უჩინო იქმნეს სამარიაჲ, რამეთუ წინა}-აღუდგა ღმერთსა თჳსსა, მახჳლითა დაეცნენ მრუშებანი მათნი, ქუე დაეხეთქნენ, მუცელ-ქუმულნი მათნი წარაპნენ.
მოიქეც ისრაჱლ უფლისა ღმრთისა შენისა, რამეთუ მოუძლურდი სიცრუვეთა შინა შენთა.
მოიხუნეთ თქუენ თანა სიტყუანი, და მოიქეცით უფლისა ღმრთისა თქუენისა. არქუთ მას, ძალ-გიც მიტევებად ცოდვათა, რაჲთა არა მიიღოთ სიცრუვჱ; და მიიღოთ კეთილი და მივაგოთ ნაყოფი ბაგეთა ჩუენთაჲ.
ასურ ვერ მიჴსნნეს ჩუენ, ცხენთა არღარა აღვსხდეთ, არცა ვჰრქუათ; ღმერთნი ჩუენნი ქმნულნი ჴელთა კაცთანი, რომელი არს შენ შორის ობოლი შეიწყალოს.
განვკურნა საყოფელი მათი; შევიყუარნე იგინი.
და ვეყო მე ვითარცა ცუარი ისრაჱლსა, ყუაოდის ვითარცა შროშანი, და დაიბნეს ძირნი მისნი ვითარცა ლიბანემან.
განვიდენ რტონი მისნი, და იყოს ვითარცა ზეთის-ხილი ნაყოფიერი; და საყნოსელი მისი ვითარცა გუნდრუკისაჲ.
მოიქცენ და დასხდენ ქუეშჱ საფარველსა მისსა, ცხონდენ იფქლითა, განმტკიცნენ და ყუაოდიან. ვითარცა ვენაჴი საჴსენებელი მისი, და ვითარცა ღჳნოჲ ლიბანისაჲ
ეფრემისი. რაჲ არს მისი მერმე, და კერპთაჲ; მე დავამდაბლო Page of ms. O: 378r იგი; და მე განვაძლიერო იგი. მე ვითარცა ნაძჳ ბორობანი, ჩემ გან/ ნაყოფი შენი პოვნებულ არს.
ვინ არს ბრძენ და გულის-ხმა-ყოს ესე, და გონიერ და ცნას იგი, რამეთუ წრფელ არიან გზანი უფლისანი, და მართალნი ვიდოდიან მათ ზედა, ხოლო უღმრთონი მოუძლურდენ მათ ზედა.:
