მაშინ დადგეს მართალი დიდითა განცხადებულებითა წინაშე პირსა Page of ms. O: 276r მაჭირებელისა მისისასა და რომელთა შეურაცხ-ყვნეს შრომანი მისნი.
იხილონ და შეძრწუნდენ შიშითა ბოროტითა და განკჳრდენ დიდებულსა მას ცხოვრებასა მისსა.
და იტყოდიან გულთა თჳსთა სინანულითა და იწროებითა სულისაჲთა სულთ-ითქუმიდენ: "ესე არს იგი, რომელი ოდესმე გუაქუნდა ჩუენ საკიცხელად და იგავად ყუედრებისა ჩუენ უგუნურთა
და ცხოვრებაჲ მისი შეგუერაცხა სიცბილად და სიკუდილი მისი -- უპატიოდ.
ვითარ შეირაცხა ესე ძეთა შორის ღმრთისათა და წმიდათა შორის არს ნაწილი მისი?
შე-მე-ვსცეთითა გზისაგან ჭეშმარიტისა? და სიმართლისა იგი ნათელი არა გამოგჳბრწყინდა ჩუენ,
უშჯულოებისა გზითა აღვივსენით და წარწყმედისაჲთა, და ვიდოდეთ უდაბნოთა უგზოთა, ხოლო გზაჲ უფლისაჲ არა ვცანთ.
რაჲ მარგო ჩუენ ამპარტავანებამან ჩუენმან? და რაჲ შემეწია ჩუენ სიმდიდრჱ იგი სილაღისაჲ?
წარჴდა იგი ყოველი, ვითარცა აჩრდილი, და ვითარცა ამბავი, რომელი ადრე განქარდის.
და ვითარცა ნავი, ღელვასა ზღჳსასა რომელი წარვიდის, და კუალი არღარა იპოვის და არცა ალაგი სლვისა მისისაჲ ღელვათა ზედა;
გინა ვითარცა მფრინველი რაჲ განფრინდის ჰაერსა და არა იპოვის სახჱ სლვისაჲ; გუემითა ნაწევართა Page of ms. O: 276v ფრთეთაჲთა იტანჯებინ და ქარსა სულმცირესა აპებნ ძლით, მძლაფრიად ძრავნ ფრთეთა და განვლის, და ამისა შემდგომად არა იპოვის სასწაული განსლვისა მისისაჲ;
ანუ ვითარცა ისარი, განტყორცებული განსა; განაპის აერი და მეყსეულად მუნვე შეირწყჳს, და ვერ საცნაურ იქმნის განსლვაჲ მისი;
ეგრეცა ჩუენ ვიქმნენით და მოვაკლდით; და სათნოებისა სასწაული არა გუაქუს, რაჲმცა ვაჩუენეთ, რამეთუ უკეთურებათა შინა ჩუენთა განვლიენით".
რამეთუ სასოებაჲ უღმრთოთაჲ, ვითარცა მტუერი, ქარისაგან მოღებული, და ვითარცა ნეფხვაჲ მწულილი, არმურისაგან წარიდევნა, და ვითარცა კუამლი, ქარისაგან განიბნია, და ვითარცა ჴსენებაჲ მდგურისაჲ ერთ დღისაჲ, წარვიდა.
ხოლო მართალნი საუკუნოდმი ცხონდენ, და უფლისა მიერ არს სასყიდელი მათი, და ზრუნვაჲ მათთჳს -- მაღლისა მიერ.
ამისთჳს მოიღონ მეუფებაჲ შუენიერებისაჲ და შარავანდი სიკეთისაჲ ჴელისაგან უფლისა; რამეთუ მარჯუენითა თჳსითა დაიფარნეს იგინი და მკლავითა თჳსითა შეეწიოს მათ.
და მოიღოს ყოველი -- საჭურველი შურისა მისისაჲ და შეჭურნეს დაბადებულნი თჳსნი ძლევად მტერთა მისთა;
და შეიმოსოს ჯაჭჳ სიმართლისაჲ და დაიდგას ჩაფხუთად საშჯელი Page of ms. O: 277r შეუორგულებელი,
მოიღოს თორნჱ უძლეველი -- სიწმიდჱ,
და აღლესოს თუალუხუავი რისხვაჲ მახჳლად, და მის თანა ჰბრძოდის სოფელი უგუნურთა მიმართ.
და ვიდოდიან საისრელნი მიმართებულად ელვათანი, და ვითარცა კეთილი -- სიმრგულითა მშჳლდისაჲთა და ღრუბელთაჲთა სარბიელსა ზედა მოსრვიდეს.
და კლდისაგან -- საისრითა გულისწყრომითა სავსჱ დაეცემოდიან სეტყუანი, და განრისხნეს მათ ზედა წყალი ზღჳსაჲ, და მდინარენი წარჰრღუნიდენ ურიდად.
და წინა-აღუდგეს მათ სული ძლიერებისაჲ და ვითარცა არმურნი -- განანქრინეს იგინი. და მოაოჴროს ყოველი ქუეყანაჲ უშჯულოებამან, და ძჳრის-საქმემან დაამჴუნეს საყდარნი ძლიერთანი.
