და [ესმა] დედუფალსა მას საბაჲსასა სახელი სოლომონისი და სახელი უფლისაჲ და [წარმოვიდა] გამოცდად მისა იგავით.
და მოვიდა იერუსალჱმს ძალითა დიდითა და აქლემებითა, რომელთა ეკიდა აქლემებთა მათ საკუმეველი და ოქროჲ დიდად ფრიად და თუალები პატიოსანი. და შევიდა სოლომონისა და ეტყოდა მას ყოველსა მას, რაჲცა იყო გულსა მისსა.
და განუმარტნა მას Page of ms. O: 133v [სოლომონ] ყოველნი სიტყუ[ანი მისნი] და არა იყო [სიტყუ]აჲ დამალული მეფისაგან, რომელი არა განუმარტა მას.
და იხილა დედუფალმან მან საბაჲსამან ყოველი იგი სიბრძნჱ სოლომონისი და ტაძარი იგი, რომელ აღაშჱნა,
და სანოვაგჱ იგი სოლომონისი, და სასხდომელები იგი მონათა მისთაჲ, და წესი მსახურთა მისთაჲ, და სამკაული მისი, და მწდენი მისნი, და საჭურისნი მისნი, და შესაწირავნი მისნი, რომელსა შესწირავნ მეფჱ სახლსა მას უფლისასა, - და დაუკჳრდა.
და ჰრქუა მეფესა სოლომონს: ჭეშმარიტ იყო სიტყუაჲ იგი, რომელი მესმა მე ქუეყანასა მას ჩემსა
სიტყუათა მათ შენთათჳს და სიბრძნისა შენისათჳს და არა მრწმენა მთხრობელთაჲ მათ, ვიდრემდე თჳთ მოვედ და ვიხილე თუალითა ჩემითა. და აჰა, ზოგსცა არა იყო, რომელ მითხრობდეს მე სიბრძნისა მაგის შენისათჳს, შევსძინე კეთილი ყოველსა მას სმენილსა, რომელ მესმა ქუეყანასა მას ჩემსა.
სანატრელ არიან ცოლნი შენნი, სანატრელ არიან მონანი შენნი, რომელნი დგანან შენ წინაშე, და მარადის ესმის სიბრძნჱ შენი.
და იყავნ უფალი ღმერთი შენი კურთხეულ, რომელსა სათნო უჩნდი შენ მიცემად საყდარსა ისრაჱლისა, რამეთუ შეიყუარა უფალმან სამკჳდრებელი ისრაჱლი უკუნისამდე და დაგადგინა შენ მეფ\ედ Page of ms. O: 134r მათ ზედა ყოფად საშჯელისა და სამართალისა მათ ზედა.
და მიუპყრა სოლომონს ას და ოცი ტალანტი ოქროჲსაჲ და საკუმეველი დიდად ფრიად და თუალები პატიოსანი, რამეთუ არავინაჲ მოღებულ იყო მუნ საკუმეველი სულნელი უფროჲს მისა, რომელი მოართუა დედუფალმან მან საბაჲსამან მეფესა სოლომონს.
და ნავი იგი ქირამისი, რომელსა მოაქუნდა ოქროჲ სოფირით, მოიღო ძელიცა უთლელი და თუალიცა პატიოსანი ფრიად.
და შექმნა მეფემან სოლომონ ძელი იგი უთლელი სამყაროდ ტაძრისა მისთჳს უფლისაჲსა და ტაძრისა მისთჳს მეფისაჲსა და ნესტუად და ქნარად შემასხმელთათჳს. და არავინაჲ მოღებულ იყო ეგევითარი ძელი უთლელი ქუეყანასა მას მუნდღენდელად დღედმდე.
და მეფემან სოლომონ სცა დედუფალსა მას საბაჲსასა ყოვლისაგან, რაჲცა უნდა და სთხოვა, გარნა მისგანი, რომელ მოართუა მან მეფესა სოლომონს.
და იყო სასწორი ოქროჲსაჲ მის ძღუენთაჲ, რომელ მოართუეს სოლომონს წელიწადსა მას ერთსა შინა, ექუსას სამეოცდაექუსი სასწორი ოქროჲსაჲ
გარნა ხარკთაჲ მათ, რომელნი განეწესნეს, და ვაჭართაჲ მათ, რომელსა აქცევდეს, და მეფეთაჲ მათ წიაღ მდინარეთაჲ და მთავართაჲ მათ მის ქუეყანისათაჲ. Page of ms. O: 134v
და ქმნა მეფემან სოლომონ სამასი ჰოროლი ოქროჲსაჲ ჭედილი და სამას-სამასი დრაჰკანი ზედა თითოეულად ჰორლებსა მას.
