აჰა ესერა მე მათ დღეთა შინა და მათ ჟამთა შინა, რაჟამს მოვაქციო ტყუჱ იუდაჲსი და იჱრუსალემისაჲ,
და შევკრიბნე ყოველნი ნათესავნი, და შთავიყვანნე ღელესა მას იოსაფატისასა, და ვეშჯოდი მათ მუნ ერისა ჩემისათჳს და სამკჳდრებელისა ისრაჱლისა, რომელნი განბნეულ არიან წარმართთა შორის, რამეთუ ქუეყანაჲ ჩემი განიყვეს.
და ერსა ჩემსა ზედა განიგდეს წილი, და მისცნეს ყრმანი მეძავთა, და ქალებსა განჰყიდდეს ღჳნოდ, და სუმიდეს.
და რაჲ მე თქუენცა ჩემდა ვე, ტჳროს და სიდონ, ნუ მოსაგებელსა რას მომაგებთ მე, ანუ ძჳრსა იჴსენებთ თქუენ ჩემ ზედა. მწრაფლ და ადრე მიგაგო მისაგებელი თქუენი თავთა თქუენთა.
ამისთჳს რამეთუ ვეცხლი ჩემი და ოქროჲ ჩემი წარიღეთ, და რჩეული ჩემი და უკეთესი ჩემი მიიღეთ ტაძართა თქუენათ. Page of ms. O: 381ვ
და ძენი/ იუდაჲსნი და ძენი ისრაჱლისანი მიჰყიდენით ძეთა იონთასა, რაჲთა განაშორნენ იგინი საზღვართაგან მათთა.
აჰა ესერა მე აღვადგინნე იგინი მიერ ადგილით, ვიდრე იგინი მიჰყიდენით მუნ, და მიგაგო თქუენ მისაგებელი თქუენი თავთა თქუენთა.
და მივსცნე ძენი თქუენნი და ასულნი თქუენნი ჴელთა ძეთა იუდაჲსთა, და განყიდნენ იგინი ნათესავთა შორიელთა, რამეთუ უფალი იტყოდა.
ქადაგებდით ამას წარმართთა შორის, წმიდა ყავთ ბრძოლაჲ; აღადგინენით მბრძოლნი, მოვედით და აღვედით ყოველნი კაცნი მბრძოლნი,
და დაჭრენით საჴნისნი თქუენნი ჴრმლად, და მანგლები თქუენი ლახურებად; უძლური იგი იქადოდენ; ვითარმედ ძალ-მიც.
შეკერბით და შევედით ყოველი თესლები გარემო, და შემკერბით მუნ. მშჳდი იგი იყავნ მოლალე.
აღდგედ და აღვიდედ ყოველი თესლები ჴევსა მას იოსაფატისასა, რამეთუ მუნ დავჯდე საშჯელად ყოველთა ნათესავთა გარემოჲს. Page of ms. J: B5r
განავლინანით მანგა]/ლნი, რამეთუ მოწევნულ არს სასთულებელი; შევედით, წნეხდით, რამეთუ სავსჱ არს საწნეხელი, და გარდაეცემიან ტაგარნი, რამეთუ განმრავლდა ბოროტი მათი.
ოხრით ოხრიდეს ღელესა მას საშჯელისასა, რამეთუ ახლოს არს დღჱ იგი უფლისაჲ ღელესა მას საშჯელისასა.
მზჱ და მთოვარჱ დაბნალდენ, და ვარსკულავთა დაიფარონ ნათელი მათი;
ხოლო უფალმან სიონით ღაღად-ყოს, და იჱრუსალემით მოსცეს ჴმაჲ თჳსი. და შეიძრას ცაჲ და ქუეყანაჲ; ხოლო უფალო ერიდოს ერსა თჳსსა, და განაძლიერნეს უფალმან ძენი ისრაჱლისანი.
და სცნათ, რამეთუ მე ვარ უფალი ღმერთი თქუენი, რომელი დამკჳდრებულ ვარ სიონს მთასა წმიდასა ჩემსა, და იყოს იჱრუსალემი წმიდა, და უცხოთესლი არღარა განვიდეს მიერ.
და იყოს მას დღესა შინა, გამოადინებდენ მთანი სიტკბოებასა, და ბორცუნი ადინებდენ სძესა, და ყოველთა ნაკადულთა იუდაჲსთა დიოდიან წყალნი, და წყაროჲ სახლისაგან უფლისა გამოვიდეს, და მოჰრწყვიდეს ჴევსა მას საბელთასა.
ეგჳპტჱ განსარყუნელად იყოს, და იდუმიაჲ ველად განრყუნის სიცრუვეთათჳს ძეთა იუდაჲსთა. ამისთჳს რამეთუ დასთხიეს სისხლი უბრალოჲ ქუეყანასა მათსა.
ხოლო ჰურიასტანი უკუნისამდე დაემკჳდროს, და იჱრუსალემი თესლითი თესლადმდე.
და გამოვიძიო სასხლი მათი, და არა უბრალო ვყვნე იგინი, და უფალმან დაიმკჳდროს სიონს შინა.:
