... Page of ms. O: 125r მართ და მექონოთთა და სიმაღლე ურმისთუალთაჲ მათ წყრთა და კერძო.
და ქმნულებაჲ ურმისთუალთაჲ მათ, ვითარცა ურმისთუალთა საეტლეთაჲ, და ჴელნი მათნი და ქედნი მათნი და ბეჭნი მათნი და ყოველი ქმნულებაჲ მათი - დასხმითი რვალისაჲ.
ოთხნი მჴარნი ზედა მათვე ოთხთა კიდეთა მიქონოთისათა, მუნვე შემართ მექეონოთად ბეჭნი მათნი.
და ზედა თავსა მის მექონოთისასა წყრთის ერთის კერძო, სიდიდით მრგულიად გარემო ზედა თავსა მის მექონოთისასა, და ჴელნი მისნი გამოდგმითნი მისგანვე.
და განეღებოდეს შედგმულსა ზედა ჴელთა მისთასა და ხორშთა მისთა ქერაბინნი, და ლომნი, და დანაკისკუდნი გამოქმნულნი მისგან პირისპირ ურთიერთას შინაგან და გარეშე.
და მის სახედვე ქმნა ყოველი იგი ქმნულებაჲ ათთა მათ მიქონოთთაჲ, ერთი ზომი და ერთი სწორებაჲ და ერთი სახჱ იყო ყოველთაჲ მათ.
და ქმნნა ათნი ქოთნისსახენი ქუაბნი პილენძისანი და შთაისხის ერთმან მან ქუაბმან ორმეოც მარ. და იყო ოთხ წყრთა საზომი ქუაბთაჲ მათ და ქუაბი ერთი თითოვეულად ათთა მათ მიქონოთთა ზედა.
და დადგნა მიქონოთნი იგი ხუთნი მჴრით კერძო ტაძრისა მის მარჯუენით და ხუთნი - მჴრით ტაძრისა მის მარცხენით და Page of ms. O: 125v ზღუაჲ იგი დადგა მჴრით მარჯუენით კერძო მზის აღმოსავალით და ბღუარით.
და ქმნა ქირამ სიავ-ქუაბნი განმატფობელად და ტასტები იგი. და აღასრულა ქირამ ყოველი იგი საქმჱ, რომელი უქმნა მეფესა სოლომონს ტაძარსა მას უფლისასა.
და სუეტნი ორნი გარემოდგმით ქანდაკებულ ზედა ორთა მათ სუეტის-თავთა და ორ-ორი მოტიხრული დასაფარველად გარემო ქანდაკებულთა მათ, ქმნულთა ზედა სუეტის-თავთა მათ.
და მროწლისსახენი ოთხასნი ორთა მათ სატიხართა და მროწლისსახედ ორნაკეცლად მოდგმულ ერთსა მას სატიხარსა, დასაფარველად გარემო ორთა მათვე საქციელთა მიქონოთისათა, ზედა ორთა მათვე სუეტთა.
და ქოთნისსახენი იგი ქუაბნი ათნივე ზედა მიქონოთთა მათ.
ზღუაჲ იგი ერთი და ათორმეტნი იგი კურონი ქუეშე ზღუასა მას.
და სიავნი იგი განმატფობელნი სამნი, ტასტები იგი და ჭურჭელი იგი, რომელი უქმნა ქირამ მეფესა სოლომონს ტაძარსა მას უფლისასა - სუეტები ორმეოცდარვაჲ ტაძარსა მას უფლისასა და ტაძარსა მეფისასა. და ყოველი იგი საქმჱ, რომელ ქმნა ქირამ პილენძისაგან ხოლო.
და არა იყო სწორ პილენძისაჲ მის, რომლისაგან ქმნა ყოველი იგი საქმჱ მრავალი დიდ-დიდი, და არა იყო სწორ ბრწყინვალებისა მის პილენძისა.
და კიდესა იორდანჱსასა ოდენ უქმ\ნა Page of ms. O: 126r მეფესა დასხმითი იგი პილენძისაჲ, სიზრქესა მას მიწისასა, შაშუვალ სოკქოთსა მას და სართანსა.
და მისცა მეფემან სოლომონ ყოველივე იგი, რამეთუ დიდად იყო ფრიად სიმრავლითა, და არა იყო რიცხჳ პილენძისაჲ მის. და ქმნა სოლომონ ყოველი იგი სამსახურებელი ტაძარსა მას უფლისასა და საზორველნი იგი ოქროჲსანი და ტაბლაჲ იგი, რომელსა ზედა პური იგი შესაწირავისაჲ მის დაეგებოდა, იყო ოქროჲსაჲ.
და სანთელნი ხუთნი მარჯუენით და ხუთნი მარცხენით, პირისპირ დაბირისა, რჩეულისა ოქროჲსანი, და ლამპარნი იგი და სანთელნი და მოსაწმედელნი იგი ოქროჲსანი.
და წირთხლები იგი და სამშჭულები, და ტასტები, და პინაკები იგი, და საგლელნი ოქროჲსაგან რჩეულისა და კარშიკები იგი სახლისა მის შინაგანისაჲ წმიდასა მას წმიდათასა, და კარები იგი ტაძრისაჲ მის ოქროჲთ რჩუნვილ.
და აღასრულა ყოველი საქმჱ, რომელ ქმნა მეფემან სოლომონ ტაძარსა მას უფლისასა. და შეიღო სოლომონ სიწმიდჱ იგი დავითის, მამისა თჳსისაჲ, და ყოველი იგი სიწმიდჱ სოლომონისი, - ვეცხლი და ოქროჲ, და ყოველივე იგი ჭურჭერი მისცა საფასედ ტაძარსა მას უფლისასა.