და სამასი ფარი ქმნა ჭედით და სამნაკეცად გარე-მოწმასნვითი ოქროჲ თითოვეულად ფარებსა მას, და მისცა იგი მეფემან სახლსა მას მაღნარისასა ლიბანედ.
და ქმნა მეფემან სოლომონ საყდარი პილოჲს ძუალისაჲ დიდი და შემოსა იგი ოქროჲთა რჩეულითა.
და ექუს მენაკ აღსავალი მისი და თავნი კუროთანი ზედა საყდარსა მას ზურგით კერძო მისა და ჴელნი იმიერ და ამიერ ზედა საყდარსა მას და ორნი ლომნი იმიერ და ამიერ ჴელთა მათ თანა.
და ათორმეტი ლომი დგა ზედა აღსავალთა მათ მენაკთა იმიერ და ამიერ და არა იპოვა ესევითარი სახჱ ყოველთა მეფეთა თანა.
და ყოველი კალი და სამსახურებელი იყო ოქროჲსაგანი ქმნული და ავაზანნი იგი ოქროჲსანი და ყოველი იგი ჭურჭელი სახლისაჲ მის ლიბანისაჲ ოქროჲთა შემოსილ, და არა იყო ვეცხლი, რამეთუ არად შერაცხილ იყო დღეთა სოლომონისთა ვეცხლი, ვითარმედ არს რაჲმე.
რამეთუ ნავი მეფისაჲ თარშისაჲ იყო ზღუასა შინა ნავთა თანა ქირამისთა, და მესამესა წელსა მოიწიის მეფისა ნავი თარშით და მოართჳს ოქროჲ და ვეცხლი და ანთრაკი Page of ms. O: 135r წახნაგებული და უთლელი და შუვაჲ პილოჲსაჲ და ქიაჲ და ფარშამაგები.
და განდიდნა სოლომონ უფროჲს ყოველთა მეფეთა ქუეყანისათა სიმდიდრითა და სიბრძნითა.
და ყოველნი მეფენი ქუეყანისანი ეძიებდეს ხილვად პირსა სოლომონისსა, სმენად მისგან სიბრძნისა მისისა, რომელ მოსცა ღმერთმან გულსა მისსა.
და იგინი მოართუმიდეს თითოეულად ძღუენსა - ჭურჭელსა ოქროჲსასა და ვეცხლისასა, სამოსელსა და შტახსსა, საკუმეველსა, და ცხენთა და ჯორთა წლითი წლად.
და ქმნა სოლომონ ეტლები და განაწესა მჴედრები, და იყო სოლომონისი ორმეოცი ათასი ჴდალი მეზუები საეტლედ და ათორმეტ ათას მჴედართაჲ. და განაწესნა იგინი ქალაქთა საეტლოთა (სიც) და მეფისა თანაცა იერუსალჱმს. (30) და იყო ჴელმწიფჱ ყოველთა ჴელმწიფეთა და მეფეთა ზედა მდინარითგან ვიდრე უცხოთესლთამდე და ვიდრე საზღვარადმდე ეგჳპტისა.
და დადვა მეფემან სოლომონ ოქროჲ და ვეცხლი იერუსალჱმს, ვითარცა ქვაჲ, და ფიჭჳ, ვითარცა თჳთმავალი ლეღოვანი ველსა სიმრავლითა.
და მოსავალნი საჴედართა სოლომონისთანი ეგჳპტით და თეკუაჲთ და დამასკჱთ, რომელთა მოჰგურიდეს ვაჭარნი მეფისანი სასყიდლით. Page of ms. O: 135v
და მოვიდოდა ეტლები ეგჳპტით: ეტლი ერთი ასის სასწორის ვეცხლის და ცხენი ერთი ერგასის სასწორის ვეცხლის, ეგრეცა ყოველთა მათ მეფეთაჲ და ქეტელისაჲ და მეფეთა ასურასტანისათაჲ ზღჳთ კერძო აღმოსავალისათაჲ.
