Page of ms. J: B5v სიტყუანი ამოსისნი, რომელ იყვნეს აკარიმს თეკუაჲსით, რომელ<ნი> იხილ<ნ>ა იჱრუსალემისათჳს დღეთა ოზიაჲსთა მეფისა ჰურიასტანისათა, და დღეთა იერობოამისთა ძისა იოასისთა მეფისა ისრაჱლისა, უწინარჱს ორისა წლისა ძრვისა მის დიდისა.
და თქუა; უფალი სიონით იტყოდა, და იჱრუსალემით მოსცა ჴმაჲ თჳსი, და იგლოვდეს საძოვარნი სამწყსოთანი, და განჴმა თხემი კარმელისაჲ.
და თქუა უფალმან; სამთა მათ ზედა უღმრთოებათა დამასკჱსათა/ Page of ms. J: B5v და ოთხთა არა გარე-მოვექცე მას, ამისთჳს რამეთუ განხერხვიდეს ხერხითა რკინისაჲთა მუცელ-ქმნულთა მათ გალაადს შინა.
და გამოვავლინო ცეცხლი სახლსა ზედა აზაელისსა, და შეჭამნეს საფუძველნი ძისა ადერისნი.
და შევმუსრნე მოქლონნი დამასკისანი, და მოვსრნე მკჳდრნი იგი ველისა მისგან ჵნისისანი, და მოვსწყჳდნე ტომნი კაცთაგან ქანაანისათანი, და წარმოიტყუენოს ერი მსურეთისაჲ რჩეული, იტყჳს უფალი.
ამას იტყჳს უფალი, სამთა <მათ> ზედა უღმრთოებათა გაზაჲსათა და ოთხთა, არა გარე-მოვექცე მათ, წარტყუენვისა მისთჳს ტყჳსა სალომონისა, და შეყვანებისა მისთჳს იდუმიას.
და გამოვავლინო ცეცხლი ზღუდეთა ზედა გაზაჲსათა, და შეჭამნეს საფუძველნი მისნი.
და მოვსრნე დამკჳდრებულნი აზოტისანი, და აღვიღო ტომი ასკალონით, და მივაწიო ჴელი ჩემი აკარონსა ზედა, და წარწყმდენ ნეშტნი იგი უცხოთესლთანი, იტყჳს უფალი.
ამას იტყჳს უფალი, სამთა მათ ზედა უღმრთოებათა ტჳროსისათა და ოთხთა, არა გარე-მოვექცე მას, ამისთჳს რამეთუ შეიყენეს ტყუჱ სალომონისი იდომეას, და არა მოიჴსენეს აღთქუმაჲ ძმათაჲ.
და გამოვავლინო ცეცხლი ზღუდეთა ტჳროსისთა და შეჭამნეს საფუძველნი მისნი.
ამას იტყჳს უფალი, სამთა მათ ზედა უღმრთოებათა იდუმიაჲსათა და ოთხთა, არა გარე-მოვექცე მათ დევნისა მისთჳს მახჳლითა ძმათა მათთაჲსა, და განრყუნა დედაჲ ქუეყანასა ზედა, და მოიტაცა საწამებელად <და> შესაძრწუნებელად მისა, და ზედა-მისლვაჲ დაიმარხა ძლევად;
და გამოვავლინო ცეცხლი თემანსა ზედა; და შეჭამნეს საფუძველნი ზღუდეთა მისთანი.
ამას იტყჳს უფალი; სამთა მათ ზედა უღმრთოებათა ძეთა ამონისთა და ოთხთა, არა გარე-მოვექცე Page of ms. J: B6r მათ, ამისთჳს რამეთუ განაჴებდეს მუცელ-ქუმულთა მათ/ გალადელთასა, რაჲთა განავრცნენ საზღვარნი მათნი.
და აღვაგზნე ცეცხლი ზღუდეთა ზედა რაბათისათა, და შეჭამნეს საფუძველნი მისნი ღაღადებით დღესა ბრძოლისასა, და შეიძრას დღესა აღსასრულისა მისისასა.
და განვიდენ მეფენი მისნი ტყუედ, და მღდელნი მათნი და მთავარნი მათნი ერთბამად, იტყჳს უფალი.:
