და იყო, ვითარცა აღასრულა სოლომონ შენებაჲ ტაძრისა მის უფლისაჲ და ტაძრისა მის მეფისაჲ და ყოვლისა ქმნულებისაჲ, რომელი ინება სოლომონ საქმედ,
და გამოეცხადა უფალი სოლომონს მეორედ, ვითარცა გამოეცხადა მას გაბაონს.
და ჰრქუა მას უფალმან: ვისმინე ჴმისა შენისაჲ და ლოცვათა შენთაჲ და თხოვათა შენთაჲ, რომელი ითხოვე წინაშე ჩემსა; ვყავ შენთჳს მსგავსად ლოცვისა შენისა: განვწმიდე ტაძარი ეგე, რომელ აღაშჱნე დადებად სახელი ჩემი მას ზედა უკუნისამდე. და იყვნენ თუალნი ჩემნი და გული ჩემი მას შინა Page of ms. O: 131v ყოველთა დღეთა.
და შენ თუ ჰხჳდოდი წინაშე ჩემსა, ვითარცა ვიდოდა დავით, მამაჲ შენი, სიწმიდითა გულისაჲთა სიწრფოებით ყოფად ყოველივე, რაჲცა ვამცენ მათ, და ბრძანებანი ჩემნი თუ და მცნებანი ჩემნი დაიმარხნე შენ, -
აღვჰმართო საყდარი სუფევისა შენისაჲ ზედა იერუსალჱმსა უკუნისამდ, ვითარცა ვეტყოდე დავითს, მამასა შენსა, და ვთქუ: არა მოაკლდეს შენგან კაცი წინამძღურად ისრაჱლსა.
უკუეთუ უკუნიქცეთ თქუენ და შვილნი თქუენნი ჩემგან და არა დაიმარხნეთ მცნებანი ჩემნი და ბრძანებანი ჩემნი, რომელ მოგცა (სიც) მოსე წინაშე თქუენსა, და მიხჳდეთ და ჰმსახუროთ ღმერთთა უცხოთა და თავყუანის-სცეთ მათ,
აღვიღო ისრაჱლი ქუეყანისაგან, რომელ მივეც მათ, და სახლი ეგე, რომელ განსწმიდე სახელისა ჩემისათჳს, განვაგდო პირისაგან ჩემისა. და იყოს ისრაჱლი განსარყუნელ და სასიტყუელ ყოველთა ერთა.
და ტაძარსა მაგას მაღლად ქმნულსა ყოველნი რომელნი თანაწარვიდოდიან, დაუკჳრდეს, ისტჳნონ და თქუან: რაჲსამე ეგრე უყო უფალმან ამას ქუეყანასა და ტაძარსა ამას?
და თქუან: მისთჳს, რამეთუ დაუტევეს უფალი ღმერთი მათი, რომელმან გამოიყვანნა მამანი მათნი ეგჳპტით, სახლისა მისგან კირთებისაჲსა, და შეუდგეს ღმერთთა უცხოთა და თავყუანის-სცეს მათ და ჰმონეს მათ, ამისთჳს მოავლინა მათ ზედა ყოველი ესე ძჳრი. Page of ms. O: 132r მას ჟამსა გამოიყვანა სოლომონ ასული იგი ფარაოჲსი ქალაქით დავითისით სახიდ თჳსა, რომელი-იგი აღუშჱნა თავისა თჳსი[სა].
და იყო მათ დღეთა შინა,ოცსა წელსა აღაშჱნნა სოლომონ ორნი ტაძარნი ტაძარი იგი უფლისაჲ და ტაძარი მეფისაჲ.
და ქირამ, მეფჱ ტჳროსისაჲ, შეეწეოდა სოლომონს ძელითა ფიჭჳთა და ნაძჳთა და ოქროჲთა და ყოვლითავე, რაჲცა ნება იყო მისა. მას ჟამსა ჰსცა მეფემან სოლომონ ქირამს ოცი ქალაქი გალილეას.
და განვიდა ქირამ ტჳროსით გალილეად ხილვად ქალაქთა მათ, რომელ მისცნა მას სოლომონ, და არა სთნდეს მას.
ჰრქუა მას: რაჲ არიან ქალაქნი ესე, რომელ მომცენ მე, ძმაო? და უწოდა მათ საზღვარ მოდღენდელად დღედმდე.
და მოართუა ქირამ სოლომონს ას და ორი სასწორი ოქროჲ.
და ესე არს ხარკი, რომელსა მოჰჴდიდა მეფჱ საშენებელად ტაძრისა მის უფლისასა და ტაძრისა მის მეფისაჲსა და მილონისა და მაღალთა მათ. და აღაგნა ზღუდენი იგი დარღუეულნი ქალაქისა მის დავითისნი და ასურნი და მაჲდანი და ზღუდჱ იგი იერუსალჱმისაჲ და ესერი და მაგედონი და გაზერი
მეფისა მის მეგჳპტელთაჲსა, რამეთუ გამოვიდა და წარტყუენა გაზერი და მო\წუა Page of ms. O: 132v იგი ცეცხლითა და ქანანელი იგი, რომელ დამკჳდრებულ იყო ქალაქსა მას, მოსრა და მისცა იგი ზითვად ასულსა თჳსსა, ცოლსა მას სოლომონისსა.
და აღაშჱნა სოლომონ გაზერი და ბეთორონი ქუენაჲ.
და ბალათი და თერმოთი უდაბნოჲ იგიცა დად შჱნიცა,
ყოველნი იგი ქალაქნი სამკჳდრებელად, რომელ იყვნეს სოლომონისა, და ქალაქნი მეეტლეთანი და ყოველნი ქალაქნი საჴედართანი. და ყოველი იგი საქმჱ, რომელ ქმნა იერუსალჱმს და ლიბანეს და ყოველსა მას ქუეყანასა, ჰრიდა
ყოველსა მას ნათესავსა დაშთომილსა ამორეველთასა და ქეტელისა და ფერეზელისა და ქანანელისასა, ეველისა და იაბოსელისა და გერგესეველისა, რომელნი არა იყვნეს ძეთა მათგან ისრაჱლისათა.
და ძენი მათნი, რომელნი დაშთომილ იყვნეს ქუეყანასა მას, რომელთა ვერ შეუძლეს ძეთა მათ ისრაჱლისათა მოსრვად მათა, და შეადგინნა იგინი სოლომონ ხარკსა მონებისასა მუნდღენდელად დღედმდე.
და ძენი იგი ისრაჱლისანი არა შეადგინნა სოლომონ ხარკსა მძიმესა, რამეთუ კაცი მოღუაწნი იყვნეს და მონა მისა და წინამძღუარ ძენი მათნი და ჭურვილნი და მჴედარნი.
და ესე იყვნეს მთავარნი, რომელნი დაედგინნეს ზედა საქმესა მას სოლომონს, ხუთას და ერგასისნი ერსა Page of ms. O: 133r მას ზედა, რომელნი-იგი იქმოდეს საქმესა მას.
ხოლო ასული იგი ფარაოჲსი განვიდა ქალაქით დავითისით სახიდ თჳსა, რომელი უშჱნა, მას ჟამსა აღაშჱნა მილონი.
და შეწირის (!) სოლომონ სამგზის წელიწადსა მრგულიად-დასაწუველნი და სამშჳდებელნი ზედა საკურთხეველსა მას, რომელ-იგი უშჱნა უფალსა, და უკუმევნ საკუმეველსა წინაშე უფლისა და აღასრულა საქმჱ ტაძრისაჲ მის.
და ქმნა მეფემან სოლომონ ნავი გასიონ გაბერს, რომელი იყო მახლობელად ევილათსა, კიდესა შემდგომისა მის ზღჳსასა, ქუეყანასა მას ედომისასა.
და წარავლინნა ქირამ ნავსა მას თანა და მონათა თჳსთაგანნი, მენავენი ჴელოვანნი, ნავისა-მხედვარნი (!), ზღუასა შინა მონათა თანა სოლომონისთა.
და მივიდეს სოფერად და წარმოიღეს მიერ ოქროჲ ოთხას და ოცი ტალანტი და მოართუეს სოლომონს მეფესა.
