: B6v და დაჰპუერთნიდეს თავსა დავ/რდომილთასა, და გზაჲ მდაბალთაჲ გარდადრიკეს, და ძჱ და მამაჲ შევიდოდეს მისვე მჴევლისა თჳსისა, რაჲთა შეაგინონ სახელი ღმრთისა მათისაჲ.
და სამოსელსა მათსა გა<ნ>აბმიდეს საბლებითა დასაფარველად საკურთხევლისა თანა, და ღჳნოსა ცილის-შეწამებით სუმიდეს სახლსა შინა ღმრთისა მათისასა.
ხოლო მე აღვიღე ამორეველი იგი პირისაგან მათისა, რომლისაჲ იყო ვითარცა სიმაღლჱ ნაძჳსაჲ სიმაღლჱ მისი, და იყო იგი მტკიცჱ ვითარცა მუხაჲ, და აღვიღე ნაყოფი მისი ზედა კერძო, და ძირი მისი ქუეშჱ კერძო.
და მე აღმოგიყვანა შენ ქუეყანით ეგჳპტით, და გარე-მოგიყვანენ თქუენ უდაბნოსა ორმეოც წელ, რაჲთა დაიმკჳდროთ თქუენ ქუეყანაჲ ამორეველთაჲ.
და მოვიყვანენ ძეთაგან თქუენთა წინაწარმეტყუელად, და ჭაბუკთა თქუენთაგანნი სიწმიდედ, ნუ არა ესრე არს ესე, ძენო ისრაჱლისანო, იტყჳს უფალი.
და ასუემდით განწმედილთა მათ ღჳნოსა, და წინაწარმეტყუელთა მათ ამცნებდით, და ეტყოდეთ. ნუ წინაწარმეტყუელებთ.
ამისთჳს აჰა ესერა მე ვაგორვო ქუეშჱ თქუენსა, ვითარცა გორავნ ურემი სავსე ლერწმითა.
და წარწყმდეს სივლტოლაჲ მსრბოლისაგან, და ძლიერმან ვერ დაიპყრას ძალი თჳსი, და მბრძოლთა მათ ვერ განირინონ თავი თჳსი.
და მეისარი ვერ დაუდგეს, და მალჱ ფერჴითა ვერ განერეს, და მჴედარმან ვერ განირინოს თავი თჳსი.
და იპოა გული მისი ძლიერებასა; შიშუელი სდევნიდეს მას დღესა შინა, იტყჳს უფალი.:
